Langwar wint skûtsjesilen by Terherne
Langwar mei skipper Harmen Brouwer hat de fjirde wedstriid fan it SKS-kampioenskip 2022 wûn. De Lemmer waard twadde en Earnewâld einige op it tredde plak.
In wie woansdei in moaie silerij op de Snitser Mar, mei romte foar praktysk ynsjoch, want kiest de skipper foar de iene tonne of foar de oare? It wie ek in wedstriid fan 'stuorke wikseljen'. De skûtsjes wikselen inoar hieltyd ôf wat de posysjes oanbelanget.
Drachten kaam as earste nei it startskot oer de startline. Skipper Jeroen Pietersma hâlde de foarsprong fol oant de hege tonne. Nei sawat in healoere lei Drachten noch altyd op kop en wiene se de earsten dy't om de boppewynse tonne hinne kamen.
Mar Drachten koe de kopposysje net folhâlde. Nei sawat trije kertier naam De Lemmer it oer. Dêrnei lei skipper Albert Visser fan De Lemmer lange tiid op kop.
Dochs wie it Langwar dy't op it lêste momint it earste plak pakte. "Wat is dit machtich moai. Hjir hawwe wy trije jier foar wurke. It skipke docht it sa moai", sei de jonge skipper Harmen Brouwer flak nei de finish mei triennen yn de eagen.
De útslach fan de wedstriid by Terherne
Nûmer | Skûtsje | Punten |
1 Langwar | De Jonge Jan | 0,9 |
2 De Lemmer | Lemster Skûtsje | 2 |
3 Earnewâld | Twee Gebroeders | 3 |
4 Huzum | It Doarp Huzum | 4 |
5 Drachten | Twee Gebroeders | 5 |
6 Grou | Doarp Grou | 6 |
7 It Hearrenfean | Gerben van Manen | 7 |
8 Drachten Heale Moanne | d'Halve Maen | 8 |
9 Snits | De Sneker Pan | 9 |
10 De Jouwer | Oeral Thús | 10 |
11 Starum | Súdwesthoek | 11 |
12 Ljouwert | Rienk Ulbesz | 12 |
13 Akkrum | Eildert Sietez | 13 |
14 Wâldsein | Klaas van der Meulen | 14 |
Mei dizze útslach giet De Lemmer oan de lieding yn it klassemint. Earnewâld en Grou binne de nûmers twa en trije.
It klassemint nei fjouwer wedstriden
Nûmer | Punten | Oflûk |
1 De Lemmer | 6 | 3 |
2 Earnewâld | 8 | 7 |
3 Grou | 10,9 | 9 |
4 It Hearrenfean | 12.9 | 10 |
5 Langwar | 15,9 | 12 |
6 Snits | 17 | 10 |
7 Ljouwert | 18 | 12 |
8 Huzum | 19 | 14 |
9 De Jouwer | 19,9 | 14 |
10 Drachten | 22 | 12 |
11 Wâldsein | 28 | 14 |
12 Heale Moanne | 29 | 14 |
13 Starum | 29 | 13 |
14 Akkrum | 30 | 13 |
De wedstriden fan de SKS binne twa wiken lang streekrjocht te folgjen by Omrop Fryslân op telefyzje en online fia dizze link. De útstjoering set alle dagen om 13.45 oere útein mei in foarbeskôging. Om 14.10 oere klinkt it startskot.
Mear ynformaasje oer it skûtsjesilen is te finen op ús dossierside. Sjoch hjir foar alle útslaggen en klasseminten.