Dit wie de Fytsalvestêdetocht fan 2023: "In prachtdei"

Mear as 10.000 minsken ha de einstreek yntusken helle. Sy ha yn de tinte yn Boalsert de lêste stimpel helle.

Simone Scheffer is binnen! De spesjale Omrop-reporter op de fyts hat foar de 28e kear de finish yn Boalsert berikt en se fielt har noch prima. "It lêste eintsje is noch wol in ein, hielendal mei dy pittige wyn. Mar ik hie noch wat oer, sa ken ik mysels net!"

De hiele dei die se fan de fyts ôf ferslach foar de Omrop. "Prate en fytse tagelyk, dat kostet in soad muoite. Mar ik wat ha ik genoaten, net te leauwen. It wie fantastysk waar."

In moaiste momint kin se net kieze. "Mar fan 'e moarn betiid yn de Noardeasthoeke wie hiel moai. Doe wie it wol kâld, mar ek moai, datst de fûgeltsjes en de tsjillen hearst. Dan wurdt it stadichoan ljocht, dêr wurd ik hiel gelokkich fan."

It is smoardrok by de finish yn Boalsert. "It is let op gong kaam, mar de grutte kloften komme no binnen", fertelt in man fan de organisaasje. It betsjut ek dat it no hielendal fol stiet en dat it oare ferkear net mear maklik Boalsert binnen komme kin.

De ferwachting wie dat de measte dielnimmers wat earder klear wêze soenen. "Fanwegen it moaie waar hienen we tocht dat it om 19.00 of 20.00 oere wol hast klear wêze soe, mar de grutte groepen komme no dus. De earsten wienen der al om 14.00 oere, mar dizze groepen ha it wat swierder hân."

Yn Aldemardum, it plak fan ien fan de lêste stimpelposten, begjint it wat rêstiger te wurden. Minsken kinne dêr oant 20.15 noch in stimpel helje.

De fytsers moatte dêrnei noch 47 kilometer ôflizze en komme, foardat se by de finish binne, noch troch Starum, Hylpen en Warkum.

Wa't no noch yn Aldemardum is, moat dus wol even trochfytse om foar 22.00 oere te finishen.

De fytsers dy't oer de finish komme yn Boalsert, binne foar it grutste part noch aardich 'fris en fruitig', sjocht ferslachjouwer Miranda Werkman. Sy wit ek te melden dat der yntusken 7.500 minsken oer de einstreek kaam binne: oer de helte dus!

In fytser út De Wilp (Grinslân) hat wol in hiel bysûndere dei. Hy hat hjoed in skiep rêden. "Ik zag het beestje in het land liggen, op de rug met de poten omhoog aan het spartelen. Dus toen ben ik teruggefietst, over het hek gesprongen en het schaap weer overeind geholpen."

As er dat net dien hie, dan hie it skiep it net oerlibbe, seit er. "Ik kom van het platteland, dus dan weet je dat zo'n schaap in doodsnood is. Als ik 'm niet overeind had geholpen, had-ie het niet overleefd. Ik moest dus over het hek springen, ook al ben ik de jongste niet meer."

Dochs hat er gjin minút twivele: "Ik ben direct teruggegaan en heb ingegrepen. Daarna ging het weer goed met het dier, die liep weer mooi verder."

Dizze twa jonges út Warkum hienen har fan 'e moarn ferslept, mar se mochten noch meifytse. "Noch in pear kilometer en dan steane it bier en de snacks klear, dan kinne we der wol wer tsjinoan!"

It giet no wol hurd: yntusken binne der mear as 5.000 minsken oer de finish kaam yn Boalsert. Dat betsjut ek dat der noch in lytse 10.000 trochkomme moatte.

Der binne oant no ta goed 4.000 fytsers oer de einstreek kaam yn Boalsert. Dat is wat minder as gewoanwei. Neffens de organisaasje hat dat te krijen mei de hurde wyn dy't se op it lêste stik fan de rûte fan foaren krigen.

De grutte kloften wurde dus wat letter oan de finish ferwachte.

Omrop-ferslachjouwer Simone Scheffer sit noch hieltyd op de fyts. Yntusken is se yn de buert fan Starum, mar se hat it dreech:

De kilometers begjinne sa stadichoan te tellen. De measte fytsers binne no yn it súdlike part fan de provinsje. Sa no en dan moatte se even fan it seal en dan kin der sels file ûntstean.

Fraksjefoarsitter Matthijs de Vries fan de Fryske ôfdieling fan de ChristenUnie siet hjoed ek op de fyts.

Njonken de fytsers binne der hjoed ek in protte motors op 'en paad. Der dogge fierder 40 soleksen en 30 brommers mei.

Olivier Groenhof is noch mar 11 jier en is dit jier foar it earst oan it stimpeljen. Om spierpine foar te kommen, wikselet hy syn linker en rjochterearm ôf. "Dat werkt prima!"

Lykas by de Alvestêdetocht op redens binne der by de Fytsalvestêdetrocht rayonhaden foar ferskillende stikken fan it parkoers.

