Liveblog
|
16 maart 2022
OERSJOCH: Dit wie de tredde ferkiezingsdei yn Fryslân
Yn dit liveblog melden wy it lêste nijs oer de gemeenteriedsferkiezingen.
- Folgje hjir ús nije liveblog mei alle útslaggen;
- Sjoch oant 1.00 oere nei Fryslân Kiest, ús spesjale útstjoering oer de ferkiezingen;
- Sa'n 525.500 Friezen meie stimme, lanlik sa'n 13,6 miljoen yn 334 gemeenten;
- Al it nijs oer de ferkiezingen stiet yn ús dossierside.
Dit liveblog is ook in het Nederlands te volgen.
Lêst bywurke: 16 maart 2022, 20:31
woansdei 16 maart 2022
20:28
Oant safier dit liveblog
In healoere foar de stimbussen slúte we dit liveblog. Al it ferkiezingsnijs, en de útslaggen, binne te folgjen yn in nij liveblog. Dat is hjir te finen.
Tige tank foar it folgjen.
20:08
Boargemaster De Fryske Marren: Opkomst is 'leechste ea'
Boargemaster Fred Veenstra fan De Fryske Marren makket him soargen oer de opkomstsifers. Om 19:00 oere hinne hie minder as de helte fan de ynwenners fan syn gemeente stimd. Dat wiene der oant no ta altyd mear, seit er.
20:00
Race om de earste útslaggen kin hast begjinne
Mei noch in oere te gean foardat de stimburo's slute, meitsje meiwurkers fan stimlokalen har klear om de stimmen te tellen. Om 21:00 oere stride meardere gemeenten om de earste útslaggen te melden.
Meastal giet dy striid tusken Skiermûntseach, Flylân en it Gelderske Rozendaal. Dy lêste gemeente hat troch de komst fan in nije wenwyk no mear bewenners, en tinkt no al 'kânsleas' te wêzen yn de 'striid', seit in wurdfierder.
By de foarige gemeenteriedsferkiezingen, yn 2018, melde Skiermûntseach de earste útslach fan Nederlân, om 21:13 oere. De opkomst wie doe 83 persint. Flylân wie twadde, en melde de útslach tsien minuten letter.
19:15
De opkomstsifers op in rychje
Wat is it opkomstpersintaazje yn myn gemeente?
Gemeente | % | Tiid |
Achtkarspelen | 44 | 19.00 |
Amelân | 59,1 | 18.00 |
Dantumadiel | 51,4 | 19.30 |
De Fryske Marren | 47 | 19.00 |
Eaststellingwerf | 41,2 | 19.00 |
Flylân | 39 | 11.00 |
Harns | 44,3 | 19.00 |
Hearrenfean | 45,5 | 19.00 |
Ljouwert | 27,9 | 16.00 |
Noardeast-Fryslân | 47,8 | 19.30 |
Opsterlân | 45,5 | 19.00 |
Skiermûntseach | 64 | 16.00 |
Skylge | 42 | 15.30 |
Smellingerlân | 43,3 | 19.00 |
Súdwest-Fryslân | 43,6 | 18.30 |
Tytsjerksteradiel | 49,4 | 19.00 |
Waadhoeke | 40 | 18.45 |
Weststellingwerf | 19 | 13.00 |
19:31
Onno Falkena praat mei it 16-jierrige kandidaat-riedslid Ruben Boonstra
19:28
Henk van der Veer oer de politike situaasje yn Súdwest-Fryslân
19:12
Yn Ljouwert rint de spanning op
19:00
Folgje de ferkiezingsjûn live by Omrop Fryslân
18:17
"Opkomst soe moai wurde kinne"
18:05
Daliks om 19.00 oere Fryslân Kiest, ûnder mear út Smellingerlân wei
18:04
Nije telmetoade yn Opsterlân
17:42
De sfear sit der goed yn op stimburo Sumar
17:38
Jack de Vries oer it geheim fan in goeie kampanje
Ald-kampagnelieder fan it CDA Jack de Vries fynt dat de partijen troch de oarloch yn Oekraïne mei de hânrem derop kampanje fierd hawwe foar de gemeenteriedsferkiezingen. "Normaal wolst wat kreatyfs of ludyks dwaan, mar dat kin no net. Der is ek net in soad omtinken foar de gemeenteriedsferkiezingen."
