Sportnijs: Ciccone nei Surhústerfean | Steenstra-en-dy winne Rengerspartij

Swimster Marrit Steenbergen fan Easterwâlde hat har pleatst foar de finale op de 200 meter wikselslach. Se waard twadde yn har heale finale yn in tiid fan 2.09,30. Allinnich Yiting Yu út Sina wie flugger mei 2.09,04.

Steenbergen giet as tredde troch nei de finale fan moarn.

En dan is it binnen: by 5-4 6-6 hellet it partoer fan Gert-Anne van der Bos, Taeke Triemstra en Erwin Zijlstra it beslissende punt binnen. Triemstra is dêrmei de bêste keatser ea.

Konsternaasje yn Ljouwert. De karmaster tinkt dat de bal yn is yn it perk fan Van Zwieten, mar de skiedsrjochter oardielt oars: bal kaam op it tou. It partoer Van der Bos seit: mar der is op slein, dus de punten moatte foar ús wêze. Dat hat de skiedsrjochter net sjoen en dus is it punt foar Van Zwieten-en-dy, ta grutte ûnfrede fan Van der Bos, Triemstra en Zijlstra.

Mar de lilkens helpt Van der Bos-en-dy. Se meitsje in efterstân goed en by 6-6 slacht Van der Bos him binnen: 5-4. Noch ien buordsje hat Triemstra nedich.

Gert-Anne van de Bos set efkes oan en dêr is it partoer fan Menno van Zwieten net tsjin bestân: 4-4.

Se stienen mei 3-1 foar, it partoer fan Gert-Anne van der Bos, Taeke Triemstra en Erwin Zijlstra. Dus like it derop dat Triemstra him hiel gau de bêste keatser ea neame mocht.

Mar de partij is kantele. Menno van Zwieten, Gabe-Jan van Popta en Pieter Jan Leijenaar steane yntusken mei 3-4 foar.

By dizze stân pakt Triemstra wer net it punt dat er nedich hat om boppe-oan te kommen op de ivige keatsranglist.

Gabe-Jan van Popta slacht de bal boppe op 6-4 foar Van Zwieten. Dêrmei hawwe sy it gatsje wer tichtmakke: 3-3. De spanning rint op.

Op 6-6 hat Gert-Anne van der Bos de kâns om syn partoer op 4-1 te setten, mar hy mist it perk. Sa is it yn stee fan 4-1 3-2, de spanning is dus werom.

Van der Bos, Triemstra en Zijlstra binne op 3-1 kaam. Dat gie mei mear muoite as it earst like. Van der Bos-en-dy kamen mei 6-0 foar, mar dêrnei miste Van der Bos trije kear it perk. By de fjirde kear wie it wol raak.

Der is in gatsje slein. Triemstra mei him hast de bêste keatser ea neame.

It partoer fan Menno van Zwieten, Gabe-Jan van Popta en Pieter Jan Leijenaar kamen op 1-1, mar yntusken geane Gert-Anne van der Bos, Taeke Triemstra en Erwin Zijlstra wer oan de lieding: 2-1.

It earst like yn it begjin de kant fan Van Zwieten-en-dy op te fallen, mar it partoer joech in 4-0-foarsprong fuort.

De wedstriid yn de twadde omloop tusken de partoeren fan Gert-Anne van der Bos en Menno van Zwieten is los. It is in mooglik histoaryske partij: as Van der Bos-en-dy winne, pakt Taeke Triemstra it earste plak yn it klassemint fan bêste keatsers ea.

It earste buordsje is foar Triemstra syn partoer: 1-0.

Taeke Triemstra wit wat him te dwaan stiet. Yn de twadde omloop treft hy mei syn maten Gert-Anne van der Bos en Erwin Zijlstra it partoer fan Menno van Zwieten, Gabe-Jan van Popta en Pieter Jan Leijenaar.

Dat partoer wie ferline woansdei noch te sterk foar Triemstra syn partoer (5-1 6-4). Dêrmei liet Triemstra de earste kâns lizzen om boppe-oan te kommen yn it ivige keatsklassemint.

Hjoed moat Triemstra winne om de lieding te pakken yn dat klassemint.

Soe it dan hjoed barre foar Taeke Triemstra? De foartekenen binne yn elts gefal geunstich: mei syn maten Gert-Anne van der Bos en Erwin Zijlstra wûn hy yn de earste omloop mei 5-1 6-0 fan Patrick van Dellen, Thomas Dijkstra en René de Haan.