Yn Drylts is der in nije: Hendrik de Leeuw. Hy nimt it stokje oer fan Henk Koopstra, dy't dizze taak jierrenlang op him naam.

"Do moatst de kop derby hâlde", jout Koopstra syn opfolger mei. "Moatst alles op tiid regelje. Wy kinne hjir noch krekt genôch frijwilligers fine, mar op oare plakken is it wol dreech."

Tinus van der Heide is de earste dy't mei in oare fyts as in racefyts trochkomt yn Aldemardum. Van der Heide hat in grutte bak foarop. "Foar de wyn kin ik de 27/28 kilometer de oere wol helje. Yn de wyn mei ik bliid wêze as ik de 19/20 helje."

Van der Heide siet yn ien fan de lêste groepen. "Doe waaide it boppe-yn noch net sa hurd. Dêr ha ik it aardich mei troffen.

Grutte fraach is: wat sit der dan yn de bak? "Drûge woarst, want dêr sit in soad sâlt yn, broadsjes, koeke, ekstra drinken en in reservebân."

In groepke fan tolve fytsers út Kortenhoef by Hilversum is yntusken oankaam yn Starum. Se fytse de Alvestêdetocht net samar: "Er werd bij mij darmkanker geconstateerd", seit in lid fan de groep. "Toen zei ik: als ik hieruit kom, ga ik de Fietselfstedentocht doen."

En no is it dus safier. Freonen sleaten harren by it inisjatyf oan en dus binne se yntusken mei syn tolven. "We slepen elkaar er vandaag doorheen, zoals zij dat ook bij mij hebben gedaan toen ik ziek was."

De earste fytsers binne yntusken oer de einstreek kaam. De tocht ferrûn foar harren probleemleas. Even nei twaën passearre it earste groepke de finish yn Boalsert. Der sille noch in soad folgje.

Neffens Stephan Rekker, foarsitter fan de Fytsalvestêdetocht ferrint de dei oant no ta foarspoedich. "Ik ferfeel my hast. It rint hartstikke moai. Der binne net in soad ûngemakken."

"It is de maklikste tocht yn jierren", stelt Rekker. "En it ferkear en it parkearjen smyt oant no ta ek gjin problemen op."

Eltsenien hat in oare reden om oan de Fytsalvestêdetocht mei te dwaan: de ien wol him lichaamlik útdaagje, de oar wol genietsje fan it moaie waar en wer in oar fynt it gewoan moai om in stikje te fytsen.

Yn Drylts sit op dit stuit in man op in stuoltsje wat by te kommen. Hy fytst de tocht as ûnderdiel fan in weddenskip. Hy tinkt dat er it wol helje sil, mar earlik is earlik: "Ik ha my wolris better field."

Yn Aldemardum begjint it stadichoan drokker te wurden. Dat komt goed út, want op dit stuit trede de Bakhúster Heechsjongers dêr op.

Mei in repertoire fan 60 nûmers sil it koar de fytsers suver letterlik foarút blaze.

Yn Winsum kinne de dielnimmers wer oplade mei in banaantsje en in krintepofke. Der wurde fan beide 5000 útdield.

De 82-jierrige Johannes Hiemstra fytst de Alvestêdetocht hjoed foar de 58e kear. "Ik sit eltse dei op de fyts, dus dit slút moai oan."

Foar Hiemstra giet it as it slydjaget. "De temperatuer is goed en it is drûch. It giet prima, hartstikke moai."

De measte fytsers binne op dit stuit yn it súdwesten fan de provinsje. Yn Snits is it grutste part fan harren noch hiel fleurich. Mei de wyn yn de rêch giet it moai sa.

Der binne pannen fol makaroany makke om de fytsers de krêft te jaan ek it lêste stik goed troch te kommen.

Fan Starum ôf krije de fytsers nammentlik de wyn fan foaren. De earste fytsers wienen al in oere te betiid yn Starum, dêr't de stekken pas om 13.00 oere iepen gienen.

Dat de Fytsalvestêdetocht in wichtich barren is yn it libben fan in protte minsken, bewiist it ferhaal fan Janieke Kruithof.

Har heit die altyd mei oan de tocht, mar noch net sa lang lyn ferstoar hy. Om har heit te betinken, is Janieke no aktyf as stimpeler.

"We moatte it libben fiere. Hy kin it net mear meimeitsje, mar wy kinne der noch wat fan meitsje."

Janieke hat it tenu fan it team fan har heit oan. Teamgenoaten wurde hjoed ekstra bedoarn, mei kola en spekjes, want dat naam Janieke har heit ek altyd as er de tocht fytste.

De dielnimmers hawwe hjoed foar in grut part de wyn yn de rêch. Boppedat is it drûch, dus de omstannichheden lykje geunstich.

It fenyn sit him lykwols yn de sturt: fan Starum oant de finish yn Boalsert krije de fytsers de wyn fan foaren. Dochs prate de measte dielnimmers oer in relatyf maklike edysje.

