Liveblog | 17 febrewaris

Coronanijs 17 febrewaris: Húsdokters yn de knipe troch syktefersom

Yn dit liveblog melde we it lêste nijs oer it coronafirus:

  • RIVM meldt tongersdei 3.100 nije coronabesmettingen yn Fryslân;
  • Der lizze op it stuit 31 coronapasjinten yn de Fryske sikehuzen;
  • Stichting tsjin frijheidsbeheinende maatregels yn de soarch wurdt opheft;
  • De Nederlânske sikehuzen hâlde coronamaatregels foarearst oan.

Dit liveblog is ook in het Nederlands te volgen.

Bywurke: 17 febrewaris, 22:59
tongersdei 17 febrewaris
22:58

Wy waaie ús bêd yn

Wy slute it liveblog foar hjoed. Tank foar it folgjen en moarn melde wy ús wer.
22:56
21:22

Gezondheidsraad komt mei advys oer twadde booster

De Gezondheidsraad publisearret freed in advys oer in mooglike twadde boosterprik tsjin it coronafirus. Minister Ernst Kuipers (Folkssûnens) hie ein jannewaris om dat advys frege.
Kuipers wol fan de Gezondheidsraad hearre oft it nedich is om 'yn de kommende moannen' in nije boosterkampanje út te fieren, en oft it helpt by it behearskjen fan de pandemy. Hy wol bygelyks witte oft alle folwoeksenen dan in boosterprik oanbean krije moatte soene of allinnich minsken út risikogroepen. Ek freget de minister hokker faksins brûkt wurde moatte soene en hoefolle tiid der tusken de twadde booster en de lêste prik sitte moatte soe.
Kuipers' foargonger, Hugo de Jonge, hold earder rekken mei op syn minst noch trije boosterrondes. De earste dêrfan soe yn it twadde fearnsjier fan dit jier wêze, dus yn april, maaie of juny. Yn it neijier soe in nije ronde folgje, en takom jier soe der noch in kampanje wêze kinne.
20:28

Teststrjitten ticht troch stoarm

In soad teststrjitten en faksinaasjelokaasjes sille de kommende dagen ticht wêze fanwegen de stoarm Eunice. Dy lûkt fan freedtemiddei oant sneontemoarn oer Nederlân. Oan de kust wurde wynstjitten oant 130 kilometer yn de oere ferwachte. It KNMI warskôget dêrfoar en hat koade oranje ôfjûn. Meardere lokaasjes wienen al ticht fanwegen de stoarm Dudley tongersdei.
17:35

Nederlân grutte brânkearn op coronakaart ECDC

Yn grutte dielen fan Europa is in delgong fan it tal coronagefallen te sjen, mar Nederlân is ien fan de grutste brânkearnen op de kaart fan sûnenstsjinst ECDC.

De kaart fan ECDC hat fjouwer kleuren: grien, oranje, read en donkerread. Likernôch hiel Europa stiet al wiken op donkerread, it heechste warskôgingsnivo. Yn 144 fan de 216 regio's wurdt it tal besmettingen lykwols minder. Yn 72 gebieten nimt it tal positive tests noch hieltyd ta.

Nederlân is foar de fjirtjinde kear donkerread en hat sadwaande noch hieltyd it heechste warskôgingsnivo. Oerisel is nei ferhâlding de provinsje mei de measte positive tests yn Nederlân. Yn de ôfrûne twa wiken wiene der 9450 positive tests de 100.000 ynwenners. Dizze provinsje stiet dêrmei fjirde op de Europeeske ranglist fan plakken mei de measte coronabesmettingen. Fryslân stiet op it tsiende plak.

Efterstân fuortwurke

It RIVM hat ferline wike de grutte efterstân fan it tal positive coronatests fuortwurke. Dizze sifers binne earder net meinaam op de kaart fan it ECDC; dêrom is it tal positive testen no sa heech, lit it RIVM witte.
16:52

Húsdokters yn de knipe troch syktefersom

Troch it hege tal coronabesmettingen komme hieltyd mear húsdokters yn de knipe. Neffens de Landelijke Huisartsen Vereniging (LHV) sit yntusken 26 persint fan it personiel fan de húsdokterpraktiken thús. "Dat trekt een zware wissel op de huisartsenzorg", seit de LHV.

Troch it syktefersom moat in diel fan de soarch útsteld wurde. Yn guon situaasjes ha húsdokters allinne noch romte foar driuwende gefallen." Het is nu roeien met de riemen die we hebben", seit LHV-voorzitter Mirjam van 't Veld.

