Liveblog
|
22 jannewaris
Groenewoud wint maraton yn Alkmaar nei help fan Schouten, Harm Visser fluchste by de manlju
Dit liveblog is ook in het Nederlands te volgen.
Bywurke: 22 jannewaris, 17:35
snein 22 jannewaris
17:34
Gjin fjirtjinde bekertitel foar Flyers
UNIS Flyers hat sneintemiddei de finale om de Nederlânske beker ferlern. Nei in golden goal-ferlinging waard it 2-1 foar HIJS Hokij út Den Haag.
16:30
LDODK ferliest fan Fortuna
De kuorballers fan LDODK hawwe fan 'e middei harren wedstriid yn de Kuorbal League tsjin Fortuna ferlern. Yn de Fortuna-hal yn Delft waard it 26-21 foar de thúsploech.
De ploech út De Gordyk en Terwispel stiet no mei alve punten út njoggen wedstriden op it fjirde plak yn de kompetysje.
16:27
Visser wint by de manlju
Ek by de manlju wie der in Fryske oerwinning yn Alkmaar. Harm Visser wûn de maraton by de manlju. De reedrider fan Jumbo-Visma wûn nei 125 rûntsjes de sprint fan fjouwer flechters, dy't it peloton op in ronde efterstân riden hiene. Remo Slotegraaf passearre as twadde de meet en Chris Huizinga waard tredde.
Sjoerd den Hertog kaam as fjirde oan en die goede saken foar it algemien klassemint. Hy naam de oranje liederstrui oer fan Jeroen Janissen, dy't de slach yn Alkmaar mist hie.
14:46
Groenewoud wint yn Alkmaar
Reedrydster Marijke Groenewoud hat de tolfde wedstriid om de Maraton Cup wûn. De rydster fan Team Albert Heijn Zaanlander wie op de iisbaan fan Alkmaar de rapste yn de einsprint fan in grutte groep. Esther Kiel (BDM-BTZ) einige as twadde. Se drukte har redens noch krekt foar Nederlânsk kampioene Irene Schouten oer de finishline.
Schouten sette har yn de foarlêste fan de tachtich ronden oan kop en luts de sprint oan. De trijefâldich olympysk kampioene op de langebaan seach goed oft har ploechgenoate Groenewoud reagearre. Dy siet yndied goed foaryn en hie ek noch in machtige einsprint yn 'e fuotten.
14:38
Hearrenfean wint derby
sc Hearrenfean hat de Noardlike derby tsjin FC Grins wûn. Yn it Abe Lenstra Stadion waard it 3-1. De Fryske doelpunten kamen op namme fan Amin Sarr (twa kear) en Pelle van Amersfoort.
13:25
Rêststân 1-1 by sc Hearrenfean-FC Grins
Yn it Abe Lenstra Stadion stiet it op it stuit 1-1. Hearrenfean kaam al yn de fjirde minút op foarsprong troch in doelpunt fan Amin Sarr. Flak foar it skoft kaam Grins werom. Florian Krüger skeat de bal yn de 40e minút yn it doel fan Andries Noppert.
Beide ploegen steane yntusken wer op it fjild foar de twadde helte.
sneon 21 jannewaris
23:53
Ultee easket mear folwoeksenens
Cambuurtrainer Sjors Ultee hie sneon in frustrearjende jûn. Hy seach syn ploech mei 0-3 ferliezen fan Sparta Rotterdam. Cambuur moat benammen folwoeksener wurde, want it fuotbal wie net iens sa min, fûn hy.
