De Vos wint IFKS De Lemmer, mar de échte spanning sit yn de klassemintstop

Der waard in olympyske baan syld. Dat wie earder op de dei noch ûnwis om't der net al te folle wyn stie, mar dy helle wer wat oan.

Jeroen de Vos hie mei de Eelkje II in magistrale start: hy kaam mei gong oer de midden wei, it startskot hie gjin tel letter wêze moatten. Dêrefter folgen de Redbad fan Wietse Bandstra en yn de útskiten wyn dêrfan It Doarp Eastermar fan Geale Tadema. Sikke Heerschop moast op syn beurt op De Vos wachtsje.

De Sterke Jerke fan Pieter-Jilles Tjoelker keas in rûte efter it fjild oer stjoerboard. It kaam op in achtste plak te lizzen en lei dêrmei dochs twa plakjes foar de klassemintskonkurrint Sikke Heerschop.

Bandstra en Heerschop, de nûmers trije en ien yn it klassemint, kamen as twadde en tredde om de earste tonne.

Wa't goede saken die, wie Wietse Bandstra. Hy sylde de Redbad in oare kant út en gie earder troch de wyn. Trochdat er út in oare hoeke kaam hie er foardiel by de ûnderste tonne. De Vos kaam dêrtroch twadde te lizzen, folge troch It Doarp Eastermar en Us Heit fan Wytse Heerschop.

De Redbad kaam prachtich op gong en lei trije skûtsjelingten foar Jeroen de Vos. Wylst de oare skûtsjes oaninoar hongen as kladden, koe Bandstra frij de kopposysje pakke.

Yn it foardewynse rak wie it lykwols de Redbad wer dy't foar de Eelkje II krûpte, troch rjocht te stjoeren. Dat betsjutte dat De Vos yn it krúsrak wer syn bêst dwaan moast. En dêrmei waard de top fan it klassemint bot oan it rekkenjen set, want ynienen wie it Wietse Bandstra mei de Redbad dy't firtueel op ien stean soe yn it klassemint.

Hartman Witteveen sylde mei Freonskip hielendal efteroan, sa't hy eins de hiele wike al die. De skûtsjes yn it middenfjild skoden byinoar.

Nei in oere silen lei de Redbad noch krekt earste, folge troch Eelkje II, Us Heit, Eeltje Baas en It Doarp Eastermar. De Sterke Jerke fan Tjoelker sakke stadichoan wat nei it midden.

Dêrnei naam Jeroen de Vos it wer oer, wêrtroch't Wietse Bandstra wer twadde kaam te lizzen. Wytse Heerschop gie mei Us Heit earst in loefduel oan mei de Redbad en dêrnei mei de Eeltje Baas.

Nei De Vos, Bandstra, Heerschot en Kuperus folgen Geale Tadema, Sikke Heerschop, Ulbe Zwaga, Sijmen Kalsbeek, Floriaan Zwart, Jaap Hofstee, Tony Brundel en Arjen de Jong. Pieter-Jilles Tjoelker wie yntusken ôfsakke nei in 13e plak, allinnich noch folge troch Sietse Broersma, Froukje Osinga en Hartman Witteveen.

Om 15.45 hinne waard de finish der yn lein. Jeroen de Vos krige in geunstige wyn en de Redbad draaide mei him mei. Dêrtroch koe De Vos de deiwinst yn de bûse stekke.

"Machtig mooi", seit Jeroen de Vos. "We hadden er vertrouwen in dat we een goede uitslag konden behalen, maar het wilde gewoon nog niet."

De Vos ferklearre dat er benammen lêst hie fan Us Heit. "Wytse Heerschop ging de strijd met ons aan, hij dekte ons iedere keer af waardoor de Redbad lekker vrij kon zeilen."

By ien fan de tonnen wie mei Bandstra de ôfspraak makke gewoan troch te silen. "We hebben gezegd: laten we niet de strijd met elkaar aangaan. Want hij gaat voor het podium. Dus we hebben hem laten gaan en zijn met Wytse Heerschop de strijd aangegaan. Heerschop ging later fel in de aanval met Wietse Bandstra, dat gaf ons weer wat lucht."

Sikke Heerschop is mei de Ingelskman klasseminstlieder, mar noch wol nipt. "Ik hie it leaver oars sjoen, dy spanning. Ik tink dat ik aanst mar nei de apoteek moat foar wat falium, ik moat om it hert tinke."

Heerschop stiet op 16,9 punten, Wietse Bandstra op 18 punten en Pieter-Jilles Tjoelker mei 18,9 punten. "Spannender as dat kinne je it net meitsje, noch trije kandidaten. Dat is foar it publyk machtich moai. Foar ús minder, dat wurdt senuwen en min sliepe."

Hille Wichers sylde mei Tiid sil't leare nei it earste plak yn de lytse-A. As twadde kaam Sander Meeter mei de Vriendschap oer de streek, folge troch De Reuzen fan Andries Brouwer.

De dei-oerwinning yn de B-klasse wie ferrassend in proai foar Tim Roosgeurius mei Wâldwiif. Skipper Bas Krom en de Verwisseling waarden twadde en it skûtsje Hoop op Zegen fan Mark de Koe waard tredde. Daan van der Meer fan Westenwind hie freed in wat mindere dei en waard sânde, mar hy giet noch wol rom oan de lieding yn it klassemint.

Yn de C-klasse gie de oerwinning op De Lemmer nei Jelle Los mei Grutte Pier. Frije Fûgel fan skipper Jeroen Mous waard twadde en it tredde plak gie nei Olphert van der Pol mei Ebenhaëzer. Age Bandstra mei Frya Fresena, dy't freed fjirde waard, giet oan de lieding yn it klassemint.