De toan fan Jan Koops: "Kompremis"

Jan Koops © Omrop Fryslân
"Preken veur eigen perochie, dat was wat de SGP, de ChristenUnie en et CDA deden in de Twiede Kaemer. Die perti'jen maeken heur grote zörgen over et betaelber holen van monementaole karkgebouwen in Nederlaand.
De priezen veur gas en elektrisch bin zo hoge wodden dat de karkbesturen hier en daore al besleuten hebben om karken te sluten en op een eer plak de erediensten te holen. De Protestaanse Gemiente van Oosterwoolde karkt in de grote vergaederzael en ok in de grote Maartenskarke in Kollum bin in elk geval tot 1 meie gien karkdiensten meer. En zo is et op vule meer plakken et geval.
De drie nuumde perti'jen in de Twiede Kaemer vienen dat et kammenet geld lappen moet om de karken eupen holen te kunnen. Ommers de monementaole orgels en keunst in die karken verdregen de koolde en de klammighied niet.
De toan fan Jan Koops
Et is vanzels niet veur niks dat et veural de heurzels 'christelik' numende perti'jen binnen die dit inbrengen. Wekeliks zitten in die oolde karken ommers aorig wat meensken waorvan een groot pat op die perti'jen stemd het. En die meensken willen de dienst mitmaeken - niet vanuut de luie stoel thuus, mit een bak koffie en een stok koeke - mar in de hadde en bi'jtieden wat ongemakkelike karkebaanken.
En dat kan ik mi'j hiel goed indaenken. Zels vien ik et luusteren naor een dienst op de radio ok mar niks. En dat gelt ok de tillevisiediensten.
Et is vanzels een uutkomst veur meensken die nóg oolder binnen as ikke of die om ere reden an huus bunnen binnen. Zi'j kun dan temeensen nog wát mitkriegen van et karkelik leven.
Mar ik hebbe die hadde karkebaanken, et gewelf en de meensken om mi'j henne neudig om et gevuul te hebben een karkdienst mit te maeken. En ik bin thuus ok vuse te vlogge ofleided.
Zoe'n karkdienst is veur mi'j tóch een speciaol mement in de weke waordeur ik de drokte van alledag even loslaoten kan om mi'j in alle rust over te geven op dat wat komt. En of et now een preek is, een liet of een gebed of gedichien, altied bin d'r wel elementen die mi'j raeken en inspireren.
En ik kan mien kleraosie anpassen an de koolde.
Mar toch, veur al die karken zol et vanzels hiel mooi wezen as die wat geld van de overhied kriegen zollen om eupen blieven te kunnen, al was et alliend mar veur de karkdiensten of et behoold van orgels en keunst in die karken.
Toegelieke hawwe disse weke nog die aandere vraoge die op taofel kwam: Zol et niet beter wezen de voetbalwedstrieden van de eredivisie te speulen zonder pebliek?
Deur al et gedonder om die wedstrieden henne is d'r zovule pelisie neudig dawwe amper nog blauw op straote zien. D'r zollen miljoenen extra kommen moeten veur meer pelisie omreden d'r vusen te vule meensken inzet wodden moeten bi'j die wedstrieden.
Doe docht ik: zowwe die beide preblemen niet in ien keer oplossen kunnen?
De voetbalsupporters volgen van now of de wedstrieden vanof de baanke thuus mit een bak koffie en een stok koeke of, now ja, een pilsien en een kreket mag ok vanzels en et geld dat daordeur bespeerd wodt komt in een foons veur monementaole karkgebouwen die te lieden hebben onder de hoge energiekosten.
How es even, heur ik pattie meensken al zeggen, how es even; veur jow mag dan een karkdienst een rustmement in de weke wezen waorbi'j ie jow even weer oplaeden kunnen, mar veur aanderen is dat juust die wedstried van heur kluppien op zaoterdagaovend of zundagmiddag in héúr karke: et stadion. Dat meug ie heur niet ofpakken!
Now zol ik die meensken vraogen kunnen hoevule pelisie d'r eins neudig is om karkdiensten holen te kunnen, mar dat is vaeks wat flauw.
Daoromme mar een tussenveurstel: Om de weke doen de kaorties veur wedstrieden tien keer de gebrukelike pries. En dat extra geld gaot naor de pelisie. En om de weke geven de karkmeensken extra om de stookkosten ophoesten te kunnen.
Ik stemme gien D66, mar dit zol de perti'j van et redelik alternetief toch anspreken moeten, donkt mi'j."