Neffens De Vries binne posters noch hieltyd wichtich. "In soad minsken witte net iens dat der ferkiezings binne. Troch de posters wurde se dêr no wol op wiisd." As partijen jongeren berikke wolle, dan moatte se net ynsette op posters: "Dan moatst echt op social media wêze."
16:30
Oerterp hâldt it stimmen sekuer by
16:14
Deputearre Sietske Poepjes yn Makkum: 'It moaiste stimburo'
15:42
Der noch net út? Foar dizze Fryske gemeenten binne stimwizers:
15:25
Eaststellingwerf stiet op 28 persint
15:06
Hoe wurket it opslaan en tellen? Wieke de Boer fan Achtkarspelen leit it út:
15:03
Yn Moarre ha se wol in gebakje fertsjinne
14:49
Op It Hearrenfean set Jordi him yn as gasthear binnen de Prokkel-aksje
14:35
Nije telmetoade Opsterlân giet dat it slydjaget
14:16
Yn Hoarne op Skylge is it in gesellige boel op it stimburo
14:15
De stimtruck stiet yntusken yn Surhústerfean
14:05
Stimtellokaasjes riede har ta
As de stimbussen jûn ticht binne, moat der noch wol teld wurde. Dêrfoar hawwe de Fryske gemeenten ferskate lokaasjes ynrjochte, lykas de Evenemintehal op De Jouwer en it Posthuis Theater op It Hearrenfean.
14:03
Rijpstra lit him beselskipje troch de froulju fan De Houtigehage
14:02
BF'ers dogge ek har boargerplicht: sjongster Iris Kroes wie al by de stimbus
13:53
Boargemaster Opsterlân stimde yn it Lycklamahûs
Boargemaster Ellen van Selm fan Opsterlân brocht har stim út yn it Lycklamahûs yn Beetstersweach. "Alle stembureaus zijn bezet ondanks nogal wat corona-afzeggingen", fertelde sy op sosjale media.
12:58
Stimhelp fan Dantumadiel yntusken al 4.400 kear brûkt
12:55
Ek op It Hearrenfean is in stimtinte by it gemeentehûs delset
12:49
Opkomst Waadhoeke: 13,4 persint
Om it middeisoere hinne hat ek Waadhoeke de balâns opmakke: yn dy gemeente hat oant no ta sa'n 13,4 persint fan de ynwenners mei kiesrjocht stimd.
12:42
Prokkelduo's
Ferskate Fryske gemeenten dogge mei om ynklusive stimburo's te realisearjen. Stichting Prokkel sjocht it leafst yn alle gemeenten op syn minst ien stimburo mei in duo dy't út ien persoan mei en ien persoan sûnder in (licht) ferstanlike beheining bestiet. Minsken mei in beheining binne mear as harren beheining, sa is it idee. Sy wolle ek fan betsjutting wêze foar de mienskip.
Op it gemeentehûs fan De Fryske Marren sit dêrom Abe de Vries, in begyp op de Jouwer, om te helpen mei de ferkiezingen.
12:30
De Harmonie yn Ljouwert geskikt as stimplak foar minsken mei in fisuele beheining
Yn de Ljouwerter De Harmonie is in stimburo spesjaal ynrjochte foar minsken mei in beheining. Yn it spesjaal nochris minsken mei in fisuele beheining. Der is in stimmal makke mei Braille en gatsjes, dêr't alle fraksjes en kanidaten op te finen binne.
