Dit wie de Keningsdei yn Fryslân

Foar guon begûn dizze Keningsdei behoarlik fris. Under it kleedsje op in campingstoel guod ferkeapje oan merkbesikers. Der wie ferfolgens fan alles te dwaan yn Fryslân. Bliksmite, muzikanten dy't foar gesellichheid soargen, en kanonnen yn Makkum.

Besjoch hjir hoe't Fryslân him oant no ta fermakke.

Yn Boalsert stie en stiet der in fol programma op de rol. Under oare skoutingferiening wie drok yn it spier.

Dizze bern organisearre koekhappen, spikerbroekhingjen, bûdrinnen, aairinnen en hoefizersmiten.

Ek wie der in badeinrace. Alle eksimplaren waarden foarsjoen fan in sifer en dêrnei te wetter litten. Dêrnei wie it wachtsjen wa 't syn einepykje as earste oer de finish dobbere.

Net oeral yn de provinsje draait it hjoed om oranjebitter en frijmerken.

Yn Earnewâld wurdt tradysjegetrou de Princentocht hâlden: in freonskiplik toernoai dat giet om de eare. Ek de SKS-skûtsjes fan Drachten en Langwar dogge mei.

Tegearre mei de bewenners sitte de personielsleden foar de tv. De oranjebitters en advokaatsjes ûntbrekke net.

Yn Makkum klonken fan 'e moarn neffens tradysje de kanonskûgels. Hjirmei lette Koninginnevereniging Makkum de aubade yn.

It trommel en de fleurige muzyk makke nei ferrin fan tiid plak foar it steatlike Wilhelmus. Dat betsjutte dat ek dit jier bekend makke wurdt wa't yn it doarp kroand waarden ta kening Willem Alexander en keninginne Máxima.

Nei it opfieren fan de spanning, ferskynden Koen van Bolhuis en Pietie Terpstra op it bordes om 'it folk' ta te sprekken.

De drokte fan Keningsdei komt flink op gong yn Ljouwert. Yn in grut part fan it sintrum speure minsken tusken de spultsjes fan de merk.

Kening Willem-Alexander soe it "fantastisch" fine om mei âld-reedrider Sven Kramer de Alvestêdetocht te riden. Dat seit de kening yn de podcastsearje Door de ogen van de Koning, yn in reaksje op de fraach fan Kramer oft Willem-Alexander tegearre mei him de reedrydtocht ride wol, mocht dy binnen no en tsien jier plakfine.

"Daar ben ik even stil van", is de earste reaksje fan de kening op de ynstjoerde fraach fan Kramer. "Ik zou het wel fantastisch vinden om in ieder geval met Sven samen te gaan rijden, om te kijken of we dan nog in staat zijn om een Elfstedentocht te rijden", ferfolget er.

"Dus een voorbereiding zullen we in ieder geval wel ingaan, of we dan echt rijden, dat moeten we dan even kijken", seit Willem-Alexander. Tariede kin wat de kening oanbelanget ek in kear op keunstiis.

"Het zou fantastisch zijn als we überhaupt weer een keer een Elfstedentocht krijgen, wat dat is toch wel een heel mooi evenement wat echt zo Nederland is en zo prachtig is en waar Friesland zo mooi zich kan presenteren. Ik krijg weer kippenvel van het idee dat we weer eens een Elfstedentocht krijgen." As 18-jierrige prins naam Willem-Alexander ûnder de namme W.A. van Buren yn 1986 diel oan de Alvestêdetocht.

De podcast Door de ogen van de Koning is makke ta eare fan it tsienjierrich keningskip fan Willem-Alexander. It programma is opnaam yn syn wurkkeamer yn Paleis Huis ten Bosch. Yn elke ôflevering stiet in jier fan it keningskip fan Willem-Alexander sintraal.

Laachjes klean is it devys op de frijmerk fan It Hearrenfean. De earsten sieten fannacht al klear en yn de iere moarn waarden de earste spullen al ferkocht. "Al twee knuffeltjes en een puzzel", fertelt ien fan de jonge ferkeapers.

Dy siet der al om 5.00 oere mei har sus en heit, drok op syk nei in goed plakje. Dat is goed slagge, ek al sieten de earsten der al om middernacht. "Het is wel superkoud. Ik heb even in een slaapzak gezeten om het warm te houden."

Sûnt 2019 moast it oranjekomitee fan Kollum it sûnder de besite fan de boargemaster by de aubade dwaan, mar hjoed is Johannes Kramer derby. Hy is net allinnich, want hy nimt wethâlders en riedsleden mei.

Foar Jetty Teninga fan it komitee is dat moai nijs. Oant 2019 hearde Kollum by de gemeente Kollumerlân. Dy hie Bearn Bilker as boargemaster, in echte oranjekenner. "Dy stie altyd foaroan", seit Teninga. "Dy fûn it altyd geweldich. Dus doe't de gemeente fusearre, moast hy ek ôfskied nimme."

De aubade is de start fan it keningsdeiprogramma yn Kollum. Dêrnei giet brassband Wilhelmina nei soarchsintrum Meckama State ta. Middeis is der in bradery en in spultsjemiddei foar de bern. De dei wurdt ôfsletten mei in festival yn it Wilhelminapark.

By it gearstallen fan it programma hat it komitee rekken holden mei de winsken út it doarp. "We ha in kear in enkête holden. Dus we ha ús bêst dien dat de lytskes der wat oan ha, mar de pakes en beppes ek. Wy tinke sels dat it net better kin."

Keningsdei set kâld útein mei temperatueren om it friespunt hinne. De dei ferrint fierder drûch mei yn it earste part fan de dei de measte sinne en letter yn de middei mear bewolking. It wurdt maksimaal 12 graden by in swakke wyn, dy't fan súd nei east draait.

Yn 'e jûn noch drûch en yn 'e nacht rein. De súdeastewyn wurdt stadichoan matich boppe lân en frij krêftich yn it kustgebiet.

Goeiemoarn op dizze Keningsdei! Yn dit liveblog hâlde we dy op de hichte fan alles oangeande Keningsdei yn Fryslân.

Wolst deropút mar witst noch net wêrhinne? Hjir steane wat tips foar plakken en eveneminten dêr'tst hjoed fergees hinne kinst yn Fryslân.