Liveblog
|
24 febrewaris
Coronanijs 24 febrewaris: 'Hâld slutingstiden hoarekasaken yn begjin fan de nacht'
Yn dit liveblog melde we it lêste nijs oer it coronafirus:
- Tongersdei binne yn Fryslân 1.926 nije coronabesmettingen meld;
- By foarkar om 2 oere ticht: 'geselliger yn de stêd en better foar hoarekapersoniel;
- Enkête CNV: Bussjauffeurs wolle ôf fan mûlkapkesplicht;
- Ektra corona-yninting, mar net foar elkenien.
Dit liveblog is ook in het Nederlands te volgen.
Bywurke: 24 febrewaris, 22:43
tongersdei 24 febrewaris
22:41
Ein fan dit liveblog
Wy slute it liveblog foar hjoed. Tank foar it folgjen. Moarn binne we der foarearst foar it lêst mei it coronaliveblog.
20:06
Tal positive tests rint yn hiel Europa werom
Yn grutte parten fan Europa giet it tal nije coronagefallen omleech. Nederlân bliuwt in brânkearn, mar dat komt ek trochdat it RIVM earder dizze moanne in grutte efterstân yn ien kear fuortwurke.
Dy ynhelslach telt nije wike net mear mei yn de wyklikse kaart fan de Europeeske sûnenstsjinst ECDC. It tal befêstige besmettingen is sa heech dat hast alle regio's op donkerread stean. Dat is it heechste warskôgingsnivo op de kaart. Mar yn 191 regio's giet it tal positive tests omleech.
17:38
Net folle fraach mear ferwachte, testoanbieders slute lokaasjes
Fan freed ôf is in negative testútslach inkeld noch nedich foar grutte gearkomsten binnendoar sûnder fêst sitplak. Dan moatte alle besikers, faksinearre of net, harren yn it foar teste litte op corona. Oant no ta hiene minsken dy't net faksinearre wiene in negative coronatest nedich foar tagong ta bygelyks de hoareka.
De ferwachting is dat de fraach nei tests freed ynsakket. Oanbieders lykas Testcoronadirect en Spoedtestcorona witte no al dat se lokaasjes slute moatte. Alegria Health, mei sa'n tweintich lokaasjes yn it noarden en westen fan Nederlân, ferwachtet foaral troch de wike ticht te gean. Yn de wykeinen wol eigener Margaret Krijnen safolle mooglik lokaasjes iepenhâlde, ek yn lytsere plakken lykas Easterwâlde.
Stichting Open Nederland dy't de testen foar it coronatagongsbewiis organisearret, kin noch net sizze hoefolle lokaasjes oft iepenbliuwe sille. En dus ek net oft elkenien binnen in heal oere in testlokaasje berikke kin.
17:21
EMA posityf oer Pfizerbooster foar pubers
Bern fan 12 oant en mei 17 jier kinne no ek in boosterprik fan Pfizer/BioNTech helje. Dat is feilich yn de eagen fan it Europeesk genêsmiddelburo EMA. Soarchminister Ernst Kuipers sei earder dat jongerein in boosterfaksinaasje helje mei, as it EMA dêrachter stean soe.
Op dit stuit kinne allinnich folwoeksenen in boosterprik krije. De Gezondheidsraad stelde earder dizze moanne dat der gjin medyske redenen binne om alle pubers in boosterprik oan te bieden. Kuipers naam dat advys oer. Hy sei der wol by dat as it EMA grien ljocht jout foar in boosterprik foar de leeftiidsgroep fan 12 jier ôf, jongeren de mooglikheid krije om sa'n oppepprik te helje
17:08
Ektra corona-yninting, mar net foar elkenien
Fan kommende sneon ôf krijt in nije groep boargers in útnûging foar in ekstra coronafaksinaasje. It giet om minsken fan 70 jier en âlder, bewenners fan ferpleechhuzen, folwoeksenen mei it syndroom fan Down en folwoeksenen mei in slimme ymmúnsteurnis.
De útnûging folget sawat trije moanne nei harren lêste coronaprik. Dat skriuwt minister Kuipers fan Folkssûnens, Wolwêzen en Sport (VWS) tongersdei oan de Twadde Keamer.
De Gezondheidsraad advisearret om allinnich spesifike groepen en net alle 18-plussers de werhel-prip oan te bieden. De minister folget dat advys op.
16:53
RIVM meldt 1.926 nije besmettingen, 1 stjergefal
Yn Fryslân binne yn de ôfrûne 24 oeren 1.926 nije coronabesmettingen registrearre troch it RIVM. Woansdei wienen it der 2.196. In ynwenner fan de gemeente Waadhoeke is ferstoarn.
