Liveblog | 21 maaie

Sportblog: Bergsma, Drent en Zijlstra winne yn Wommels

Yn dit blog hâlde we jo op de hichte fan de lêste ûntwikkelingen oangeande de sport yn Fryslân.

Hjoed folgje we dizze wedstriden:

  • It haadklassekeatsen foar manlju yn Wommels
  • De W series yn Barcelona mei Beitske Visser
  • De wedstriid yn de tredde divyzje fan it amateurfuotbal tusken Sparta Nijkerk en Harkemase Boys
  • KCC - LDODK yn de eareklasse fan it fjildkuorbal
  • It fierljeppen fan de earste klasse yn Winsum
Bywurke: 21 maaie, 21:35
sneon 21 maaie
21:31

Oane Galama wint ljepperij

Yn de finale hold de 19,20 meter fan Oane Galama stân. Sterker noch: yn syn lêste sprong die hy der noch in skepke boppe-op (19,89 meter). By de froulju ferbettere Marrit van der Wal yn de finale de ôfstân fan Tessa Kramer. Sa pakte Van der Wal de oerwinning en waard Kramer twadde.
Yn de oare kategoryen wienen Wisse Broekstra, Douwe Franke Westra en Sanne Bouwstra de bêsten.
20:51

Fierljeppen yn Winsum

Yn Winsum wurdt op it stuit ljept yn de earste klasse. De ljeppers meitsje harren no op foar de finalesprongen. By de manlju steane Feike Stellingwerf, Jarno Hoekstra, Rutger Piersma, Ysbrand Galama en Oane Galama yn de finale. Oane Galama hat mei 19,20 meter oant no ta de fierste sprong delset.
By de froulju steane Marrit van der Wal, Inger Haanstra en Tessa Kramer yn de finale. Kramer hat mei 15,51 de bêste útgongsposysje.
18:04

LDODK wint en is wis fan krúsfinales

LDODK makket noch hieltyd kâns op de lânstitel op it fjild. Tsjin konkurrint KCC út Capelle aan den IJssel pakte LDODK de oerwinning (10-17).
De ploech út De Gordyk einiget no wis by de earste twa yn de eareklasse A en dat betsjut dat se meidwaan meie oan de krúsfinales om it lânskampioenskip.
17:37

Beitske Visser kin libje mei har fyfde plak

Earder dizze middei waard Beitske Visser fan Twellingea fyfde by de race fan de W Series yn Barcelona. Visser is tefreden mei it resultaat.
16:56

Bergsma, Drent en Zijlstra winne yn Wommels

Marten Bergsma, Dylan Drent en Erwin Zijlstra hawwe sneon de haadklassepartij yn Wommels wûn. De keatsers waarden troch inoar lotte. Foar Zijlstra, de PC-kening, fan it ôfrûne jier, wie dit ekstra spesjaal. It wie syn earste wedstriid nei in hamstringblessuere dy't him dit seizoen oant no ta oan de kant hold.
Tjisse Steenstra, Taeke Triemstra en Hendrik Kootstra waarden twadde. Remmelt Bouma, Kees van der Schoot en Evert Pieter Tolsma makken it poadium kompleet.
De winners yn Wommels © Henk Bootsma
16:42

Harkemase Boys ferliest mei grutte sifers

It is Harkemase Boys net slagge om de wedstriid tsjin Sparta Nijkerk yn de twadde helte om te draaien. By it skoft wie it al 2-0 troch doelpunten fan Janic Makizodila en Bryan Burgerhout. Nei it skoft makke de ploech út Nijkerk der noch twa. Berwout Beimers rêde de Fryske eare. Einstân 4-1.
De Boys begûnen wol fel oan de twadde helte, mar nei de 3-0 fan Max Leeflang yn de 53ste minút wie it wol dien mei de hoop op in goed resultaat foar de Harkiten. Burgerhout makke noch syn twadde fan de middei en Beimers bepaalde de einstân op 4-1.
Harkemase Boys stiet no alfde yn de tredde divyzje mei 40 punten.
De spilers fan Harkemase Boys nei in tsjindoelpunt © Orange Pictures
16:09

Krúsjaal duel LDODK

Yn de eareklasse fan it kuorbal is LDODK úteinset oan in krúsjaal duel. De ploech fan De Gordyk stiet twadde en dat plak jout rjocht op in pleats yn de play-offs foar de lânstitel op it fjild.
De tsjinstanner is hjoed lykwols KCC út Capelle aan den IJssel. Dy ploech stiet tredde en hopet it twadde plak fan LDODK oer te nimmen.
15:39

Harkemase Boys op efterstân by it skoft

Yn de tredde divyzje fan it amateurfuotbal spilet Harkemase Boys tsjin de nûmer twa fan de kompetysje, Sparta Nijkerk. Oant no ta sjocht it der net goed út foar de Boys. By it skoft steane se mei 2-0 efter.
Yn de 22ste minút iepene Janic Makizodila de skoare. Krekt foar it skoft ferdûbele Bryan Burgerhout de foarsprong foar de ploech út Nijkerk. Harkemase Boys moat dus yn de efterfolging yn de twadde helte.
15:27

Beitske Visser fyfde by race yn Barcelona

Yn de W Series (de heechste autoraceklasse foar froulju) is Beitske Visser fan Twellingea fyfde wurden by de wedstriid yn Barcelona. De oerwinning gie nei de Britske klassemintslieder Jamie Chadwick.
Visser lei sawat de hiele race op it fyfde plak. Se koe in oanfal fan de Spaanske Marta García mar krekt ôfslaan. Yn de buert fan it poadium kaam Visser nea. It ferskil mei de nûmer trije wie op de finish hast tsien sekonden.
Beitske Visser © Orange Pictures
15:05

Froulju Hearrenfean slute kompetysje ôf mei oerwinning

De fuotbalfroulju fan sc Hearrenfean hawwe it earedivyzjeseizoen ôfsletten op in sande plak. Hearrenfean wûn de lêste wedstriid fan it seizoen mei 2-0 fan Feyenoord.
De doelpunten kamen op namme fan Jet van der Veen en Zoï van de Ven. Troch de oerwinning gie Hearrenfean noch oer VV Alkmaar hinne op de ranglist.
15:00

Wolkom by dit sportblog

Yn dit blog hâlde we jo op de hichte fan de lêste ûntwikkelingen oangeande de sport yn Fryslân.
Hjoed folgje we dizze wedstriden:
- It haadklassekeatsen foar manlju yn Wommels
- De W series yn Barcelona mei Beitske Visser
- De wedstriid yn de tredde divyzje fan it amateurfuotbal tusken Sparta Nijkerk en Harkemase Boys
- KCC - LDODK yn de eareklasse fan it fjildkuorbal
- It fierljeppen fan de earste klasse yn Winsum