Junioareljeppers soargje foar it fjoerwurk yn lêste wedstriid foar Frysk kampioenskip

Kramer kaam yn syn alderearste sprong fan de jûn ta 19,72. Dat wie achterôf genôch foar de oerwinning by de senioaren. Rutger Piersma siet mei syn lêste finalesprong noch wol yn de buert, mar hy kaam twa sintimeter tekoart. Ek Oane Galama wie tichtby: mei 19,65 waard er tredde.

By de froulju wûn Hanneke Westert foar it earst sûnt de iepeningswedstriid fan dit seizoen wer ris. Lang like it derop dat Sigrid Bokma har fjirde oerwinning op rige gripe soe, mei 14,92. Yn har lêste finalesprong kaam Westert lykwols ta 15,21. Dêrnei ferbettere Bokma har ek nochris, mar krekt net genôch: 15,11. It tredde plak wie mei 14,87 foar Pytrix Westra.

Yn de junioarekategory lei it nivo heech: Germ Terpstra ljepte yn syn tredde sprong fan de foarronde nei in ôfstân fan 20,11. Hy wie dêrmei de iennige yn Burgum dy't foarby de tweintich meter kaam. En krekt as ferline wike yn Drylts wie er goed foar de fierste ôfstân fan de dei.

Ek de 19,73 fan Michiel Zijlstra hie genôch west foar de oerwinning by de senioaren, mar dus net by de junioaren. Wisse Broekstra, dy't ek geregeld fierder kaam as de bêste senior, waard hjoed mei 19,22 tredde.

Sietse Lefferts hie in moaie dei yn de jongeskategory. Yn syn twadde sprong ljepte er nei in nij persoanlik rekôr: 18,60. Dat ferbettere er dêrnei nochris, troch wer njoggen sintimeter fierder te ljeppen. Martijn Zuidersma waard, ek mei in persoanlik rekôr (17,22) twadde, foar Djurre de Jong (16,53).

Ek by de famkes waarden persoanlike rekôrs sprongen. Sanne Bouwstra pakte de oerwinning yn 14,76, wat 62 sintimeter fierder is as se oait ljept hie. De 14,40 fan Hieke Vogel wie ek in persoanlik rekôr, goed foar it twadde plak. Noa de Boer waard tredde yn 14,37.