De Fytsalvestêdetocht is gjin wedstriid. Dochs moatte der altyd in pear de earsten wêze. Yn Aldemardum, yn it súdwesten fan de provinsje, komme de earste groepkes yntusken troch.

As je dwaande binne oan sa'n lange tocht, dan komme der altyd mominten wêrop't it efkes wat dreger giet. Dan is it noflik dat der taskôgers by de dyk steane dy't je der trochhinne helpe, lykas as hjir yn Sint Anne:

Yn Ljouwert begjint it sa stadichoan drok te wurden. De dielnimmers helje dêr harren fjirde stimpel. Dêrnei is it wer op nei Boalsert.

Mei safolle minsken op 'en paad op de fyts giet der ek wolris wat stikken. Gelokkich binne der op ferskate punten op de rûte fytsmakkers.

Dit jier binne der njoggen mobile posten en njoggen fêste posten.

Der komt fan alles foarby: fan lekke bannen oant in skoech dy't fêst sit. Foar de fytsmakkers is it dus hurd wurkjen, mar fytsers mei maleur binne o sa bliid mei harren.

Yn Dokkum is de drokte no hast op syn hichtepunt. Al fier foar de stimpelpost moatte minsken fan de fyts. Mei it moaie waar is dat hielendal gjin probleem, de sfear is goed.

Ek Omrop-ferslachjouwer Simone Scheffer is yntusken oankaam yn Dokkum. Sy hat noch in komplimint foar it doarp Hantum:

Fierwei de measte dielnimmers ride de tocht 'gewoan' mei de racefyts. Dêrnjonken sjochst wol gauris in tandem, mar der binne ek oare, bysûndere kreaasjes.

Sa docht IJsbrandy van Popta de tocht bygelyks op de handbike. Van Popta is yntusken oankaam yn Dokkum

De Alvestêdetocht is fansels in begryp, yn Fryslân en dêrbûten. De ferzje op redens is ikoanysk, mar ek de Motor- en Fytsalvestêdetocht is tige populêr.

Yn alle gefallen giet de tocht by de alve stêden del. Dochs binne der wol rûteferskillen. Sa starte en finishe de fytsers yn Boalsert, wylst dat by it reedriden yn Ljouwert is.

De fytsers dogge nei Boalsert earst de noardlike lus. Fia Harns, Frjentsjer, Dokkum en Ljouwert komme de fytsers wer yn Boalsert út.

Dêrnei is de Súdwesthoeke oan bar. Fia Snits, Drylts en Sleat komme de fytsers oan yn Starum. Dan moatte se wer in stikje nei it Noarden. Nei Hylpen en Warkum is it op nei de finish yn Boalsert.

Yn Frjentsjer stimpelje sy ferklaaid as professoaren, dat hat te krijen mei de skiednis fan de stêd as universiteitsstêd.

Foarsitter fan de tocht Stephan Rekker seit dat der fan de 15.000 oanmelders 14.200 útein set binne hjoed.

Sa'n 3500 motorriders binne fan 'e moarn útein set. Sy begjinne en einigje net yn Boalsert mar by it WTC yn Ljouwert. "De earsten binne al yn Starum sinjalearre", fertelt foarsitter Hein Groeneveld. "Dit jier hawwe wy in oantal steden wat mear meinommen, sa as Snits, Starum, Harns en Frjentsjer, dêr geane wy trochhinne. En as klap op de fjoerpylk: Dokkum, dêr't wy deselfde rûte dogge as de fytsers. It wurdt in moai feest dêr."

Oan de tocht foar solexen en âlde brommers dogge 70 dielnimmers mei.

Om 07:19 oere kamen de earste fytsers oan yn de stêd mar sy meie noch net troch. Dielnimmers moatte wachtsje oant 8 oere foar't se in stimpel krije kinne. De Fytsalvestêdetocht is in tocht en dus gjin wedstriid. Dêrom mei de gemiddelde snelheid net heger as 25 km per oere. By Dokkum giet de stimpelpost dêrom om 8 oere pas iepen. Ek yn Boalsert en Starum hâlde de stimpelers har oan de tiid.

De fytsers binne net as iennige op de Alvestêderûte hjoed. Ek motoaren, solexen, trikes, bysûndere auto's en de minsken yn sydspannen ride de tocht elts jier. Dit jier is it foar harren sels krekt wat oars as oare jierren om't harren rûte wat mear troch de steden hinne rint. Leuk foar it publyk en goed foar de sichtberens fan de tocht, fynt Hein Groeneveld fan de Friesche Motorclub.

Wolkom yn it liveblog fan de Fytsalvestêdetocht! Omrop Fryslân folget de fytsers fan dy't yntusken úteinset binne fanút Boalsert. Ferslachjouwer Simone Scheffer fytst de tocht wer sels en nimt ús mei op de fyts.

Fan 08.00 oere oant 22.00 oere is de tocht te folgjen fia telefyzje en radio.