FryslânDOK: 'Wat is it wûnder?' oer de hillige Titus Brandsma

Anno Sjoerd Brandsma waard as boeresoan berne yn it buorskip Oegekleaster by Boalsert. Al jong keas hy foar it kleasterlibben. Hy gong nei de oarder fan de karmeliten yn Brabân en naam de namme fan syn heit oan: Titus.

Yn Rome studearre hy filosofy en letter waard er rektor magnifikus fan de universiteit yn Nijmegen. Yn de oarloch besocht er (katolike) kranteredaksjes derfan te oertsjûgjen om ûnôfhinklik te bliuwen en net de opleine NSB-propaganda op te nimmen. Hy waard oppakt, deportearre en fûn úteinlik de dea yn konsintraasjekamp Dachau.

Yn 1985 waard er sillich ferklearre.

Goed 57.000 minsken wienen by de hillichferklearring fan Titus Brandsma yn Rome. Ek Titus Hettinga út Boalsert, achterneef fan pater Titus, wie der mei syn frou Jetty, bern en bernsbern by. In bân mei de tsjerke hawwe se amper mear, mar wol mei de wearden dêr't Titus foar stie.

"Foar ús wie pater Titus al lang hillich" sizze in soad minsken. Ek as se neat mei it katolike leauwen, Fatikaan, de paus of sels mar religy hawwe.

Der wurdt noch hieltyd drok lobbyd om pater Titus ta beskermhillige fan de sjoernalistyk te beneamen. Bart Brandsma, ék famylje, studearre lykas Titus filosofy en wurke as sjoernalist.

Syn missy is: fet krije op de polarisaasje yn de maatskippij. Krekt dêryn sjocht hy Titus as foarbyld en besiket er in brêge te slaan tusken leauwigen en net-leauwigen. De krêft fan pater Titus skûlet yn syn training en wêzen as mûnts, tinkt Bart Brandsma.