Om it gebou hinne binne ek maatregels naam: der binne gjin drompels, it stimmen is rom opset en der binne ekstra ynfalideparkearplakken. It stimburo is opset yn gearwurking mei de Werkgroep Toegankelijkheid.
12:26
Opkomst Dantumadiel: 21,7 persint
Gemeente Dantumadiel hat de tuskentiidske opkomst fan 11.30 oere bekend makke: dy lei op 21,7 persint fan it tal ynwenners mei kiesrjocht.
12:21
Opkomst De Fryske Marren: 15 persint
De Fryske Marren hat as ien fan de grutste gemeenten ek de tuskentiidske opkomst: dy leit op 15 persint.
12:18
Raad van Europa yn Frjentsjer
Op it stimburo yn de Frjentsjerter Martinytsjerke wiene woansdeitemoarn leden fan it Congres van Lokale en Regionale overheden fan de Raad van Europa. Boargemaster Marga Waanders en kommissaris fan de Kening Arno Brok wiene der om har op te fangen.
12:15
Minister Wiersma by de stimbus
Minister Dennis Wiersma foar Primêr en Fuortset Underwiis, berne yn Frjentsjer, hat yntusken syn stim ek útbrocht.
12:13
Van der Zwan op de fyts
Boargemaster Tjeerd van der Zwan fan Hearrenfean pakt it sportyf oan: hy giet foar in part op de fyts by de stimburo's del.
12:09
Opkomst Smellingerlân: 17 persint
Gemeente Smellingerlân hat de tuskentiidske opkomst fan 11.00 oere ek bekend makke: 17 persint fan de 7.535 ynwenners mei kiesrjocht hat al stimd.
12:08
Opkomst Flylân: 39 persint
Gemeente Flylân kin in hege tuskentiidske opkomst bekend meitsje: 39 persint fan de likernôch tûzen ynwenners mei kiesrjocht hat al stimd.
12:02
Opkomst Eaststellingwerf: 17 persint
Ek Eaststellingwerf kin de tuskentiidske opkomst update: yn de gemeente hat no 17 persint fan de lju mei kiesrjocht stimd.
11:58
Opkomst Opsterlân 9,6 persint
Ek Opsterlân makket opkomstsifers s bekend: om 11.00 oere hie 9,6 persint fan de ynwenners mei kiesrjocht stimd.
11:50
Boargemasters Rijpstra en Stoel ek ûnderweis
Boargemasters Jan Rijpstra fan Smellingerlân en Leo Pieter Stoel fan Amelân binne ek úteinset mei in omgong troch harren gemeenten. Stoel naam sels koeken mei foar de frijwilligers, as tank foar harren wurk.
11:37
Tuskentiidske opkomstsifers
Yn Tytsjerksteradiel leit de opkomst no op 17,1 persint (4.393 stimmers fan de 25.631 ynwenners mei kiesrjocht). De heechste lokale opkomst dêr is yn Oentsjerk, dêr't al 15,7 persint stimd hat.
Yn Achtkarspelen leit de opkomst no op 14,2 persint (3.183 stimmers fan de 22.477 ynwenners mei kiesrjocht. De heechste lokale opkomst dêr is yn Twizel, dêr't al 11,6 persint stimd hat.
Ek Harns hat sifers bekend makke: om 11.00 oere leit de opkomst op 19,4 persint. Yn Eaststellingwerf falt it opkomstpersintaazje noch ôf: dêr hat no 8 persint fan de ynwenners mei kiesrjocht stimd.
Fan de gemeenten Dantumadiel en Noardeast-Fryslân binne de meast resinte opkomstsifers noch fan 09.45 oere: dy leine doe op 14,5 en 8,7 persint.
11:19
Stimtruck: ‘Attentie, attentie: inwoners van Gytsjerk opgelet!’
Yn Tytsjerksteradiel en Achtkarspelen rydt woansdei in stimtruck om. Woansdeitemoarn stiet er yn Gytsjerk op it plein.
