Ferlies Flyers en Feanfroulju | Steenbergen krekt bûten de medaljes

Hast de folsleine wedstriid stie LWD Basket op efterstân tsjin Feyenoord, mar nei fjouwer perioades is it dochs 'gewoan' gelyk: 76-76. Dat bestjut dat we noch even trochgean yn Ljouwert.

De UNIS Flyers binne der net yn slagge de efterstân goed te meitsjen. De wedstriid yn de BeNe League tsjin it Dútske EG Diez-Limburg is einige yn 4-8.

Nei de twadde perioade wie it 3-6. Frankie Pucci brocht de spanning efkes werom troch de 4-6 te meitsjen, mar fia Marek Krocker en Hunter Fortin rûnen de Dútsers dochs wer út.

Spanning yn Sliedrecht: it wurdt in fiifsetter yn de wedstriid Sliedrecht Sport - Friso Snits. De fjirde set giet mei 25-21 nei de thúsploech: 2-2.

Friso Snits kaam op efterstân yn de wedstriid tsjin Sliedrecht Sport, mar yntusken steane de Snitsers mei 2-1 foar. De tredde set gie mei 21-25 nei de ploech fan coach Erik Reitsma.

Nei de twadde perioade sjogge de UNIS Flyers tsjin in 3-6-efterstân oan tsjin it Dútske EG Diez-Limburg.

Nei 20 minuten stienen de Dútsers al mei 1-2 foar. Dêrnei soarge Marek Krocker foar de 1-3. Jasper Nordemann brocht nei in power-playsituaasje de spanning werom.

Dêrnei gie it lykwols mis: earst makke John Mclean de 2-4 en Adam Keyes makke der 2-5 fan.

Dêrmei wie it spektakelstik noch net oer: Jesse Barwell brocht de Flyers yn earste ynstânsje wat tichterby, mar efkes letter wie it ferskil alwer trije fia Julian Grund.

De regearjend lânskampioen yn it follybal, Friso Snits komt op 1-1 tsjin Sliedrecht Sport. De Snitsers winne de twadde set mei 22-25.

LWD Basket giet tsjin Feyenoord op 'e siik nei de earste oerwinning fan it seizoen, mar de Ljouwerters moatte dan wol earst in efterstân fuortwurkje.

By it skoft is it 36-42 foar Feyenoord. Nei it earste kwart wie it 13-21. LWD Basket hat dus wol wat fan de efterstân goed makke, mar is der noch net.

De follybalsters fan Friso Snits nimme it op tsjin Sliedrecht Sport. It begjin fan de wedstriid is net goed foar de Snitsers: de earste set einige yn 25-18 foar Sliedrecht.

Dat sc Hearrenfean sneontemiddei nei fiif ferliespartijen op rige wer ris in punt pakte, wie gjin reden ta eufory. Sterker noch: Hearrenfean hie winne moatten, fûn trainer Kees van Wonderen. Mar ien momint, krekt foar it skoft, bepaalde de wedstriid yn negative sin.

De UNIS Flyers steane nei de earste perioade op efterstân yn de wedstriid tsjin it Dútske EG Diez-Limburg.

Nils Wegner makke de iepeningstreffer en David Lademann skoarde de 0-2. Jesse Barwell die wat werom foar de Flyers.

Sûnt dit seizoen dogge der ek twa Dútske teams mei yn de BeNe League iishockey.

Marrit Steenbergen is fjirde wurden yn de World Cup wedstriid yn Berlyn. Sy swom in tiid fan 1,57.99.

Sy moast de Asutralyske Lani Pallister, de Nij-Seelânske Erika Fairweather en Siobhan Bernadette Haughy fan Hongkong foar har litte.

Steenbergen kwalifisearre har as tredde foar de finale mei in tiid fan 1,59.10.

Nei fiif ferliespartijen op rige hat sc Hearrenfean lang om let wer ris in resultaat helle. De thúswedstriid tsjin NEC einige yn 1-1. Hearrenfean wie de bettere ploech, mar ferjitte yn de earste helte de kânsen ôf te meitsjen.

It is skoft by de wedstriid yn de earedivyzje tusken sc Hearrenfean en NEC. Hearrenfean wie yn de earste helte de bettere ploech en kaam ek fertsjinne op 1-0 fia Patrik Wålemark, mar krekt foar it skoft gie it mis.

