De sport fan 23 en 24 septimber: Noppert útskeakele op Hungarian Darts Trophy

LWD Basket hat syn earste wedstriid yn de kluphistoarje ferlern. De Ljouwerter basketballers, ferline jier noch spyljend ûnder de namme Aris, gongen yn it earste kompetysjeduel thús mei 60-93 ûnderút tsjin Landstede Zwolle.

De ploech fan Vincent van Sliedregt hie it yn it earste kwart al dreech mei de sterk spyljende Zwollenaren. De stân nei tsien minuten wie dan ek 18-22.

Oan it begjin fan it twadde kwart kamen de Ljouwerters werom, it wie sels even 25-24, mar doe makke Landstede alve punten op rige. Dêr kaam LWD Basket net mear fan werom. By it skoft wie it ferskil tolve punten yn it foardiel fan de besikers.

Landstede rûn yn de tredde en fjirde perioade allinnich mar fierder út. De besikers sketten sekuerder en hienen ek folle minder faak balferlies as de Ljouwerters (7 om 16).

Sportklup Hearrenfean stiet by it skoft achter tsjin Excelsior. It is 0-2 foar de Rotterdammers. Ald-Hearrenfeanspiler Couhaib Driouech makke nei tweintich minuten de iepeningstreffer en joech yn de blessueretiid fan de earste helte de assist by de 0-2 fan Nikolas Agrafiotis.

De UNIS Flyers ha de earste wedstriid fan it nije seizoen ferlern. Yn de striid om de Ron Berteling Schaal ferlearen de Feanster iishockeyers mei 6-3 fan HIJS Hokij út Den Haag.

It begûn noch sa goed foar de Flyers yn de Jaap Edenhal yn Amsterdam. Jesse Barwell sette se binnen sân minuten op 2-0, beide kearen yn powerplay. Noch foar de ein fan de earste perioade hie de regearjend kampioen oarder op saken steld (3-2).

Yn de twadde en tredde perioade rûn HIJS Hokij fierder út. Mike Collard die noch wol wat werom, mar spannend waard it net mear. HIJS makke der flak foar tiid noch 6-3 fan.

De Ron Berteling Schaal is de supercup yn it iishockey, gewoanwei tusken de kampioen en de bekerwinner fan it foarige seizoen. HIJS wûn beide titels ferline seizoen, mar de Flyers wiene runner-up. Ferline jier gie de finale tusken deselde twa ploegen, doe wûn HIJS Hokij mei 4-3.

Harkemase Boys hat mei 1-0 wûn op besite by HSC'21. Thomas Prinsen makke healwei de twadde helte de iennige goal fan de wedstriid.

De Harkiten bliuwe mei de oerwinning koprinner yn de tredde divyzje. HSC'21 wie krekt as Harkemase Boys noch sûnder ferlies yn de kompetysje.

Twa oare konkurrinten, Eemdijk en Genemuiden, ferspilen hjoed ek punten. In goede dei foar de ploech fan Marcel Post dus.

Harkemase Boys is der noch net yn slagge in doelpunt te meitsjen yn de treddedivyzjewedstriid tsjin HSC'21 út Haaksbergen. HSC'21 makke wol in goal, mar dy waard ôfkard fanwegen hands. It is dus noch 0-0.

It is al de twadde kear dit seizoen dat Harkemase Boys op besite is by HSC'21. In goede moanne lyn wûnen de Harkiten nei ferlinging mei 4-3 yn de earste kwalifikaasjeronde fan de KNVB-beker. Yn de twadde ronde fan datselde kwalifikaasjetoernoai waard Harkemase Boys fan 'e wike útskeakele.

De Nederlânske follybalsters moatte moarn mei 3-0 of 3-1 fan de Dominikaanske Republyk om har te pleatsen foar de Olympyske Spelen fan takom jier.

De Dominikaanske Republyk wûn fan 'e middei mei 3-1 fan gastlân Sina en klimt dêrom oer Nederlân hinne yn de stân. Servië stiet earste yn it Olympysk Kwalifikaasjetoernoai en hat him al pleatst foar de Spelen.

Moarn om 10.00 spilet Nederlân dus tsjin de Dominikaanske Republyk de lêste wedstriid fan it OKT. As Nederlân wint, dan ha beide lannen likefolle punten. Omdat de Dominikaanske Republyk op it stuit in bettere 'setratio' hat, moat Nederlân mei minstens twa sets ferskil winne.

As it moarn op it OKT net slagget, dan kin Nederlân him noch kwalifisearje op grûn fan de wrâldranglist. Dat wurdt pas yn juny bekend.

Bûtenpost hat de wedstriid yn de fjirde divyzje fan it amateurfuotbal mei 5-2 ferlern fan Scherpenzeel. By it skoft wie it noch 2-2, mar yn de twadde helte wie de ploech út Gelderlân dúdlik better.

Yn de 53ste minút waard it 2-3 troch in eigen doelpunt fan Bûtenpost. Dêrnei makke Timo Jochemsen de 2-4 en Pernelly Biya bepaalde de einstân op 2-5.

Bûtenpost bliuwt op sân punten stean út fiif wedstriden.

Itzhak de Laat hat op de 500 meter fan it NK shorttrack yn Ljouwert in sulveren medalje behelle. Foar Hessel van Berkum fan Stiens wie der brûns op de 1.500 meter.

Yn de fjirde divyzje fan it amateurfuotbal spilet Bûtenpost tsjin Scherpenzeel. De tuskenstân by it skoft is 2-2.

Bûtenpost begûn goed oan de wedstriid en kaam fia Rik Weening op foarsprong.

Dêrnei naam Scherpenzeel it inisjatyf oer, mei twa doelpunten ta gefolch. Earst fleach in foarset fan Corné Davelaar sa de goal yn en efkes letter tekene Mark de Graaf foar de 1-2.

De teams gienen lykwols mei in likense stân oan de tee, want yn de 45e minút makke Jarno Westerhof de 2-2.

Darter Danny Noppert hat him op it nipperke pleatst foar de achtste finale fan de Hungarian Darts Trophy. Yn in thriller wie er mei 6-5 te sterk foar Anton Östlund.

Noppert syn tsjinstanner yn de achtste finale fan moarn komt út de winner fan de wedstriid tusken Dirk van Duijvenbode en Scott Williams.

De Nederlânske follybalsters, mei Marrit Jasper, hawwe de foarlêste wedstriid fan it olympysk kwalifikaasjetoernoai foar de Spelen fan Parys ferlern fan Servië. Nei de knappe oerwinning freed op gastlân Sina koe Oranje net stunte tsjin de regearjend wrâldkampioen. De setstannen wiene 25-19, 25-16 en 25-20.

Nederlân wie net bestân tsjin it sterke blok fan Servië en makke in soad flaters. Yn de earste set koe de ploech fan bûnscoach Felix Koslowski noch goed bybliuwe, mar yn de slotfaze makke Servië dochs it ferskil. Yn de twadde set namen de East-Europeeske froulju al gau ôfstân en joegen se dy marzje net mear út hannen. Yn de tredde set pakte Oranje in 3-0 foarsprong, mar Servië kaam werom en naam dêrnei it inisjatyf wer yn hannen en makke it mei 25-20 ôf.

Snein nimt Nederlân it yn it lêste duel op tsjin de Dominikaanske Republyk. Dy wedstriid moat Oranje winne, want it is no nei it tredde plak yn de pûl sakke. De Dominikaanske Republyk hat it twadde plak oernommen. De bêste twa yn de pûl fan acht lannen pleatse harren foar de Spelen. Servië giet oan kop.