Enerzjybedriuwen platbelle mei fragen oer hege enerzjyprizen
Enerzjybedriuwen wurde platbelle troch minsken dy't fragen ha oer it nije enerzjyplafond. Der is noch in hiel soad ûndúdlikheid oer wat de konsumint kwyt is oan gas en stroom.
Premier Mark Rutte sei tongersdei yn de Twadde Keamer dat mear as de helte fan de Nederlanners profitearje sil fan it priisplafond.
Fierder útwurkje
Se betelje net mear as 290 euro yn de moanne foar stroom en gas. Dat is basearre op gemiddeld gebrûk wêrby't de prizen fan foar it útbrekken fan de oarloch yn Oekraïne hantearre wurde. Wa't mear brûkt as 1.200 kubike meter gas en 2.400 kwH stroom yn it jier, betellet dêrfoar de merkpriis fan dat momint.
Neffens de Consumentenbond moat it plan noch fierder útwurke wurde: "Het huidige voorstel doet niets voor de huishoudens die op het warmtenet zijn aangesloten of elektrisch verwarmen."
'Unbegryplik'
Ek minsken dy't in djoere waarmtepomp oanskaft ha, 'hebben het nakijken', seit direkteur Sandra Molenaar fan de Consumentenbond. "Wij vinden het een onbegrijpelijke keuze van het kabinet om vooral de gasprijs te drukken, maar de prijs voor stroom veel minder", seit Molenaar.
"Consumenten die fors hebben geïnvesteerd in bijvoorbeeld een (hybride) warmtepomp zijn hiervan de dupe. Voor hen is het straks goedkoper om de warmtepomp uit te zetten en weer op gas te stoken. Dat is niet uit te leggen."
Drokte yn callcenters
Wa't fragen hat oer it ferbrûk fan stroom en gas, hinget soms oeren oan de telefoan by de enerzjybedriuwen. Om dêr wat oan te dwaan, nimt it bedriuw Vattenfall 200 meiwurkers ekstra oan foar de callcenters wêrûnder dy yn Ljouwert.
Neffens in wurdfierder is it tal telefoantsjes de lêste seis wiken ferdûbele. "De meeste mensen bellen over hun maandbedrag, wat de impact is van de stijgende tarieven op hun contract en van het aangekondigde pakket aan steunmaatregelen."
Priisferhegingen
Yntusken wurdt de enerzjy foar de konsumint djoerder. Hjoed makken Essent en Eneco bekend dat de tariven per 1 oktober omheech geane. Sa betellet de klant fan Essent aanst 30 persint mear foar gas en 50 persint foar stroom.
Vattenfall hie al earder in priisferheging oankundige. De Consumentenbond ferwachtet dat de enerzjybedriuwen it noch drokker krije mei fragen fan klanten. "Ik hoop dat ze snel kunnen worden geholpen."
