FryslânDOK 'De boaiem berikt': "Biologysk ite moat mainstream wurde"

Stadichoan steapelje de bewizen har op dat ús ytpatroan liedt ta sterk tanimmende sûnensproblemen en tanimmende kosten yn de sûnenssoarch. Dochs bliuwt it oandiel biologyske lânbou noch altyd ûnder de fiif persint stykjen.

Salang't de fraach net tanimt, sil it foar de lânbousektor ek dreech wêze om oer te gean op mear biologysk buorkjen.

Om dy situaasje troch te brekken, binne nije inisjativen nedich. Dat is de oertsjûging fan Martien Lankester út Iens. Hy is oplaat ta dokter en hâldt him syn hiele libben lang al dwaande mei it effekt dat iten op de sûnens fan minsken hat. Hy fynt it no heech tiid wurden om biologysk iten 'mainstream' te meitsjen.

Mei it projekt 'Bioregio' wol Lankester sjen wat der nedich is om minsken manmachtich oan it biologysk iten te krijen. In wichtich punt is fansels it priisferskil.

Hy tinkt dat dat op te lossen is troch konsuminten koarting te jaan op biologyske produkten. Dat soe betelle wurde kinne troch it jild dat besparre wurdt yn de sûnenssoarch, as minsken sûner ite. Mooglik soenen dy minsken ek koarting krije kinne op har syktekostepreemje.

Dêrnjonken wol Lankester ûndersykje litte hoe sterk oft de relaasje is tusken sûn iten en sûne minsken. As dy relaasje better oantoand wurde kin, is it foar de soarch ek nijsgjirriger om mei te dwaan oan ditsoarte fan inisjativen. Lankester wol mei alle partijen, fan boeren oant soarchfersekerders, yn petear.

Al yn 1980 stie Martien Lankester oan de basis fan in groepke pioniers: in achttal boeren om Wommels hinne dy't as earsten biologysk-dynamysk begûnen te buorkjen. De boeren waarden destiids nuver oansjoen, mar de measten hawwe it oprêden en hawwe no opfolgers dy't noch altyd biologysk wurkje.

Ien fan har is Wytze Brandsma fan Boalsert. Hy leaut grif yn de sûnens fan syn suvel, en is derfan oertsjûge dat 'bio' ta in sûner plattelân liedt, dêr't elk fan opknapt, fysyk en mentaal.