"It komt stadich op gong", seit foarsitter Teatske Rienks. "Minsken witte ús mei ús lûdswein hieltyd better te finen. Wy roppe de minksen mei in megafoan op om te stimmen op ús mobile stimburo. It kin minsken net ûntgean."
"Attentie, attentie: inwoners van Gytsjerk opgelet!", sa klinkt it troch it doarp. "In soad minsken hawwe der fan heard en wolle efkes sjen", jout Rienks oan. "Of it binne leafhawwes fan trucks dy't efkes sjen wolle en prate wolle mei de sjauffeur oer de wein."
De 19-jierrige Mattheüs Elgersma sit as frijwilliger op de truck. "Ik fyn it persoanlik hiel wichtich. Ik rin staazje by de gemeente en haw altyd politike ynteresse hân. Ik rop elts op: gean te stimmen, it giet oer dyn takomst. Leeftiid makket net út."
De truck stiet woansdei yn Hurdegaryp, Gytsjerk, Burgum, Surhústerfean, Koatstertille en Bûtenpost.
11:08
Mei de juf nei it stimburo yn De Himrik
De groep 7- en 8'ers fan OBS De Bôge fan De Himrik brochten moarns in besite oan de stimbus. "Jong geleerd is oud gedaan", tocht de skoalle.
10:51
Opkomst Hearrenfean: 13,6 persint, 5.607 minsken
Gemeente Hearrenfean hat in tuskenstân bekend makke: om 10.00 oere hat 13,6 persint fan de ynwenners mei kiesrjocht in stim útbrocht. Dat komt del op 5.607 minsken. It binne der al folle mear as yn 2018: doe lei it op itselde tiidstip op 7,4 persint. It hat fansels ek te krijen mei dat minsken al twa dagen yn 't foar stimme koene.
10:45
Stimburotinte njonken de Harnzer Noarderhaven
Yn Harns is spesjaal in stimburo njonken de Noarderhaven, efter it stedhûs. Der is in tinte opset, sa't elts genôch ôfstân fan inoar hâlde kin.
10:34
Boargemaster Weststellingwerf hat stim útbrocht
Boargemaster André van de Nadort fan Weststellingwerf hat syn biljet ek yn de kontener treaun. Syn gemeente hat 22 stimburo's.
10:27
Ferkiezingen as foarrjocht
Boargemaster Sybrand Buma fan Ljouwert wiist op de oarloch yn Oekraïne. Hy ropt elts op te stimmen, want frije ferkiezingen binne in foarrjocht, seit er.
10:14
Opkomst Amelân: 18,4 persint, 563 stimmen
Gemeente Amelân komt mei in tuskentiidske opkomst: oant no ta hawwe 563 kiezers stimd, dat is 18,4 persint fan de lju mei kiesrjocht op it eilân.
10:08
Stimboat yn Heech, Twellingea en Snits
Yn Heech leit woansdeitemoarn in spesjaal stimburo oan de Nijewâl: in rûnfeartboat. Letter fart de boat noch nei de loswâl yn Twellingea en de Jousterkade yn Snits.
De gemeente hat net om 'e nocht in boat keazen. "Onze gemeente beslaat een hele grote oppervlakte. We willen het stemmen bereikbaar maken voor onze inwoners. We hebben opgeroepen: laat je stem niet in het water vallen en kom naar de stemboot", seit Marjolein Althuisius fan gemeente Súdwest-Fryslân.
09:43
1.800 Waadhoekers stimden yn de earste twa dagen
Op de earste twa dagen fan de ferkiezingen leit it opkomstpersintaazje yn gemeente Waadhoeke op 4,8 persint. Yn totaal hawwe 37.358 ynwenners kiesrjocht, dus dat hâldt yn dat sa'n 1.800 minsken stimd hawwe op moandei en tiisdei.