Triemstra hoecht allinnich noch de twadde omloop te winnen om de lieding oer te nimmen yn it klassemint.

It Nederlânsk alvetal hat de winst oer de streek lutsen yn de wedstriid tsjin Portugal. In doelpunt fan Van der Gragt nei in hoekskop fan Spitse wie foldwaande: 1-0.

De oare Friezinne yn de seleksje, Kerstin Casparij, mocht djip yn blessueretiid noch even ynfalle.

Keatser Taeke Triemstra ferfolget syn jacht op de kopposysje yn it ivich keatsklassemint. Op de haadklassepartij yn Ljouwert moat er op syn minst de twadde omloop winne om boppe-oan te kommen.

Ofrûne woansdei en sneon slagge it him net yn Minnertsgea en Dokkum, is trije kear skippersrjocht? Folgje it hjir:

Nederlân hat de wedstriid ûnder kontrôle. Portugal hat noch gjin kâns hân. It iennige dat der op de prestaasje fan Oranje oan te merken falt, is dat de skoare noch net fierder útwreide is. As Fryske fuotbalfolger tinke je dan: wat hie der bard as Fenna Kalma of Tiny Hoekstra wol yn de seleksje sitten hienen?

Spitse ferliest noch wolris de bal, mar ferdigenjend spilet se sterk. Boppedat hie se mei har assist in grut oandiel yn de iepeningstreffer.

Nederlân is op foarsprong kaam yn de WK-wedstriid tsjin Portugal en Sherida Spitse fan Snits is fuort wichtich. Ut har hoekskop kopte Stefanie van der Gragt raak: 1-0.

De goal waard yn earste ynstânsje ôfkard om't Jill Roord bûtenspul stie. De VAR fûn lykwols dat Roord doelman Inês Pereira dêrby net hindere en dus telt it doelpunt.

It Nederlânsk frouljusfuotbalalvetal spilet oer in lyts healoere harren earste wedstriid op it WK yn Nij-Seelân en Australië. Yn it Nij-Seelânske Dunedin is Portugal de tsjinstanner.

Sherida Spitse fan Snits is oanfierder en stiet yn it basisalvetal fan bûnscoach Andries Jonker. Kerstin Casparij fan It Hearrenfean sit op de bank

Berber Vonk kaam sneon net yn de buert fan de medaljes by it EK skeelerjen yn Valence d'Agen, mar yn de junioarekategory wie der wol sukses. Robin Metz fan Ljouwert pakte brûns op de puntekoers.

Metz ûntsnapte al fluch út it peloton en bleau trije rûntsjes foarop. Dêrmei sammele hy genôch punten foar it tredde plak yn de einklassearring.

De Nederlânske swimsters, mei Marrit Steenbergen fan Easterwâlde, hawwe harren kwalifisearre foar de finale fan de 4x100 meter frij op it WK yn it Japanske Fukuoka. Steenbergen swom har fluchste splittiid ea.

Steenbergen pleatste har ek foar de heale finale op de 200 meter wikselslach.

Op it EK skeelerjen is Berber Vonk sneontejûn net yn 'e buert fan 'e medaljes kaam op de 10 kilometer puntekoers. Se wûn ien kear in tuskensprint en pakte dêrmei 2 punten, mar dêr bleaun it by foar Vonk.

De winst gie nei Marine Lefeuvre út Frankryk, mei 14 punten. Lângenoate Alicia Delhommais pakte sulver mei 11 punten, foar Edda Paluzzi út Italië (9 punten).

It slagge keatser Taeke Triemstra sneon net om boppe-oan it ivige keatsklassemint te kommen. Snein krijt hy in nije kâns yn Ljouwert by de Rengersdei.

De wedstriid begjint om 11.00 oere. Omrop Fryslân is der op de webside en yn de Omrop-app live by oant Triemstra klear is yn Ljouwert. Geert van Tuinen fersoarget it kommentaar en Jan Braaksma is ko-kommentator.

As it partoer fan Triemstra de twadde omloop wint by de partij yn Ljouwert, komt er op it earste plak.

Lollum-Waaksens hat yn Hitsum de Ald-Meierspartij wûn. It partoer, mei Britt Joustra, Lisanne Venema en Jeldau Koopmans, wie yn de finale mei 5-3 en 6-0 te sterk foar it partoer fan Stiens, dat keatste mei Marije Bokma, Marije van der Molen en Marsha Broersma.

