Froulju sc Hearrenfean winne fan Feyenoord | Kalma skoart fjouwer kear tsjin Excelsior

De iishockeyers fan de UNIS Flyers ha maklik wûn fan de Chiefs út Leuven. Yn Thialf waard it 4-0.

De earste perioade einige yn 2-0. It wiene respektyflik Wessel Copier en Roope Nikkila dy't in goal meitsje koene, nei assists fan Floris Elten en Tom Speel. Yn de perioade dêrnei koene de Flyers dêr troch in doelpunt fan Mike Collard noch in punt oan taheakje.

De iishockers fan Leuven sieten de ploech fan It Hearrenfean amper dwers, want ek yn de tredde perioade folge der gjin tsjingoal. Wol slagge it Nikkila dizze kear sels om te skoaren, nei in assist fia Floris Elten en Mike Collard.

Mei 2-0, 1-0 en 1-0 kamen de Flyers úteinlik op in einskoare fan 4-0. Dêrtroch steane de Flyers no twadde yn de BeNe-League, achter de Bulldogs út Luik.

De kuorballers fan LDODK winne mei 18-23 fan KZ yn Koog aan de Zaan.

LDODK moast it dwaan sûnder topspiler Erwin Zwart. Dy foel foarige wike út mei in blessuere. Neffens LDODK is it minder slim as it doe like, mar it sjocht der wol nei út dat Zwart dit jier net mear yn aksje komt.

Marit Bouwmeester stiet oant no ta op it sechsde plak by it Europeesk Kampioenskip silen yn de ILCA-klasse. Earder wie dy klasse bekend as de Laser-klasse. It kampioenskip duorret noch oant-en-mei moandei.

Bouwmeester hat der in skoftke út west, omdat se in poppe krigen hat. Se is tige tankber dat se mem wêze kin, en topsporter. "Mei ús Jessie giet it poerbêst. Dy is no in heal jier âld, en se docht it geweldich. We ha in protte lol mei har."

In moanne lyn makke se har come-back op it wrâldkampioenskip. Dat kampioenskip, en it Europeesk Kampioenskip fan no yn Frankryk, sjocht se benammen as training, seit se. "We brûke de kampioenskippen om wer te racen. Om wedstriden te dwaan. It WK en it EK wiene tafallich de earste wedstriden."

"Op dit EK wolle we sjen wêr't we steane, en wêr't we oan wurkje moatte dizze winter."

Reedrider Gary Hekman wint de marathon yn Haarlem, dêr't klassemintslieder Harm Visser net by wie. De bêste Fries is Ronald Kruijer fan Donkerbroek. Hy komt as fyfde oer de finish.

Kruijer rydt foar it team Bouwselect/Bouwpartners.

By de froulju wûn Paulien Verhaar. Maaike Verweij waard twadde, mar nimt wol de lieding yn it klassemint oer fan Irene Schouten. Dy wie der dit wykein net, se hat keazen foar de wrâldbekerwedstriden yn Thialf. Dêr wûn se freed de massastart.

De follybalfroulju fan Friso Snits ha de thúswedstriid tsjin Eurosped maklik wûn. Yn de Snitser sporthal waard it 3-0.

De earstfolgjende wedstriid foar de Snitser follybalfroulju is snein 27 novimber, tsjin ARBO Rotterdam/FAST yn Gennep.

Klassemintslieder Harm Visser fan De Westereen ferskynt jûn yn Haarlem net op it iis foar de start fan de maraton. Foarige wike krige Visser in giele kaart.

Foar Visser wie it de twadde giele kaart yn 12 moannen tiid, en dêrtroch is er automatysk skorst. Yn it klassemint hat Visser in foarsprong fan 15,9 punten op Bart Swings (IKO), 18,9 punten op Bart Hoolwerf (Reggeborgh) en 21 punten op Jordy Harink (Royal A-ware).

Om 20:15 begjinne de mannen oan de fyfde maraton fan it seizoen. De froulju binne om 19:00 oere al úteinset.

De Fryske winners fan de teamsprint sille it goud jûn wol even fiere, mar net mei sjampanje. Moarn is der wer in dei, en dan steane Femke Kok, Marrit Fledderus en Michelle de Jong opnij oan de start by de wrâldbekerwedstriden yn Thialf.

Kwark en tee, dêr moatte se it mei dwaan. "Miskien wol lekker munttee", seit Femke Kok.

It folsleine petear mei de froulju is te sjen yn dit artikel:

Femke Kok, Marrit Fledderus en Michelle de Jong binne 'superbliid' mei de winst op de teamsprint. Dat sizze se nei ôfrin tsjin de NOS. "We traine alle dagen mei mekoar, dan is sa'n beleaning supermoai", seit Femke Kok. De trije froulju ride by deselde ploech.

Je kinne sizze dat de teamsprint it minst belangryk is fan de wrâldbekerwedstriden: it ûnderdiel is net Olympysk. As it oan de trije Fryske winners leit, feroaret dat. "Dat soe hiel moai wêze", seit Kok.