15:10
Ekstra prik foar 70+'ers
14:18
'Lit slutingstiden betiid yn de nacht'
Hâld de slutingstiden yn de hoareka yn it begjin fan de nacht, en net oant in oere as 5.00. Dat is de oprop fan Izak Rusticus, barkeeper fan kafee De Prins yn Ljouwert. Syn oprop wurdt stipe troch hoareka-ûndernimmers troch de hiele provinsje.
Fan freed ôf jilde de âlde slutingstiden en dan mei De Prins dus oant 5.00 oere nachts iepen bliuwe. Mar wat Rusticus oanbelanget hoecht dat net. "Se hienen yn Den Haag sizze moatten dat de kroegen om 2.00 oere ticht moatte en de diskoteken om 3.00 oere."
Positiver en fitter
En dan dus earder op de jûn begjinne. "Dan is it folle geselliger yn 'e stêd, minsken binne positiver. En it bliuwt ek nofliker. Besikers binne der no ek oan wend."
Der binne mear foardielen, neffens Rusticus. "Minsken binne ek folle fitter én it personiel hat mear nocht oan it wurk. Dy ha dan ek noch wat oan de folgjende dei."
Izak Rusticus by Omrop Fryslân
10:04
'Teste foar eveneminten skeelt amper sikehûsopnamen'
De ferplichte coronatest foar grutte eveneminten skeelt yn trochsneed 1,6 oant 3 sikehûsopnamen deis, neffens in ûndersyk fan de TU Delft. Fan freed ôf moat foar binneneveneminten mei mear as 500 besikers in coronatest dien wurde. Undersiker Bas Kolen sei datst dêrmei yn trochsneed in pear hûndert besmettingen deis foarkomst. Oft dat in soad of in bytsje is, is net oan him om oer te oardieljen. Lang net alle besmette minsken komme yn it sikehûs.
De ûndersiker basearret him op berekkene oannames oer it trochsneedtal besikers op in dei fan grutte konserten en eveneminten binnendoar. Ek it tal besmetlike minsken dat omrint yn Nederlân is in ûnwissichheid. Yn de berekkeningen is de ûndersiker derfan útgien dat dit 2 prosint fan de befolking is.
09:37
Bussjauffeurs wolle ôf fan mûlkapkesplicht
'Minsken stean aanst mei karnaval ticht opinoar yn in folle kroech en sagau't se it iepenbier ferfier ynstappe moatte se in mûlkapke op.' 'It is net mear te hanthavenjen no't de 1,5 meter-regel derôf is. En wy hawwe al hieltyd te krijen mei agresje.' Dat binne samar in pear reaksjes yn in enkête ûnder CNV-leden yn it iepenbier ferfier.
De measte OV-wurknimmers wolle ôf fan de mûlkapkesplicht (78%). Goed 86% fan de wurknimmers yn it iepenbier ferfier fynt dat it kabinet sa gau as mooglik dúdlikheid jaan moat oer it ôfskaffen fan de mûlkapkeplicht yn bussen, trenen en trams. Oan de enkête diene 738 CNV-leden mei. Sy wurkje yn it busferfier en by it spoar.
09:18
Syktefersom soarch wer heger
It syktefersom yn de soarchsektor is yn jannewaris wer fierder tanaam, mei troch tadwaan fan de tige besmetlike omikronfariant fan it coronafirus. Fan alle soarchmeiwurkers yn Nederlân - hast in miljoen - siet yn jannewaris 8,8 prosint siik thús.
Dat meldt it databedriuw Vernet, dat spesjalisearre is yn soarchsifers.
Yn totaal wiene deis sa'n 85.000 meiwurkers dus net beskikber. Vernet telt wurknimmers dy't yn karantêne sieten, of út foarsoarch thúsbleaunen yn ôfwachting fan in coronatestútslach, net mei. Yn fergelyk mei in jier lyn lei it fersom yn jannewaris 2022 goed 15 persint heger, lit it bedriuw witte.
"De stijging wordt met name veroorzaakt door een enorme toename van het korte verzuim", leit Vernet út. "Dit valt samen met de periode waarin de zeer besmettelijke Covid-variant omikron in Nederland opkwam."
09:00
Wolkom
Wolkom by it liveblog fan tongersdei 24 febrewaris oer de ûntwikkelingen oangeande it coronafirus yn Fryslân. Us liveblog fan juster neilêze kin hjir.