Superieur partoer Ilse Tuinenga slút ek ôf mei oerwinning

De Nederlânske follybalsters binne yn Brussel begûn oan de striid om it brûns op it EK. Tsjinstanner is Italië, dat twa jier lyn noch Europeesk kampioen waard.

By Nederlân stiet Marrit Jasper út Snits it hiele EK al yn de basis, hjoed ek wer. Har jongere sus Hester sit op de bank.

De earste finalist fan it keatsen yn Penjum is bekend: Tjisse Steenstra wint op de twadde list mei 5-3 6-2 fan it partoer fan Remmelt Bouma, dat mei 3-0 foarstie. Steenstra hat in steand nûmer yn de heale finale en is dus wis fan de einstriid.

De tsjinstanner dêr komt út de partij tusken Gert-Anne van der Bos en Haye Jan Nicolay. Van der Bos wûn op de twadde list mei 5-3 6-4 fan Marten Bergsma. De achterynse fan Bergsma, Hendrik Kootstra, spilet no wer tsjin Van der Bos, want hy falt yn it partoer fan Nicolay yn foar de blessearre Patrick Scheepstra.

Skeeleraar Berber Vonk út Appelskea is op de lêste dei fan it WK yn Italië achttjinde wurden op de maraton. De titel gie yn de massasprint nei Johana Viveros út Kolombia. Dy hie twa lângenoaten njonken har op it poadium: it sulver wie foar Fabriana Arias en Gabriela Rueda waard tredde.

De haadklassekeatsers spylje hjoed harren lêste frijeformaasjepartij fan it seizoen. De manlju spylje hjoed yn Penjum, de froulju yn Reduzum.

De manlju binne yntusken oankaam by de twadde list, mei Marten Bergsma tsjin Gert-Anne van der Bos en Tjisse Steenstra tsjin Remmelt Bouma. It partoer fan Haye Jan Nicolay hat in steand nûmer.

It wrâldkampioenskip roeien yn Belgrado (Servië) is hjoed úteinset. Der binne twa Friezen dy't dizze wike yn aksje komme: Ymkje Clevering en Jan van der Bij. Dy lêste hat in bysûndere perioade achter de rêch: trije wiken lyn lei er noch yn it sikehûs yn Eastenryk.

De Nederlânske follyballers, mei Bennie Tuinstra fan Snits, hawwe op it Europeesk kampioenskip harren twadde oerwinning behelle. De ploech fan bûnscoach Roberto Piazza sette yn Skopje (Noard-Masedoanië) Tsjechië mei 3-0 oan 'e kant.

De setstannen wiene 25-22, 25-22 en 25-22. Earder wûn Oranje fan Montenegro. Freed ferlear de ploech wol fan Poalen. Mei de twadde winst leit it team op koers foar de knock-outfaze. De earste fjouwer fan de seis ploegen yn groep C geane troch.

"Dit was voor ons een van de belangrijkste wedstrijden in de poule", sei Tuinstra nei de wedstriid. "We hadden ons goed voorbereid en dan is het mooi om te zien als het bedachte plan goed wordt uitgevoerd. Maandag spelen we tegen Denemarken. Een dag rust komt ons goed uit. Lekker rusten, slapen en naar de fysio."

De fuotballers fan VV Bûtenpost hawwe ek in oerwinning behelle. Op besite by DETO waard it 1-2.

De doelpunten fan de besikers kamen op namme fan David Villalta en Rick Weening. Dy lêste spile de wedstriid trouwens net út, want hy ûntfong yn de slotfaze noch in reade kaart.

It is foar Bûtenpost de earste oerwinning fan it seizoen. Foarige wike waard der ferlern fan Be Quick 1887.

Harkemase Boys hat fan 'e middei de tredde kompetysjewedstriid fan it seizoen wûn. Yn eigen hûs wienen se mei 3-2 te sterk foar USV Hercules út Utrecht.

De Fryske doelpunten kamen op namme fan Joris Adams (twa kear) en Jhurrey Margaritha.

Mei sân punten út trije wedstriden stiet Harkemase Boys no op it fjirde plak yn de tredde divyzje.

Quentin Maritnus spilet de rest fan dit seizoen by TOP Oss. De 32-jierrige Ljouwerter, dy't earder yn de jeugd fan SC Cambuur en sc Hearrenfean spile, siet sûnt maart sûnder klup. Dêrfoar spile de oanfaller sa'n sân jier by ferskate Japanske klups.

Jelmar Hempenius koe op it WK skeelerjen yn Italië net fierder komme dan de achtste finales. Mei in tiid fan 10.261 ferlear hy op de 100 meter tsjin Alessio Piergigli, dy't in thúswedstriid ried.

Hempenius wûn dêrfoar wol yn de heat tsjin de Amerikaanske Michael Pasquarella.

De Nederlânske follybalsters mei Friezin Marrit Jasper hawwe yn de heale finale fan it EK freedtejûn ferlern tsjin Servië.

De Nederlânske ploech spile in oertsjûgjende wedstriid mar yn Brussel wie de tsjinstanner mei 3-1 te sterk: 25-21, 15-25, 25-21.

Servië is de regearjend wrâldkampioen, Nederlân stiet op nûmer njoggen fan de ranglist.