Renovaasje op steapel by Cambuur, Hearrenfean ticht by behâlden Nunnely

Fuotbalklups moatte de kontrakten fan spilers (mei in ôfrinnend kontrakt) foar 1 april formeel opsizze. As klups dat net dogge, kinne de spilers harren kontrakt noch opsizze foar 15 maaie. Bart dat net, dan wurdt it kontrakt automatysk mei in jier ferlinge tsjin deselde betingsten.

Technysk manager Ferry de Haan: "De jongens bij wie het contract al eens verlengd is, krijgen te horen dat hun contract wordt opgezegd. In ons geval geldt dat voor keeper Jan Bekkema, Joost van Aken en Rami Al Hajj. Maar daar hoef je nog geen conclusies aan te verbinden, we gaan op korte termijn met deze jongens in gesprek."

De transferfrije Ché Nunnely kaam nei lang blessuereleed yn de winterstop nei sc Hearrenfean. De oanfaller tekene in kontrakt foar in heal seizoen, mar wol mei de opsje om eventueel langer te bliuwen.

Ferry de Haan: "Ché wilde zich niet definitief vastleggen zonder te weten of hij hier enig perspectief heeft. Daarom hebben we de afspraak gemaakt dat bij een x-aantal wedstrijden zijn contract automatisch wordt verlengd."

De technysk manager fan de Feansters wol net sizze om hoefolle wedstriden oft it giet. Mar: "Daar zit hij al bijna op, dus kan je ervan uitgaan dat Ché hier volgend seizoen ook speelt."

Hearrenfean sil op koarte termyn om tafel mei Xavier Mous, Al Hajj en Van Aken. De kâns dat Jeffrey Bruma bliuwt, is lyts.

Ferry de Haan: "De insteek van de komst van Jeffrey was helder. Hij is gehaald als vervanger van de geblesseerde Sven van Beek. Financieel gezien is een langer verblijf ook niet haalbaar. Zo realistisch moet je zijn."

Sydney van Hooijdonk en Antoine Colassin binne hierd en geane nei dit seizoen werom nei har eigen klup. "Bij Antoine is er nog wel een koopoptie in zijn contract", seit De Haan. "Maar daar gaan we niet in mee."

De sitewaasje by SC Cambuur leit der oars by. Fiiftjin spilers hawwe in ôfrinnend kontrakt. Dêrneist binne der fjouwer hierlingen (João Virgínia, Felix Mambimbi, Mimoun Mahi en Remco Balk) dy't gewoanwei nei dit seizoen weromkeare nei harren klup.

Dat bringt it totaal op njoggentjin spilers dy't noch net witte wêr't se foar folgjend seizoen oan ta binne. Der leit in grutte opjefte foar Etiënne Reijnen, dy't nei dit seizoen begjint as technysk direkteur by de Ljouwerters.

Hy sil beslute moatte oer opsjes yn kontrakten fan ûnder oaren Maxim Gullit, Brett Minnema en Roberts Uldrikis. En oer oft de klup fierder wol mei spilers as Mitchel Paulissen, Robin Maulun en Doke Schmidt. Fan harren rinne de kontrakten ôf.

Om't Reijnen no noch assistint-trainer is by PEC Zwolle en noch net begûn is by Cambuur, wol er noch net prate oer syn wurksumheden yn Ljouwert.

De hjoeddeistige technysk manager, Foeke Booy, wol ek neat kwyt oer mei wa't de klup wol en net fierder wol. It kontrakt fan Booy wurdt net ferlinge, wêrtroch't hy gjin besluten mear nimt. "Richting de zomer neem ik geen enkele verantwoordelijkheid. Ik ga niet over mijn graf regeren."

Yn de syktocht nei ien dy't helderheid jaan kin oer de plannen fan Cambuur, komme we út by algemien direkteur Ard de Graaf. Technyske saken sitte net yn syn takepakket, mar: "Gerald van den Belt en ik zijn verantwoordelijk als directie, dus je mag van ons verwachten dat wij dat oppakken."

De Graaf wol net yngean op spilers dy't de klup behâlde wol. "We hebben die besluiten nog niet genomen, maar we zijn er wel over in gesprek. Dat zullen we eerst delen met betrokken mensen."

Dêrby krijt de direksje fan de klup wol help fan Reijnen, nettsjinsteande dat er no by PEC Zwolle wurket. "Op de achtergrond is Etiënne daar ook mee bezig", fertelt De Graaf.

By de spilers mei in ôfrinnend kontrakt sitte in soad dy't al jierren foar Cambuur spylje, sa as Mees Hoedemakers, Robin Maulun en Mitchel Paulissen. Fan Hoedemakers is al dúdlik dat hy fuortgiet nei dit seizoen.

Nei't de oerstap nei FC Utrecht ôfrûne simmer net trochgie, besleat Hoedemakers dat er kommende simmer gebrûk meitsje wol fan syn status as transferfrije spiler. Ek David Sambissa ferlit de klup nei dit seizoen. Trainer Sjors Ultee sjocht it net mei him sitten.

Fan de spilers mei in opsje yn it kontrakt leit it foech om dy te lichtsjen yn hast alle gefallen by de klup. Utsein by Jamie Jacobs. As Cambuur him hanthavenet yn de earedivyzje, wurdt syn kontrakt automatysk mei in jier ferlinge.

Der is ek in senario dat de ploech fan Ultee it net rêdt om yn de earedivyzje te bliuwen. Yn dat gefal sille der mooglik noch mear spilers fuortgean, om't se net yn de earste divyzje spylje wolle.

Wis is wol dat dêr yn de kontrakten fan spilers rekken mei hâlden is. Mocht de klup degradearje, dan sille salarissen fan spilers sakje fertelt De Graaf. "Als je dat bij een club als Cambuur niet opneemt in een contract, doe je dat niet goed. We houden met alle scenario's rekening."