09:12
Lanlike kopstikken nei de stimbus
De lanlike kopstikken út Fryslân binne ek al yn 't spier: sa hat de Ljouwerter steatssekretaris Aukje de Vries foar Taslaggen en Dûane (VVD) al stimd.
Twadde Keamerlid Romke de Jong (D66) is yn de moarntiid yn Ljouwert op 'en paad mei riedsleden om te flyerjen.
Twadde Keamerlid Harry van der Molen (CDA) fan Wergea begûn de dei just yn it doarpshûs fan Wergea.
09:04
Boargemaster Gebben mei corona thús
Boargemaster Jeroen Gebben fan Tytsjerksteradiel sit yn itselde skip as boargemaster De Vries fan Súdwest-Fryslân: ek sy sit mei corona thús. "Onhandig moment", seit ek Gebben.
08:58
Sa'n 1.800 minsken yn Noardeast stimd yn de earste dagen
Yn Noardeast-Fryslân hat yn de ôfrûne twa dagen 4,95 persint fan de ynwenners mei kiesrjocht stimd. Dat komt mei in totaal oantal minsken mei kiesrjocht fan likernôch 36.300 del op sa'n 1.800 minsken.
08:45
In weromkommend fenomeen: de boargemastersbesite
Ferskate Fryske boagemasters besykje in besite te bringen oan in grut part fan de stimburo's yn harren gemeente.
Boargemaster Johannes Kramer fan Noardeast-Fryslân hat in rûte útstippele en begûn yn Dokkum, boargemaster Fred Veenstra fan De Fryske Marren is úteinset yn doarpshûs De Buorkerij yn Terherne.
08:31
Oant no ta in lytse acht persint opkomst yn Opsterlân
Op de twa eardere stimdagen hawwe 1.872 ynwenners mei kiesrjocht yn Opsterlân nei de stimbus west. Utgeande fan sa'n 23.900 ynwenners mei kiesrjocht, komt dat rûchwei del op sa'n 7,8 persint.
08:26
Yn Opsterlân al 20 stimburomeiwurkers mei corona
Yn Opsterlân smyt it sturtsje fan de coronaweach noch problemen op: tiisdei wiene der al 20 ôfmeldingen foar it bemanjen fan de stimburo's fanwege it firus.
Der is aldergeloks in reservelist, dêr't it Publykssintrum fan de gemeente flink gebrûk fan makke hat.
08:16
Yn Súdwest gjin boargemaster op besite
Yn in soad gemeenten sil de boargemaster in omgong by de stimburo's meitsje, mar yn Súdwest-Fryslân net. Boargemaster Jannewietske de Vries hat it coronafirus oprûn. "Hiel ferfelende timing", sa skriuwt sy. Mar it stimmen is wol slagge:
08:06
Al 297 stimmen útbrocht op Flylân
Op Flylân ha moandei en tiisdei ha al 297 minsken stimd, in opkomstpersintaazje fan 28 persint.
07:48
Kofje en sop foar stimburoleden
07:30
Stimburo's iepen
De stimburo's binne om 7.30 oere iepengien. Oant 21.00 oere kinne minsken kinne har stim útbringe. Dêrfoar moatte se meinimme: in jildige stimpas en in jildich identiteitsbewiis. In mûlkapke is net mear ferplichte.
06:05
Wêr wenje de jongste en âldste kiezers yn Fryslân?
It Centraal Bureau voor de Statistiek hat lanlik berekkene wêr't de measte âlderein en jongerein wennet dy't stimme meie.
De gemeente Flylân hat it grutste oandiel jongelju mei kiesrjocht: 31,4 persint fan de lju mei kiesrjocht is dêr tusken de 18 en de 25 jier. Dêrnei folgje Ljouwert mei 30,8 persint en Skylge mei 28 persint. Yn de measte Fryske gemeenten leit it oandiel tusken de 20 en 24 persint, allinne Skiermûntseach leit dêr mei 19,4 persint noch ûnder.
