Njoggen fragen: hoe wurdt de feilichheid fan de brune float yn de gaten hâlden?

Inspectie van de Leefomgeving en Transport is de tafersjochhâlder fan it ministearje fan Ynfrastruktuer en Wettersteat. De ILT hâldt yn 35 sertifisearringsstelsels tafersjoch op bedriuwen dy't feilichheidssertifikaten útjouwe. Binnen dy sektoaren wurdt sjoen oft de sertifikaten terjochte ôfjûn binne.

Ien fan dy stelsels is de binnenfeart wêr't de brune float ûnder falt. De ynspekteurs kontrolearje oft oan alle wetlike easken foldien wurdt en oft de skippers de goede dokuminten oan board ha. Dêrfoar moatte se fysyk op it skip wêze. Wat de ILT op dit stuit docht is it sjen oft skippen sûnder jildige sertifikaten net útfarre. At in sertifikaat ferrûn is kriget de eigener in skriftlike warskôging fan de ILT.

Dêrneist binne se ferantwurdlik foar de hanthavening en hâlde dus ek yn de gaten of dizze skippen sûnder sertifikaasje yn oertrêding binne fan de binnenfeartwet of net.

In silend passazjiersskip mei mear as tolve persoanen hat twa haaddokuminten nedich: it 'Certificaat van Onderzoek' en it 'Bewijs van Tuigage'. Dat binne dokuminten wêryn stiet dat it skip feilich is en dat ûnder oare de mêst, gyk en touwen yn goeie kondysje binne.

De ferantwurdlikheid leit by de eigener fan it skip. Dy moat derfoar soargje dat de sertifikaten op oarder binne. Dat hoecht dus net altyd de skipper te wêzen.

De ynspeksje kontrolearret no steksproefgewiis en risikostjoerd. De kontrôles smite foar de ynspeksje resultaat op. Alle jierren wurde skippen oan de ketting lein. Sels wolle se fleksibeler wurde troch data te brûken fan de transponders fan skippen. Fart ien út sûnder jildige papieren dan soe der in alarm ôfgean moatte.

Mochten der oertrêdingen wêze dan kin de ynspeksje in boete jaan en it skip stillizze. Dit dogge se yn gearwurking mei havens, provinsje, plysje en Rykswettersteat.

De Inspectie Leefomgeving en Transport hat yn jannewaris oanjûn dat net alles goed giet. Der binne twifels of de sertifikaten foar feilichheid en kwaliteit wol terjochte ôfjûn wurde. De ynstânsje die hjir sels ûndersyk nei. Anuschka Otten, programmamanager by de ILT sei yn de reportaazje fan Nieuwsuur: "Dat wil niet zeggen dat alles onveilig is, maar ook niet dat het 100 procent veilig is. We zien het niet goed genoeg."

Yn 2017 komt de Onderzoeksraad voor de Veiligheid (OVV) mei in rapport wêrút blykt dat de kennis fan de skippers en ûnderhâldmeiwurkers net goed genôch is. Dit skriuwt de OVV: "Uit het onderzoek blijkt dat de ILT dit zicht niet heeft voor zover het keuringen van zeilende passagiersschepen betreft. De ILT oefent de facto geen toezicht uit op de wijze van keuren van zeilende passagiersschepen, en bij het toezicht dat de ILT rechtstreeks aan boord van de schepen uitoefent worden cruciale onderdelen zoals masten niet gecontroleerd."

Der is yntusken in soad yn feroare, sa stelt de ILT sels. Der is in ekstra keuringsburo en ek wurde sûnt ein 2022 workshops organisearre mei ynspekteurs, skipstimmerbedriuwen en skippers om kennis mei mekoar te dielen. Dêrneist is de ynstânsje transparanter troch in online register te iepenjen mei dêrop skippen dy't de goede sertifikaten ha.

Troch it tekoartsjitten fan de ILT komt de ferantwurdlikheid foar feilichheid no noch mear by de skippers te lizzen, dat seit Paul van Ommen fan de Vereniging voor Beroepschartervaart. "Schepen kunnen onderling kijken of ze de juiste certificaten hebben, of een boekingskantoor kan nu kijken welke schepen goed gecertificeerd zijn. Als je niet op het lijstje staat kan het een uitnodiging zijn tot meer vragen."

Skippers binne oan de iene kant hiel tefreden oer de ILT as it giet om ynspeksjes. It is tige wichtich om goed te kontrolearjen oft de skippen yn de oarder binne. Tagelyk liket de organisaasje der net yn te slagjen om de rotte apels út de brânsj te heljen.