'Teelt himp, tuorrebouten of reid foar de bousektor nimt grutte flecht'

Dat die bliken op in gearkomste yn it Biosintrum yn Easterwâlde dêr't de boereteelt foar de bou sintraal stie.

Oer it fertsjinmodel binne noch wol wat fragen, mar dêr wurdt hurd oan wurke. De ferskate gewaaksen lizze in soad CO2 fêst. As dêr in goede fergoeding tsjinoerstiet, kin dat de ferbou oantreklik meitsje foar de boer.

Neffens Loraine Westernering fan Greeninclusive is it bygelyks fan grut belang dat de teelt fan fezelhimp takom jier opnaam wurdt yn it GLB, it Gemeenschappelijk Landbouw Beleid fan de oerheid. "Dat maakt het financieel ook interessant voor de agrarische sector."

Greeninclusive produsearret himp op 200 bunder lân en hopet de kommende jierren troch te groeien nei 600 bunder. Ek binne der noch altyd petearen geande mei de oerheid oer de bou fan in himpferwurkjende fabryk yn Fryslân.

Boubedriuw Dijkstra Draisma stribbet nei hûndert bunder lân foar de oanbou fan tuorrebouten. Dêrmei kin it bedriuw de hûzen dy't produsearre wurde yn it fabryk yn Dokkum folslein fan isolaasje foarsjen. Coen Verboom tinkt dat dat oerflak yn de kommende jierren helber is.

Jan Hania, boer yn Westergeast, docht mei oan in eksperimint mei de teelt fan tuorrebouten op syn lân yn it feangreidegebiet. "As je tichtby in natoergebiet sitte en je kinne of meie troch regeljouwing net mear buorkje, dan sil dit miskien in alternatyf wêze kinne", seit Hania.

Boer Jan Pieter van der Plaats fan Warkum ferbout dit jier foar de twadde kear op rige himp op syn pleats as wikselgewaaks. Hy is tige posityf oer it gewaaks sels. "Je hoeft er eigenlijk niks aan te doen. Het groeit vanzelf."

Wol tinkt er dat de fergoeding noch wat omheech moat om de teelt echt oantreklik te meitsjen. "Ik denk dat de prijs dan nog een keer over de kop moet", seit er.