Yn gemeente Skiermûntseach is omkeard ek it grutste oandiel âlderein mei kiesrjocht: 33,5 persint is âlder as 65 jier. Dêrnei folget Harns mei 32,4 persint. De gemeenten mei de minst grutte oandielen âlderein binne Flylân mei 22 persint en Ljouwert mei 23,8 persint.
06:02
Oersjoch: dit docht Omrop Fryslân mei de ferkiezingen
We binne der jûn by mei ús spesjale ferkiezingsprogramma Fryslân Kiest (fan 19.00 oere ôf op de radio, tusken 21.00 en 01.00 oere ek op tv).
Fierder fansels de hiele dei, jûn en nacht it lêste nijs yn ús liveblog en ek op de radio steane we wiidweidich stil by de gemeenteriedsferkiezingen.
06:40
Stimburo Mantgum
Yn Mantgum wie it stimburo foar de gemeenteriedsferkiezingen de ôfrûne twa dagen al iepen. Om't de coronamaatregels foar it grutste part wer skrast binne, is it ferlet fan ekstra stimdagen minder grut. It rûn yn Mantgum dêrom net echt stoarm. Dochs fûnen de kiezers it wol handich.
06:34
525.500 Friezen meie stimme
It Centraal Bureau voor de Statistiek hat útrekkene hoefolle minsken op 1 jannewaris 2022 kiesrjocht hiene yn Nederlân. Lanlik binne dat sa'n 13,6 miljoen minsken, oer 334 gemeenten. Goed 840.000 jongelju meie yn Nederlân foar de earste kear stimme.
Yn Fryslân meie sa'n 525.500 minsken nei de stimbus: yn Ljouwert de measte (sa'n 101.700 minsken) en Skiermûntseach de minste (sa'n 800 minsken).
Hoefolle minsken meie der yn myn gemeente stimme?
Gemeente | Tal minsken mei kiesrjocht |
Achtkarspelen | 22.000 |
Amelân | 3.100 |
Dantumadiel | 15.100 |
De Fryske Marren | 41.500 |
Eaststellingwerf | 21.100 |
Flylân | 1.000 |
Harns | 12.900 |
Hearrenfean | 41.100 |
Ljouwert | 101.700 |
Noardeast-Fryslân | 36.300 |
Opsterlân | 23.900 |
Skiermûntseach | 800 |
Skylge | 4.200 |
Smellingerlân | 44.400 |
Súdwest-Fryslân | 72.200 |
Tytsjerksteradiel | 25.600 |
Waadhoeke | 37.200 |
Weststellingwerf | 21.400 |
Totaal: | 525.500 |
06:00
Wolkom by it liveblog
Goeiemoarn en wolkom by dit liveblog. Hjir is al it lêste nijs te finen oer de gemeenteriedsferkiezingen: updates oer de opkomst yn Fryslân, bysûndere stimburo's en de ferwachtingen fan de politike partijen.
Folgje jûn Fryslân Kiest
Omrop Fryslân presintearret jûn it programma Fryslân Kiest. It programma set om 19.00 oere útein by Omrop Fryslân op de radio en op ynternet. Fan 21.00 oere ôf is it ek by Omrop Fryslân op tv te sjen. Fryslân Kiest duorret oant 01.00 oere
Yn it programma folgje wy it stimtellen, de earste tuskenútslaggen en de foarriedige einútslaggen, mei reaksjes en analyzen.
Alle oeren skeakelje wy yn Fryslân Kiest live oer nei ferskate gemeentehuzen yn Fryslân. Dêr binne ferslachjouwers fan Omrop Fryslân en de gearwurkjende lokale omroppen LEO Middelsé en RTV NOF. Sy hâlde ús op de hichte oer de lêste stân fan saken. Ek skowe der politike gasten oan yn de studio.