Gemeente Eaststellingwerf dielt bonnen foar klean en skuon út tsjin earmoed

In oare bon © ANP
De gemeente Eaststellingwerf jout ynwenners bonnen foar klean en skuon. It giet om stipe foar minsken mei lege ynkommens mei bern ûnder de 17 jier. Der is 150 euro it bern beskikber.
It is net foar it earst dat de gemeente bonnen oan ynwenners útdielt. In ferskil is dat der no gjin 75 euro foar klean en 75 euro foar skuon beskikber is, de 150 euro kin dit jier sels ferdield wurde en dus ek brûkt wurde foar allinnich klean of allinnich skuon.
Boppedat komme mear minsken yn oanmerking foar de bonnen. "Dit jaar verhogen we de inkomensgrens voor het aanvragen van de bonnen van 110 procent naar 130 procent van de bijstandsnorm", seit wethâlder Esther Verhagen.

Lokale ûndernimmers

De bonnen kinne brûkt wurde by lokale ûndernimmers. Dy ûndernimmers kinne de bonnen dan wer deklarearje by de gemeente. "Het mes snijdt hier aan twee kanten. Inwoners kunnen dicht bij huis winkelen en ondernemers hebben weer wat extra inkomsten", seit Verhagen.
Minsken dy't in útkearing ûntfange krije de bonnen automatysk, oare ynwenners kinne de bonnen fan 15 oktober ôf oanfreegje.