Bûtenpost wint earste wedstriid op de snein | Follybalsters ferslaan Tsjechië

Op de Aldehoupartij yn Ljouwert binne we oankaam by de finales. By de manlju spylje Peter van Zuiden, Taeke Triemstra en de ôfskiednimmende Hans Wassenaar tsjin Marten Bergsma, Gabe-Jan van Popta en Hendrik Kootstra.

By de froulju giet de einstriid tusken Moniek Lootsma, Louise Krol en Jeska Terpstra oan de iene kant tsjinoer Iris Veltman, Lisanne Scharringa en de ôfswaaiende Marrit Zeinstra.

VV Bûtenpost hat Rohda Raalte harren earste ferlies fan it seizoen besoarge. Op besite yn Oerisel wienen de Blaukes mei 1-0 te sterk. Wim de Vries kopte nei in oere de iennige goal fan de wedstriid tsjin de touwen.

It wie de earste kear dat Bûtenpost op snein fuotbalje moast. It flaggeskip fan de feriening spilet yn de regel altyd op saterdei, mar sûnt dit jier sitte de saterdeis- en sneinsklups byelkoar yn de kompetysje. As de sneinsklup thús spilet, mei dy derfoar kieze om it duel op snein te spyljen.

Bûtenpost hat no sân punten út fjouwer wedstriden. Dêrmei stiet de klup op it dield fiifde plak yn de fjirde divyzje B.

Sander Arends en David Pel ha it challengertoernoai yn Rennes wûn. De Ljouwerter en syn maat wienen yn de finale mei 2-0 te sterk foar Antoine Escoffier en Niki Kaliyanda Poonacha út Frankryk. De setstannen wienen 6-3 en 6-2.

De Nederlânske follybalsters, mei Marrit Jasper fan Snits, hawwe de twadde wedstriid fan it olympysk kwalifikaasjetoernoai yn Sina wûn. Sneon ferlear de ploech noch mei 3-2 fan Kanada, mar de twadde wedstriid fan Tsjechië wûnen se mei 3-0. De setstannen wiene 25-13 25-18 25-21.

Nei de nederlaach tsjin Kanada mocht der near mear ferkeard gean. De Tsjechyske froulju waarden fan it begjin ôf ûnder druk set. De earste set waard reedlik maklik wûn. Ek de twadde set gie oertsjûgjend nei de Nederlanners. De tredde set wie wol dreger, mar úteinlik slagge it noch wol om ek dy binnen te slepen.

Nettsjinsteande de winst stiet de ploech noch in grutte opjefte te wachtsjen. Nederlân moat by de earste twa lannen yn in pûl fan acht einigje om noch in ticket nei Parys behelje te kinnen. Mei wrâldkampioen Servië en thúslân Sina yn de pûl wurdt dat net maklik. Tiisdei komme Jasper en har ploech wer yn aksje, sy spylje dan tsjin Meksiko. Woansdei folget Oekraïne. It toernoai duorret al mei al oant takom wike snein.

Darter Danny Noppert fan De Jouwer is der net yn slagge om de achtste finale fan de World Series of Darts Finals te heljen. Yn Amsterdam ferlear Noppert sneontejûn mei 6-3 fan Nathan Aspinall.

Aspinall kaam rap op foarsprong en rûn út nei 3-0. Noppert kaam werom ta 3-2, mar seach dêrnei dat Aspinall wer fuortrûn nei 5-2. De Jouster slagge der net yn om nochris werom te kommen.

Sportklup Hearrenfean is sneon yn De Kuip yn Rotterdam fernedere troch regearjend lânskampioen Feyenoord. It duel einige yn 6-1. Nei 20 minuten stie it al 3-0.

Sawol Genemuiden (2-2 tsjin IJsselmervogels) en Urk (2-2 tsjin VVSB) litte hjoed punten lizze yn de tredde divyzje. Dat betsjut dat Harkemase Boys mei 13 út 5 de iensume koprinner is nei de 4-0 oerwinning op Hoogeveen.

It is in minne dei foar elts dy't hert hat foar sc Hearrenfean. By it skoft stiet de ploech fan trainer Kees van Wonderen mei 3-1 efter tsjin Feyenoord.

Nei 20 minuten hienen se dêr by Hearrenfean nei alle gedachten foar tekene, doe stie it al 3-0 troch doelpunten fan Luka Ivanusec, Mats Wieffer en Igor Paixão.

Simon Olsson die dêrnei noch wat werom foar Hearrenfean. Mei 3-1 is Feyenoord noch genedich foar de Friezen. De Rotterdammers hawwe ek in protte kânsen mist.

Harkemase Boys wint op eigen fjild mei mar leafst 4-0 fan Hoogeveen. De doelpunten nei it skoft kamen fan ynfaller Jari Slort en Joris Adams.

Troch de oerwinning komt Harkemase Boys op 13 punten út 5 wedstriden. Dêrmei stean de Boys boppe-oan yn de tredde divyzje.

Letter op sneon kinne Urk en Genemuiden ek op 13 punten komme.

Harkemase Boys stiet healwei it duel tsjin Hoogeveen op in 2-0 foarsprong.

Nei in kertier wie it Joris Adams dy't der 1-0 fan makke. Krekt foar it skoft ferdûbele Jhurrey Margaritha, op oanjaan fan dyselde Adams, de foarsprong.

Om 16.30 oere nimt sc Hearrenfean it yn De Kuip yn Rotterdam op tsjin regearjend lânskampioen Feyenoord. De wedstriid is live te folgjen by Omrop Fryslân op de radio, it kommentaar komt fan Roelof de Vries.

By de Nederlânske kampioenskippen Cross Triathlon, dy't dit wykein holden wurde op It Amelân ûnder de namme Xterra Netherlands, is Trudy Veenstra fan Boelensloane tredde wurden by de froulju. Se pakte dêrmei sulver op it NK.

De winst gie nei Christine Verdonck út België dy't 2:48.10 nedich hie foar 1500 meter swimme, 36 kilometer fytse en 10 kilometer hurdrinne. Mar omt Verdonck net út Nederlân komt, gie de Nederlânske titel nei Romy Spoelder út Almere en it sulver dus nei Veenstra.

By de manlju gie de winst nei Wouter Dijkshoorn út Amsterdam, foar Joep Staps (Tiel) en Geert Lauryssen (België).

Der waarden ek titels ferdield op de koartere ôfstân (500 meter swimme, 17 kilometer fytse en 5 kilometer hurddrave). By sawol de manlju as de froulju gjin Fryske medaljes.

Sportklup Hearrenfean spilet fanmiddei tsjin Feyenoord. Dat is de regearjend lânskampioen. By de Friezen hat Hussein Ali nei alle gedachten in basisplak.

Dat is neffens himsels al in dream dy't útkomt, mar no makke hy dizze wike ek noch syn debút foar it lân dêr't hy noch noait west hat: Irak.

De start kin better. Ta dy konklúzje kaam de evaluaasje fan it SKS Skûtsjesilen. In sintrale wedstriidlieding komt der net, mar der wurdt wol in bestjoerslid frijmakke om wedstriidsaken oan te pakken.

De Nederlânske follybalsters hawwe de earste wedstriid fan it Olympyske kwalifikaasjetoernoai yn Sina ferlern. De ploech fan bûnscoach Felix Koslowski ferspile in 2-1 foarsprong en ferlear úteinlik yn fiif sets fan Kanada.

Goeiemiddei, yn dit blog hâlde wy jo op de hichte fan de lêste ûntwikkelingen fan de Fryske sport. Hjoed folgje we ûnder oare darts, follybal en fuotbal.