Klanken by in útfeart: "Hieltyd faker livemuzyk yn stee fan in mp3'ke"

In soad sjogge it as takomstmuzyk. De klanken dy't troch de romte klinke by de eigen útfeart. Boppedat kin it in ferfelend gefoel jaan, alfêst neitinke oer dizze nûmers. De gasten by Noardewyn sjogge lykwols in foarsichtige feroaring.

Hieltyd mear minsken fine it neffens harren makliker om dit ûnderwerp oan te snijen. Boppedat sjogge sy in ferskil yn hoe't de muzyk hearre litten wurdt.

Peter Krako is muzikant en rjochte mei syn frou Aisha in bedriuw op dat de muzyk by útfearten fersoarget. Hjirfoar pakt er sels de gitaar op.

"We besykje mei Memories Uitvaartmuziek de brêge nei de minsken ta wat koarter te meitsjen", seit er. It soart muzyk rint bot útinoar. Fan in strykkwartet oant gospel, en fan in sjonger-gitarist oant in jazztrio.

"Je hearre soms dat minsken achterôf sizze dat livemuzyk harren moai like yn in tsjinst. Dêrom besykje ik dit mear ûnder de oandacht te bringen. It makliker foar minsken te meitsjen", seit Krako, dy't de kar foar livemuzyk goed begripe kin. "De belibbing is dochs hiel oars as datst in mp3'ke ôfspilest."

Krako spile, foar't er it bedriuw mei syn frou opstarte, ûnder syn eigen namme. Doe't er op in dei wer frege waard, besleat it stel om tegearre in ûndernimming te begjinnen." Dat woene we altyd al, omdat we goed gearwurkje kinne. Peter docht de muzyk en ik de saken deromhinne."

"Je krije dan fansels te meitsjen mei fertrietlike situaasjes. Mar it is moai dat je wat betsjutte kinne foar ien. Dat makket it tankber en betsjuttingsfol wurk. We dogge dit dan ek mei in soad passy."

Neffens Krako wurdt de muzyk hieltyd minder fia in cd of as mp3 ôfspile. "Dat komt omdat minsken faker trochkrije wat de mooglikheden binne wat livemuzyk oanbelanget. Kinst it by ús gewoan út hannen jaan. Dat makket it ek leechdrompeliger."

Aisha seit dat in kampanje fan SIRE yn febrewaris holpen hat de dea besprekberder te meitsjen. "Sa kinst by libben alfêst beprate oft ien bygelyks begroeven of kremearre wurde wol. Dan wit de famylje dat se it op dy wize goed dogge."

It stel wurdt hieltyd faker kontaktearre troch de famylje sels, en dus net troch de útfeartbegelieder. "Dat makket it fansels oars. Folle persoanliker", seit Aisha, dy't sels ek al neitocht hat oer har útfeartmuzyk. "'Winter' fan Vivaldi. Mei in moai strykorkest, en as it heal kin in ballerina derby."

Ek Frederike Kleefstra treedt op by dizze Noardewyn. Har nûmer 'Grutte grize fûgel' soe nei it útbringen in soad ôfspile wurde by kremaasjes en begraffenissen. "Ik fûn de tekst, skreaun troch Jan Visser, yn in dichtbondel. Dêr bin ik mei oan 'e slach gien en frege Peter van der Zwaag der muzyk by te meitsjen."

Yn 1988 brocht Kleefstra it nûmer út en sûnt dy tiid is it, mei troch útfearten, yn libben holden.

"Ik haw it ek wolris live spile by in begraffenis. Dat wie by dy fan myn eigen mem. Dy hie my frege om dat te dwaan. It is hiel spesjaal as je dat frege wurde, en sa famylje en dierberen treast biede kinne."

Ek te gast is Iede Hoorn. Dy't nei syn wurk as steward, útfeartfersoarger waard. Fan loftfeart nei útfeart dus. In freondinne fan de famylje frege him om ris mei te rinnen, sadat er ûnderfine koe wat er fûn fan de útfeartwrâld.

It die bliken dat dit in goede set wie. "Ik fûn it geweldich. Sa moai wat sy die. Al gau gie ik nei in seleksjedei, om nei in pear moannen myn baan as steward op te sizzen en my te rjochtsjen op neibesteanden fan ferstoarnen."

"It is alle kearen hiel bysûnder om earne oan te beljen en net te witten wa't iepen docht en wat de situaasje achter dy doar is. Boppedat bist wiken ûnderdiel fan it proses om ien de lêste eare te bewizen. Se fertrouwe dy ta om der in weardich ôfskied fan te meitsjen. Dat makket it in geweldich fak", seit Hoorn.

"Ja, dit bliuw ik dwaan oant ik der sels by delfal."