Stiens wie yn it begjin fan de finale noch op in 0-3 foarsprong kaam, mar moast tastean hoe't Lollum-Waaksens sterk weromkaam yn de wedstriid.

Ferline jier ferlear Lollum-Waaksens noch de finale fan de Ald-Meierspartij.

De finale by de Ald-Meierspartij yn Hitsum giet tusken de partoeren fan Lollum-Waaksens en Stiens.

Lollum-Waaksens wie mei 5-4 en 6-6 te sterk foar it partoer fan Tsjom. Stiens wist mei 5-4 en 6-2 te winnen fan Balk.

It partoer fan Gert-Anne van der Bos, Renze Hiemstra en Hendrik Kootstra hat it keatsen yn Dokkum wûn. Yn de finale gie it winnende partoer der mei de oerwinning fantroch tsjin it partoer fan Patrick van Dellen, Kees van der Schoot en Jurrit Osinga.

Yn in spannende finale waard it úteinlik 5-4 en 6-4.

It winnende partoer wie der yn de earste omloop ferantwurdelik foar dat Taeke Triemstra noch altyd de kopposysje yn it ivige keatsklassemint net oernaam hat fan Piet Jetze Faber.

SC Cambuur hat sneontemiddei it oefenduel tsjin Heracles Almelo mei 4-1 wûn. Yn de wedstriid, dy't spile waard mei twa helten fan in oere, makken de Ljouwerters it ferskil yn de twadde helte tsjin de kampioen fan de earste divyzje fan ôfrûne seizoen.

By de 23e Ald-Meierspartij yn Hitsum binne se ta oan de heale finale. Dêryn nimt it partoer fan Lollum-Waaksens it op tsjin Tsjom, wylst Balk oan 'e bak moat tsjin Stiens.

De finale by it trochelkoarlotsjen yn Dokkum giet tusken it partoer fan Gert-Anne van der Bos, Renze Hiemstra en Hendrik Kootstra en it partoer fan Patrick van Dellen, Kees van der Schoot en Jurrit Osinga.

De tredde priis is foar Pieter Jan Leijenaar, Gerben de Boer en Menno van Zwieten.

Michel Vlap fan Snits makket him mei syn klup FC Twente klear foar de konfrontaasje yn de Conference League tsjin it Sweedske Hammarby IF (tongersdei is de earste wedstriid yn Enschede).

Hjoed oefenet Twente tsjin Schalke 04, de nûmer 17 fan de Bundesliga fan ferline seizoen, dêrmei degradearre de klup nei it twadde nivo fan Dútslân.

Foar Vlap ferrint dizze wedstriid oant no ta goed. Yn de fyftjinde minút iepene hy de skoare.

De wedstriid yn de earste klasse fan it fierljeppen dy't dizze jûn op it programma stie yn Grijpskerk, giet net troch fanwege de rein.

De wedstriid wurdt woansdei om 19.00 oere ynhelle.

Taeke Triemstra hat ek de twadde mooglikheid mist om de kopposysje te pakken yn it ivige keatsklassemint.

Triemstra moast op de trochelkoarlotterspartij de earste twa omlopen winne om Piet Jetze Faber foarby te gean yn it klassemint, mar Triemstra en syn maten Tjisse Steenstra en René de Haan gienen der al yn de earste omloop ôf.

Triemstra-en-dy ferlearen mei 5-2 6-4 fan it partoer fan Gert-Anne van der Bos, Renze Hiemstra en Hendrik Kootstra.

Moarn krijt Triemstra in nije kâns, dan stiet de Rengerspartij yn Ljouwert op it programma.

Sherida Spitse en Kerstin Casparij binne de twa Friezen dy't oerbleaun binne yn de seleksje foar it WK fuotbal. Dat toernoai begjint foar Nederlân snein. Spitse tinkt dat Nederlân fan elts lân winne kin. "Ik denk echt dat dat kan."

Fuotballer Oege-Sietse van Lingen fan Twizelerheide belibbe tongersdei in jûn dy't er net gau mear ferjitte sil. Foar syn Lúksemboarchske klup F91 Dudelange skoarde hy trije kear tsjin it Ierske St. Patrick's Athletic yn de Conference League. Van Lingen is no sels dield topskoarer fan it toernoai.