FryslânDOK: Joke Folmer, boadskipfamke fan it ferset

Op har santjinde gong Joke mei húswurk lâns by har ûnderdûkte Joadske hertsfreondinne Rosette Bannet. Doe't de famylje oppakt waard, begûn Joke itensbonnen en munysje rûn te bringen. Se brocht hûnderten minsken, foaral piloaten, yn feilichheid.

Jong en koelbloedich wist Joke út hannen fan de nazi's te bliuwen, mar yn 1944 waard se arrestearre en ta de dea feroardiele.

Dochs wist Joke de deastraf te ûntrinnen. Se kaam mei in groep oare finzenen yn Dútslân telâne. By Dresden setten de Russen de doarren fan de finzenis iepen, wêrnei't Joke en de oaren nei in wikenlange foettocht yn in Amerikaansk kamp bedarren. Wurch en ferswakke berikten se befrijd Nederlân. Joke wie doe krekt 22 jier.

Joke Folmer krige de heechste ynternasjonale ûnderskiedings foar har fersetswurk, foaral foar it rêden fan alliearre piloaten. Op Skiermûntseach rjochte Joke Folmer it 4 maaie-komitee op. Sûnt dy tiid komme der hûnderten minsken by de jierlikse betinking op it Earebegraafplak Vredenhof.

Se organisearre reünys foar alliearre fleaners en harren famyljes en brocht dy yn kontakt mei de Nederlânske boargers wêrby't se ûnderdûkt sitten hiene.

Joke soarge derfoar dat der tinkstientsjes, 'Stolpersteine', lein waarden by eilanner huzen dêr't Joaden yn de oarloch wennen. Ek foar it hûs fan Rosette Bannet, de yn Auschwitz fermoarde skoalfreondinne fan Joke, is yn 2022 yn Zeist in tinkstientsje pleatst.