Dit wie de dei fan it publike ôfskied fan Piet Paulusma

Hjirmei komt der in ein oan dit liveblog oer it publike ôfskied fan Piet Paulusma.

Moarn is de útfeart fan Paulusma yn besletten rûnte.

Der hawwe oant 16.30 oere sa'n 6.000 minsken by it ôfskie fan Piet Paulusma west, sa lit de gemeente Harns witte.

De belangstelling foar it ôfskied is grut. Neffens ferslachjouwer Hayo Bootsma hawwe der oant no ta sawat 3.000 minsken west. "Der is yn Harns hast gjin blom mear te krijen", seit Bootsma.

"Ik haw minsken troffen út Limboarch, Arnhem en Den Haag. Minsken sitte trije of fjouwer oeren yn de trein om yn Harns te wêzen en it momint te pakken. Dat dogge se om't Piet dêr in kear west hat om it waar te dwaan. Sa bout er in bân op mei minsken. Hy kaam by harren en no wolle se nei Piet ta."

De famylje fan Piet hat yn Hjerbeam flyers ferspraat om moarn, op de dei fan syn útfeart, de flagge yn top te hingjen. Dat wie in útdruklike winsk fan Piet.

De fearboat Willem de Vlamingh fan Rederij Doeksen hat sakrekt in lêste groet brocht oan Piet Paulusma. De boat toetere en de minsken op de boat klapten foar in lêste kear foar Piet.

De minsken dy't ôfskied nimme wolle komme út it hiele lân. Sa is der in man út Zoetermeer, menear De Jager. "Ik wilde toch even afscheid nemen van Piet Paulusma", seit er. "Ik ging in juli naar Harlingen en toen liep ik langs zijn huis. Hij had zijn raam open en ik zei: 'Hallo, Piet!'. Toen zei hij: 'Kom maar even binnen'."

De Jager sil dat nea ferjitte, seit er.

Piet wie in muzykleafhawwer en wie eartiids sels dj. Syn lêste playlist draait yn it Entrepotgebou, fertelt ferslachjouwer Hayo Bootsma. "It klinkt eins best frolik binnen", seit er.

"Ik fûn it bysûnder yndrukwekkend", seit âld advokaat Hans Anker oer it ôfskied fan Piet. "Ik wie hiel betiid. Ik mocht al nei binnen en dêr hie ik net op rekkene. Wat dat oanbelanget binne se hiel maklik."

Dat past by Piet, seit Anker. "Piet wie altyd bysûnder tagonklik, benaderber en leechdrompelich. As we aktiviteiten hiene yn Akkrum dan koene je him altyd fia syn mobyl direkt skilje. Dan wie der altyd reewillichheid om te helpen en te advisearjen."

Krekt foar alve oere stiene de earste minsken al yn de rige foar it ôfskied fan Piet. Se hawwe beiden in wite roas meinaam. "We troffen him hjir alle kearen as we hjir op fakânsje wienen. Syn suster wennet net fier fan ús wei", seit ien fan de froulju. "Ut respekt dogge we dit", seit de oare frou.

De ruten yn it Entrepotgebou steane hjoed iepen. "Dit hat Piet allegearre sa wollen. Dat hat er sa beskreaun. Alles iepen. Moai rjochting see", seit útfeartbegelieder Casper van Veen.

Troch it iepensteande rút falt der presys in sinnestriel op de kiste fan Piet. "Moaier kin net. Krekt oft stjoert er it sels noch even", seit Van Veen.

De famylje fan Paulusma hat witte litten dat it 'tige winske' is as it publyk kleurrike blommen meinimt. "Piet hold fan fleurige blommen. Dat is bewust sa dien", seit útfeartbegelieder Casper van Veen.

De blommen geane nei de útfeart net ferlern. "Uteinlik wolle we der in kompostbult fan meitsje en takom jier yn dizze maitiid wolle we dêr in fjildsje fan hawwe hjir yn de stêd: it Piet-fjildsje", seit Van Veen. "Sadat we yn it foarjier wer in moaie blommesee hawwe en dat we dan in momint hawwe om wer oan Piet te tinken."

It radioprogramma No Derfoar! hat hjoed in spesjale útstjoering. De muzyk yn it programma fan freed is útsocht troch Piet Paulusma sels. It binne platen dy't op syn fersyk earder draaid binne yn de radioprogramma's No derfoar! en Weistra op wei fan Omrop Fryslân.

Foardat er bekend waard as waarman, wie Piet Paulusma aktyf as dj. Sa kaam it dat er by Omrop Fryslân ek alle dagen ien fan syn favorite platen útsykje mocht. Dy plaat waard 'de Pietplaat' fan de dei.

It programma is hjir te folgjen en duorret oant 12.00 oere.

It grutte publyk kin fan 'e middei yn Harns ôfskied nimme fan Piet Paulusma. De ôfskiedsgearkomste yn it Entrepotgebou is fan 12.00 oant 17.00 oere. It ôfskie is yn dit liveblog te folgjen.