Sportnijs 5 en 6 augustus: Nij skânsrekôr yn It Heidenskip | Tuinenga wint yn Wytmarsum

It begjint te reinen yn It Heidenskip. De Nasjonale Fierljep Manifestaasje leit dêrom efkes stil. Alle ljeppers hawwe oant no ta ien finalesprong makke. Hoe let de wedstriid ferfette wurdt, is noch net bekend.

Op It Heidenskip wurdt der ljept foar de titel by de Nasjonale Fierljep Manifestaasje. Juster waard de wedstriid ôfbrutsen fanwege it minne waar, mar hjoed koe de kwalifikaasje wol ôfmakke wurde.

Yntusken binne de finalisten bekend. By de manlju senioaren hawwe de Friezen Jorn de Vries, Minne Smit, Jarno Hoekstra, Ysbrand Galama, Sytse Bokma, Jan Teade Nauta en Bauke de Jong harren pleatst.

Hilde van der Weij, Grytsje Veltman en Sigrid Bokma binne de iennige Fryske finalisten by de froulju. Opfallend is it ûntbrekken fan Marrit van der Wal en Hanneke Westert, mar ek twafâldich Nederlânsk kampioen Wendy Helmes is der net by.

By de junioaren binne Bouwe Westert, Rutger Haanstra, Michiel Zijlstra, Germ Terpstra, Jelte Folkertsma, Riemer Durk Krol en Wisse Broekstra de finalisten.

De Fryske ynbring by de jonges bestiet út Sietse Lefferts, Brent Monsma en Djurre de Jong. By de famkes dogge Mirije Zorgdrager, Yenthe van Kammen, Yrsa Maats, Jeltske Terpstra, Berber Haanstra, Hieke Vogel en Noa de Boer mei oan de finale. Isabel Overbeek is de iennige kandidaat út Hollân.

Sweins is mooglik it lytste doarpke dat ea de Freule wûn hat. Jouke de Jong, Luitzen Idsardi en Marten Sytsma skreaunen skiednis. It doarpke mei krekt wat mear as 100 ynwenners hie yn 1988 de bêste jongeskeatsers fan Fryslân.

De fuotbalsters fan Oranje, mei Kerstin Casparij en oanfierster Sherida Spitse, hawwe mei in muoisume winst op Súd-Afrika de kwartfinales fan it WK yn Australië en Nij-Seelân berikt.

Der dogge 38 partoeren mei oan de 120ste Freulepartij yn Wommels takom woansdei. Dat binne der trije mear as yn 2022.

De hynstesport hie ek fan it minne waar te lijen. It Concours Hippique Rijs hie in prachtige start yn 'e moarn, mar healwei de middei foelen der bakken mei rein yn Riis. "We konden niet anders dan besluiten de boel stil te leggen en vervolgens te annuleren. Veiligheid voor alles", sa lit de organisaasje witte. It konkoers hippyk is der takom jier wer, dan op 3 augustus.

It Nederlânsk follybalteam wint ek de ekstra set yn de oefenynterlân mei Hongarije: 25-21. Dêrtroch is it 4-0. De spylsters krije der gjin genôch fan, want se dogge ek noch in fiifde set.

Doelman Oscar Linner krijt gjin kontrakt by sc Hearrenfean. De Sweed wie de ôfrûne dagen op proef, mar hy hat de technyske stêf net oertsjûgje kind.

Skûtsjenijs: De Jouwer kaam mei in protestflagge oer de finish en no is dúdlik wurden dat it protest tsjin Wâldsein tawiisd is. Wâldsein krijt dus 14 punten. De skûtsjes dy't nei Wâldsein finishen, skowe in plakje op. It Hearrenfean kaam net oer de finish en krijt dus wol 14 punten.

It publyk yn de Snitser Sporthal sjocht dat de Nederlânske follybalfroulju gjin problemen hawwe mei Hongarije. Ek de tredde set wurdt wûn troch Oranje: 25-13.

De Nederlânske follybalfroulju hawwe ek de twadde set wûn yn de oefenynterlân tsjin Hongarije. Dizze kear waard it 25-15. De wedstriid duorret op syn minst fjouwer sets.

Sportklup Hearrenfean hat de lêste wedstriid yn de tarieding op it nije seizoen mei 0-1 ferlern fan it Frânske FC Metz. De wedstriid waard twa kear stillein fanwege it minne waar.

De follybalfroulju fan Oranje, dêr't ek Hester en Marrit Jasper by spylje, hawwe yn de Sneker Sporthal de earste set binnenhelle. Sy spylje in oefenynterlân tsjin Hongarije. De earste set einige yn 25-14.

