Nije briedflotten te wetter litten op It Amelân om fûgels te helpen
In twadde proef om wytstirnsen (visdiefjes), strânljippen (scholeksters) en noardske stirnsen (Noordse stern) oan it brieden te krijen, is freedtemiddei úteinset op It Amelân. Trije flotten mei skulpen derop binne pleatst yn de Ballumerbocht.
Driuwlichems mei houten stalten, stekwurk, skulpkes en buizen moatte derfoar soargje dat ûnder mear wytstirnsen wer yn alle rêst briede kinne op It Amelân. 25 pearkes kinne op sa'n flot briede.
Gjin rotten
Op it strân wurde se fersteurd troch minsken en op it briedgebiet bûtendyks binne der nei alle gedachten rotten dy't de fûgels fersteure. De flotten binne sa boud dat de rotten der net opklimme kinne.
Der wie al ien flot ôfrûne jier, mar dêr hawwe gjin wytstirnsen op briede. "Vorig jaar hebben er wel vogels op gehad, met name ganzen hebben we nu geconstateerd, maar er zijn geen jonge visdiefjes grootgebracht", seit Gerius van Woudenberg fan Rykswettersteat.
Dêrom binne de flotten oanpast. "Ze liggen nu op een iets andere locatie, iets in de luwte, en we hopen dat de visdieven ze dit jaar wel weten te vinden en de jongen groot brengen."
De flotten meitsje diel út fan in trijejierrich pilotprojekt. Dat it foarich jier noch net in grut sukses wurden is, is dan ek gjin soarch, fynt Van Woudenberg. "We zijn wat aan het aftasten wat wel en wat niet aanslaat. In Lauwersoog zijn soortgelijke vlotten en daar is het wel een succes. Maandag zaten daar 20 paartjes."
De Fûgelwachten Hollum en Ballum sille de flotten yn de gaten hâlde.