Ald-Hearrenfeanspiler Bas Dost skoarde út de rebound nei't Andries Noppert yn earste ynstânsje in skot fan Sontje Hansen keare koe: 1-1.

Harkemase Boys hat yn de twadde helte in 2-0 efterstân goedmakke tsjin Eemdijk. De koprinner fan de tredde divyzje kaam yn de 55e minút op 1-2 fia Joris Adams. Yn de lêste tsien minuten fan de wedstriid makke Yska Last de lykmakker.

Troch it lykspul hawwe de Boys 20 punten en bliuwe se boppe-oan yn de kompetysje.

In divyzje leger ferlear Bûtenpost wol. By it skoft stienen se al mei 0-1 efter tsjin Excelsior'31 en yn de twadde helte bepaalde Rick Hemmink de einstân fan de strafskopstip ôf op 0-2.

Tiny Hoekstra hat de wedstriid tusken Ajax en Feyenoord yn de frouljusearedivyzje beslikke. De fuotbalster út Rinsumageast makke it iennige doelpunt fan de wedstriid.

It wie har earste doelpunt dit seizoen.

Yn deselde kompetysje komt sc Hearrenfean moarn yn aksje. Sy spylje tsjin ADO Den Haag.

Oer in oerke trapet sc Hearrenfean ôf tsjin NEC. De ploech fan trainer Kees van Wonderen kin de punten goed brûke. De trainer stjoert hast deselde opstelling it fjild yn as tsjin FC Twente ferline wike (1-0 ferlies).

Denzel Hall is de iennige nije namme yn de basis. Hy ferfangt de blessearre Hussein Ali.

Yn de tredde divyzje fan it amateurfuotbal stiet koprinner Harkemase Boys mei 0-2 efter tsjin Eemdijk.

Nei 10 minuten kamen de Boys op efterstân fia Yannick Bouw. Dyselde Bouw wie krekt foar it skoft wer trefseker: 0-2.

Harkemase Boys hat dit seizoen alris earder ferlern fan Eemdijk. Yn de twadde kwalifikaasjeronde fan de beker waarden de Boys útskeakele troch in doelpunt djip yn blessueretiid (3-2).

In divyzje leger stiet Bûtenpost ek op efterstân. Krekt foar it skoft krigen de Blaukes in doelpunt om de earen tsjin Excelsior'31. In fan rjochting feroare frije traap fleach yn de goal: 0-1.

Judoka Berber Ludema fan Dokkum is sânde wurden op it WK foar junioaren yn it Portugeeske Odivelas.

Ludema ferlear yn de twaddekânsronde fan de Dútske Eva Ronja Buddenkotte yn de kategory ûnder 78 kilo.

Yn de pûl hie se al ferlern fan Minju Kim út Súd-Koreä.

De Nederlânske follyballers hawwe op it olympysk kwalifikaasjetoernoai yn Sina mei 3-1 ferlern fan Poalen. De setstannen wiene: 25-12, 17-25, 22-25 en 27-29. Nettsjinsteande it ferlies spile Oranje kreas: it team koe goed meikomme mei it nivo fan Poalen, de nûmer ien fan de wrâld.

De Nederlânske ploech fan bûnscoach Roberto Piazza wûn de earste set, mar slagge der dêrnei net yn de druk op Poalen troch te setten. Yn de fjirde set kamen de Nederlanners werom, mar nei fjouwer setpunten dy't net troch Oranje benut waarden, sloech Poalen dochs ta.

Bennie Tuinstra begûn net yn de basis, hy kaam pas letter yn it duel op it fjild. Yn de twadde set makke Nederân flaters en yn de tredde set gie it frijwat lykop. It duel like rap ta in ein te kommen doe't Poalen mei 19-16 de lieding naam. Mar op de opslach fan Tuinstra makke Nederlân fjouwer punten op rige en folge by 24-23 it earste setpunt. Dochs wist Poalen nei in útputtingsslach - dochs yn fjouwer sets te winnen.

Snein folget noch in lêste duel mei Argentinië. Om meidwaan te kinnen mei de Olympyske Spelen yn Parijs hat Nederlân in hege notearring nedich op de wrâldranglist fan juny takom jier.