It wie in bysûndere fjoerdoop foar Sieberen van Terwisga, de nije skipper fan it skûtsje fan Earnewâld. Hy kaam as twadde oer de finishline, nei Grou. "It fielt geweldich, ik haw noch nea sa'n ûnthaal hân op de Pikmar. Dit is dochs prachtich. Wy kamen hiel moai fuort", seit er nei de wedstriid.

Earnewâld koe de twadde posysje goed fêsthâlde. "Ik bin hartstikke bliid, dit hie ik net betinke kinnen. It is úteinlik mar ien rûte en Ljouwert gie ek hurd, mar it fielde goed." De wedstriid einige yn needwaar en mei it skûtsje fan It Hearrenfean dat omsloech, mar dêr krige de 32-jierrige Van Terwisga net folle fan mei. "Dat hawwe wy net iens sjoen."

En it spul leit wer stil, mar dizze kear hat it waar der neat mei te krijen. It is skoft by sc Hearrenfean - FC Metz. De tuskenstân is 0-0. It skoft is wat koarter as gewoanwei om't de Frânsen harren fleantúch op Eelde helje moatte.

En we fuotbalje wer yn it Abe Lenstra Stadion. Benijd hoelang't it dizze kear duorje sil.

Der waard wer efkes fuotballe by sc Hearrenfean - FC Metz. Mar it begûn wer te tongerjen en dus hat skiedsrjochter Laurens Gerrets de spilers op 'e nij nei binnen stjoerd.

By de oefenwedstriid tusken sc Hearrenfean en it Frânske FC Metz wurdt wer fuotballe. De wedstriid lei in skoft stil fanwege tonger, mar yntusken is it wer feilich om te fuotbaljen.

Ek by de oefenwedstriid tusken sc Hearrenfean en FC Metz spilet it waar in negative rol. It tongeret en dêrom is de wedstriid stillein yn de 24e minút. De tuskenstân is 0-0. Pelle van Amersfoort is al fluch blessearre útfallen.

It skûtsje fan Grou mei skipper Douwe Visser hat de earste wedstriid fan it SKS-kampioenskip 2023 wûn. Op it thúswetter rûn Grou in hiel ein fuort by de rest fan it fjild.

It skûtsje fan It Hearrenfean is omslein op de Pikmar. De loften waarden al hieltyd driigjender op de mar. Fan it wetter ôf wie al wjerljocht te sjen, der kaam hiel oar waar oan. De wyn draaide en in dikke flaach wyn soarge derfoar dat it skûtsje Gerben van Manen fan It Hearrenfean omsloech. De kommisje hat de finishflagge der yn hongen, foar't de slimste tonger der is.

It tongert op It Heidenskip. Dêrom leit de Nasjonale Fierljep Manifestiaasje op dit stuit stil. De wedstriid is - sadree't it wer úteinset - live te folgjen by Omrop Fryslân.

It SKS-kampioenskip 2023 is úteinset by Grou. De bemannings hienen der wat te folle nocht oan, want der wie twa kear in folslein falske start. Trije kear wie skippersrjocht, mar net foar De Jouwer en It Hearrenfean: sy starten op 'e nij falsk en moasten werom nei de startline.

De oranjeseleksje fan de follybalfroulju spilet hjoed in útswaaiwedstriid tsjin Hongarije yn de Sneker Sporthal. De froulju meitsje har ree foar it EK follybal yn Estlân, dêr't de groepswedstriden spile wurde.

Foar Marrit Jasper is it in moai weromkommen, want sy komt fan Snits en spile dêr yn it ferline ek. "De laatste keer dat ik in de Sneker Sporthal speelde was toen ik nog bij Sneek zat. Dat is denk ik al zeven jaar geleden." It makket it allinne mar moaier om dêr op it fjild te stean, fynt se.

"Sneek is volgens mij uitverkocht. Het is ook een volleybalstad, dus er komen veel mensen op af. Dat is natuurlijk wel heel leuk. Ik geloof ook niet dat er ooit een wedstrijd in Sneek is geweest met het nationale team. Dat maakt het bijzonder", sa fynt Jasper.

Oft sy opsteld wurdt, is noch net hiel wis. Al is de kâns wol grut. "Het zijn de laatste wedstrijden die we spelen voor het EK begint. Een soort oefenwedstrijd. Er wordt van alles geprobeerd, de laatste dingen worden nog bekeken. Op een EK ga je niet meer dingen uitproberen, maar dat kan nu nog wel. De bedoeling is wel dat iedereen aan bod komt."

Jasper sit by de seleksje en skat de kânsen foar it EK goed yn. "Ik denk dat we zeker eerste of tweede kunnen worden, dat is tenminste voor de eerste ronde wel het doel. Frankrijk doet het wel goed, dus het zou ook een tweede plek kunnen worden, maar ik ga ervanuit dat we de eerste ronde doorkomen."