Sportklup Hearrenfean hâldt play-offs yn eigen hân nei lykspul tsjin PSV
Nei in spektakulêre wedstriid hat sc Hearrenfean mei 3-3 lyk spile tsjin PSV. Hearrenfean kaam mei 1-3 foar, mar koe de foarsprong net fêsthâlde.
Hearrenfean bliuwt mei it punt fan snein op it achtste plak en kin de play-offs nije wike feilichstelle yn de thúswedstriid tsjin Go Ahead Eagles.
By Hearrenfean koenen Pawel Bochniewicz en Ché Nunnely net meidwaan fanwege blessueres. Sy waarden ferfongen troch Syb van Ottele, dy't weromkaam fan in skorsing, en Simon Olsson.
Opstelling sc Hearrenfean: Mous; Van Ewijk, Bruma, Van Ottele, Köhlert; Haye, Olsson, Tahiri; Colassin, Van Hooijdonk en Sahraoui.
Sjoch hjir nei in gearfetting fan de wedstriid:
Hearrenfean stie ûnder stevige druk yn de begjinfaze. Anwar el Ghazi en Xavi Simons hienen al in goede kâns mist, doe't Ibrahim Sangaré de Eindhovenaren yn de 14e minút op foarsprong kopte: 1-0.
Ek nei de iepeningstreffer hie PSV de wedstriid folslein ûnder kontrôle, al krige Hearrenfean fia Antoine Colassin wol in earste kânske, mar doelman Walter Benítez koe de ynset fan de Belch maklik keare.
Stadichoan naam PSV wat gas werom en Hearrenfean profitearre dêr optimaal fan. PSV-ferdigener André Ramalho gie de fout yn by in lange bal en dêrtroch koe Milan van Ewijk allinnich op de keeper ôf. De rjochtsback bleau rêstich en skeat simpel de lykmakker tsjin de touwen.
Mous foarkomt nije efterstân
PSV like wekker makke troch de lykmakker. De Eindhovenaren wienen by in oerwinning wis fan it twadde plak, en dus foarronde Champions League. De druk op de Hearrenfeanferdigening naam hieltyd mear ta.
Yn de 40e minút stie it publyk al hast te jubeljen doe't Luuk de Jong op in pear meter fan de goal in frije sjitkâns krige, mar mei in fantastyske rêding hold keeper Xavier Mous Hearrenfean yn de wedstriid.
Krekt foar it skoft waard it noch moaier foar Hearrenfean. Wer wie Van Ewijk dertroch oan de rjochterkant. No joech hy in goede foarset op Colassin, dy't allinnich foar Benítez de 1-2 binnenskeat.
Colassin bringt de marzje op twa
Yn de twadde helte wie de earste mooglikheid foar Hearrenfean. Osame Saharaoui waard frijspile op de râne fan it strafskopgebiet, mar it skot fan de Noar waard noch krekt kreake troch Sangaré.
Yn de hoekskop dy't dêrop folge, wie it wol raak. De bal kaam by de twadde peal by Colassin. Dy spile trije ferdigeners fan PSV út en krôle de bal prachtich yn de hoeke: 1-3.
PSV socht dêrnei wanhopich nei doelpunten, mar eins wie Hearrenfean de gefaarlikste ploech. Sa skeat Sydney van Hooijdonk mar krekt njonken.
Der like dus net in soad oan de hân foar de Feansters, mar yn de 79e minút foel de 2-3 dochs. Luuk de Jong kopte raak út in hoekskop fan âld-Hearrenfeanspiler Joey Veerman.
Strafskop
PSV krige nei de 2-3 wer fertrouwen en de Eindhovenaren begûnen oan in echt slotoffinsyf. Yn de 84e minút krige PSV in grutte kâns om op likense hichte te kommen, want nei tuskenkomst fan de VAR joech skiedsrjochter Allard Lindhout in penalty oan PSV fanwege in oertrêding fan Jeffrey Bruma op Xavi Simons.
Simons naam de penalty sels en skeat de bal kalm binnen: 3-3.
Oan in punt hienen beide ploegen net sa folle en dus sochten likegoed PSV as Hearrenfean de oanfal. Doelpunten foelen der lykwols net mear.
Hearrenfean bliuwt troch it ferlies fan RKC Waalwijk tsjin FC Twente (0-5) de nûmer acht fan de earedivyzje. As de Friezen nije wike winne fan Go Ahead Eagles dan pleatse se harren foar de play-offs om Europeesk fuotbal.