De oare froulju slute har dêr by oan. Se fine it hiel moai dat se no mei mekoar ride koene, al soe dat ten koste gien wêze fan de 500 meter. Normaalwei wurdt dy ôfstân twa kear ferriden yn in wykein. No ien kear.

Skande, sizze de froulju, dy't alletrije ek útkomme op dy 500 meter. As se kieze moatte, ride se leaver twa kear 500 meter, as ien kear 500 en ien kear de teamsprint, sizze se. Soe dat dan dochs wat mei dy Olympyske status te krijen ha?

Femke Kok, Marrit Fledderus en Michelle de Jong ha goud wûn yn de teamsprint, yn in tiid fan 1.26,57. Kanada en Poalen kamen dêr yn de lêste rit net mear oan.

Op de teamsprint wurde der trije rûntsjes riden en nei elts rûntsje sprint der ien ôf. De Jong starte op kop, Fledderus naam it oer nei it earste rûntsje, en Kok makke it ôf.

Stiet Andries Noppert moandei yn de basis, tsjin Senegal, of net? Trainer Louis van Gaal moat it no wol witte. Hjoed trainde it Nederlânsk alvetal yn Katar achter sletten doarren. Moarn is der noch in lytse training, mar dêr sil Van Gaal syn miening net mear feroarje, sa is de ferwachting.

In wike lyn sei Van Gaal noch dat Noppert as iennige fan de trije doelmannen yn foarm is. As hy spilet, soe er de tredde Fries wêze dy't foar it Nederlânsk alvetal útkomt op in WK. Allinne Theo de Jong en Piet Wildschut gongen him foar, beide yn de jierren '70.

By de training fan tongersdei stie Noppert opsteld yn in team dêr't in protte spilers yn sieten fan wa't oannaam wurdt dat se yn de basis steane. Mar oft dat wat seit, is net dúdlik. Van Gaal hâldt de kaarten tsjin it boarst.

Noppert is 28 jier âld. Hy makke dizze simmer de oerstap fan Go Ahead Eagles nei sc Hearrenfean. Twa jier lyn stie er noch by FC Dordrecht ûnder kontrakt.

De oare keepers yn Katar binne Remko Pasveer, Justin Bijlow. Pasveer stie de ôfrûne twa ynterlânwedstriden yn de goal by Oranje, mar hy wie de ôfrûne moannen net sûnder flaters by Ajax. Bijlow makke yn syn lêste duels by Feyenoord wol in goeie yndruk.

Jorrit Bergsma koe gjin potten brekke op de 5 kilometer yn de wrâldbekerwedstriden yn Thialf. Hy einige op in tolfde plak, yn in tiid fan 6.17,99.

Om't er ferline wike net meidie by de earste wrâldbekerwedstriid yn Stavanger, ried Bergsma al yn de earste rit.

Harkemase Boys hat de kompetysjewedstriid tsjin Sparta Nijkerk net wûn. Lang stie it 2-1 yn it foardiel fan de Harkiten, mar yn de slotfaze kaam Nijkerk op likense hichte.

De Fryske doelpunten kamen op namme fan Jhurrey Margaritha, dy't in lepe bal oer de keeper skeat, en Berwout Beimers, dy't skoarde fanút in korner.

"Er was ook een beetje pech bij, met onderkant-lat en binnenkant-paal, maar eigenlijk hadden we wel de 1-3 moeten maken", sei trainer Jan de Jonge fan Harkemase Boys. Hy kin wol libje mei in punt.

De fuotballers fan VV Bûtenpost ha in punt oerholden oan de wedstriid tsjin HZVV út Hoogeveen. It waard 1-1 op sportpark De Swadde.

It Fryske doelpunt kaam op namme fan Sam Wormmeester. It wie de lykmakker, nei ien helte stiene de Hoogeveeners op in 1-0 foarsprong.

Trainer Willem Brouwer is tefreden. "1-1 is in terjochte stân, as je nei de wedstriid sjogge. Dit jout ús moed foar de kommende wiken." Der binne noch trije wedstriden oant de winterstop.

Antoinette Rijpma-De Jong is hiel bliid mei har gouden medalje, seit se. "Dit is hoe't it wêze moat. Ik bin der hiel bliid mei dat it der hjir op Thialf út komt."

Rijpma-De Jong hie noch noait earder goud pakt op de 1500 meter yn in wrâldbekerwedstriid. "Eindelijk", seit se. "De perfekte race bestiet net, mar dizze komt wol yn de buert."

"Juster baalde ik noch, doe gie it net hurd genôch. No hie ik trije flakke rûntsjes. Ik bin der noch hieltyd!"

Antoinette Rijpma-De Jong hat goud wûn op de 1500 meter by de wrâldbekerwedstriden yn Thialf. Se sette in tiid del fan 1.53,73.

Marijke Groenewoud pakt yn de lêste rit de brûnzen medalje, yn in tiid fan 1.54.64.

Yn dit liveblog folgje we de sport fan saterdei 19 novimber.