112-nijs 24 augustus: Brânwacht op einejacht | Man swierferwûne nei fjochtpartij

By in konflikt tusken twa minsken op in terras yn it sintrum fan Dokkum is woansdeitejûn in 51-jierrige man út de gemeente Hearrenfean swierferwûne rekke. Flak nei de fjochtpartij koe in 50-jierrige man út Achtkarspelen troch de plysje oanholden wurde as fertocht fan mishanneling.

Dat meldt RTV NOF. De 50-jierrige fertochte wurdt heard oer it ynsidint. It 51-jierrige slachtoffer is mei de ambulânse oerbrocht nei it sikehûs. De plysje is noch dwaande mei in ûndersyk nei de oanlieding fan it foarfal. "We horen onder andere getuigen en onderzoeken wat er zich precies heeft voorgedaan", seit in plysjewurdfierder.

De KNRM warskôget boatsjeminsken op de Waadsee foar min waar dat der oan komt. Meardere rêdingsboaten binne op see yn ferbân mei de ferwachtingen. Minsken mei lytse boatsjes wurde advisearre om de see te ferlitten.

Op de Iselmar is de KNRM ek útfearn fanwegen de waarsferwachtingen.

It KNMI hat foar tongersdei koade giel ôfkundige foar de Waadeilannen fanwegen hurde rein en kâns op stevige tongerbuien. De warskôging jildt fan 11.00 oere oant en mei 15.00 oere middeis. Jûns sille de measte buien wer fuortlûke, ferwachtet it waarynstitút.

De eigneresse fan de hynstestâl dy't tiisdei ferlern gie by in grutte brân, hat yn de ôfrûne dagen in protte reaksjes krigen. Se hat no sels in tydlik dak boppe de holle, mar har hynders binne har grutste soarch, seit se.

By de brân is net allinne de hynstestâl ferlern gien, mar ek it wenhûs moat sloopt wurde om plak te meitsjen foar nijbou. De bewenners ha tydlik ûnderdak fûn yn in twadde, lytse, wenning op it eigen hiem, mar al har guod is fuort.

"We moeten straks eerst om nieuwe kleren."

De tolve hynders binne mei de skrik frijkaam, seit eigeneresse Ananka van der Voet, mar ek al it hynsteguod is ferlern gien. It giet ûnder oare om halsters, hynstesealen en kroaden.

Op sosjale media frege Van der Voet om help, mar dy oprop koe se der nei in dei wer ôfhelje, seit se. "Het is overweldigend hoeveel reacties ik heb gehad, en wat mensen allemaal aanbieden. Nog even en ik moet er een loods bijbouwen."

De hynders stean no earst bûten yn de greide om de stâl hinne. "Gelukkig hebben we een groot terrein en is het mooi weer. Maar wanneer dat weer omslaat willen we de paarden het liefst binnen hebben. We hebben dan ook vooral behoefte aan noodstallen en hekken."

De ôfrûne dagen stienne yn it teken fan besites fan minsken fan de ferskering en resjerzje. "Het is een rollercoaster waarin we terecht zijn gekomen."

Op De Gordyk is in auto op in peal bedarre. Dat soe bard wêze nei in útwyk manoeuvre.

It ûngelok wie op de Nijewei. It is net dúdlik wêr't de bestjoerder krekt foar útwike moast. De bestjoerder rekke net ferwûne.

De auto wurdt troch in berger fan de peal ôf helle.