112-nijs 9 july: Koade oranje ôfrûn | Auto yn de sleat by Aldetrine

It KNMI hat yn ús provinsje opskaald nei koade oranje. Der binne tongerbuien mei swiere wynstjitten mooglik. Ek kinne der grutte hagelstiennen falle. De warskôging jildt foarearst fan 16.00 oant 19.00 oere. Dêrnei is der noch in oerke koade giel fan krêft.

Op de Waadeilannen jildt koade oranje net. Dêr is wol koade giel fan krêft.

In automobiliste is snein mei har auto yn de sleat bedarre lâns de Pieter Stuyvesantweg by Aldetrine. Neffens tsjûgen soe de frou botst wêze mei in oare auto dy't út de rjochting fan Wolvegea kaam. De oare auto rekke skansearre oan de linkerkant.

De bestjoerster fan de auto dy yn de sleat bedarre is nei it sikehûs brocht. De plysje docht ûndersyk nei wat der krekt bard is.

Der ride op dit stuit gjin treinen tusken Akkrum en Ljouwert. Dit komt troch in kapotte spoarbrêge. De ferwachting is dat it probleem om 17.00 oere oplost is.

De brân yn Berltsum is út. De útwreiding nei in njonkenlizzend kassekompleks koe de brânwacht foarkomme.

Op dit stuit is de brânwacht dwaande mei in neikontrôle. By de brân hat ien persoan reek ynazeme, dy is kontrolearre troch ambulânsepersoniel.

De brânwacht hie al gau opskaald nei tige grutte brân. Dat wie benammen om't it gie om in grut kompleks en net dúdlik wie hoe grut de brân wêze soe.

Ek kinne troch meardere korpsen op te roppen de brânwachtminsken rapper ôfwiksele wurde, dat is ferstannich mei dit waarme waar.

Yn Berltsum is in brân útbrutsen, de brânwacht hat opskaald nei tige grutte brân. It giet om in gebou oan de Bûtenpôle.

In loads stiet folslein yn de brân. De brânwacht is de brân fan de bûtenkant oan it bestriden.

Yn de kas dy't dernjonken stiet, wie noch ien persoan oanwêzich, dy is troch de brânwacht út it gebou helle.

Alle korpsen yn de omjouwing binne op de lokaasje.

It KNMI jout foar hjoed tusken 15.00 en 20.00 oere koade giel ôf yn Fryslân. Der binne dan mooglik tongerbuien, hagel, swiere wynstjitten en in soad delslach.

Yn in oar part fan Nederlân, benammen yn it suden en easten, jildt koade oranje.