By njoggen fan de tsien praktiken is der útfal fan personiel troch sykte en karantêne. De praktiken moatte dêrom "noodgedwongen creatief zijn" mei roasters. It personiel moat regelmjittich oerwurkje en de húsdokterpraktiken binne minder goed berikber.

Maatregels

De LHV fynt dat it wichtich is dat minsken har oan de foarsoarchsmaatregels hâlde, ek al wurde de lanlike coronamaatregels ferromme. Neffens de feriening binne mûlkapkes en de oardel meter ôfstân noch altiten nedich yn de húsdokterpraktiken.
15:40

3.100 nije coronabesmettingen yn Fryslân, 17 sikehûsopnames

Yn Fryslân binne yn de ôfrûne 24 oeren 3.100 nije coronabesmettingen registrearre troch it RIVM. It trochsneed tal besmettingen oer de ôfrûne sân dagen yn Fryslân leit no op 3.368. Woansdei lei it op 3.484 besmettingen, in wike lyn op 4.483. Yn Fryslân binne yn de ôfrûne 24 oeren gjin stjergefallen fêststeld as gefolch fan it coronafirus.
© Lennard Geerts, Omrop Fryslân
Der binne 17 Friezen mei it coronafirus opnaam yn it sikehûs. Dat giet om ynwenners fan de gemeenten Noardeast-Fryslân (3), Achtkarspelen, Hearrenfean, Ljouwert, Súdwest-Fryslân en Waadhoeke (allegear 2). En Harns, Eaststellingwerf, Opsterlân, Skylge,

Lanlik

Lanlik leit it tal nije coronabesmettingen op 56.390. It trochsneed tal besmettingen fan de ôfrûne sân dagen is 62.833.
14:21

Opnij minder coronapasjinten yn Nederlânske sikehuzen

It tal coronapasjinten yn de Nederlânske sikehuzen is tongersdei opnij omleech gien. Dat docht bliken út de sifers fan it Landelijk Coördinatiecentrum Patiënten Spreiding (LCPS). Op it stuit lizze der noch 1588 coronapasjinten; 62 minder as woansdei.
It tal pasjinten mei corona op de IC's gie mei 5 omleech nei 168. Op de ferpleechôfdielingen lizze no 1420 coronapasjinten, 58 minder as woansdei.
Der kamen 167 nije coronapasjinten binnen op de ferpleechôfdielingen. Op de IC's giet it om 10 nije pasjinten; 14 minder as in dei earder.
13:20

Nederlânske sikehuzen hâlde coronamaatregels foarearst oan

Sikehûs Nij Smellinghe yn Drachten © Omrop Fryslân, Joris Kalma
Sikehuzen dogge foarearst net mei oan de lanlike ferrommingen fan coronamaatregels. Mûlkapkes bliuwe ferplichte en minsken moatte noch hieltyd 1,5 meter ôfstân hâlde, sa melde ferskate sikehuzen lykas UMC Utrecht en Erasmus MC.

Nij Smellinghe yn Drachten makke woansdei al bekend dat de coronamaatregels foarearst yn it sikehûs fan krêft bliuwe.
"Omdat we in ziekenhuis Nij Smellinghe te maken hebben met kwetsbare patiënten, maken we zorgvuldige afwegingen. Daar is tijd voor nodig. Tot die tijd gelden in ons ziekenhuis de huidige coronamaatregelen", sa stiet op de Facebook-side fan it Drachtster sikehûs.
12:30

Loftfeartsektor wol ôf fan coronamaatregels foar faksinearre reizigers

De loftfeartsektor fynt dat der in ein komme moat oan de maatregels foar reizgers dy't faksinearre binne tsjin it coronafirus. It giet dat bygelyks om karantêne- en testferplichtingen. Neffens de ynternasjonale brânsorganisaasje IATA binne reizgers gjin grutter risiko foar de fersprieding fan it coronafirus as oare minsken.
© ANP / Hollandse Hoogte / Robin Utrecht
Neffens direkteur Willie Walsh ha de maatregels in soad ympakt hân op ekonomyen en minsken, mar kin it de fersprieding fan it coronafirus net fierder tsjinhâlde. Hy fynt dat it tiid wurdt dat de maatregels ferdwine "nu we leren leven en reizen in een wereld die in de nabije toekomst risico's van Covid-19 zal kennen", sa seit Walsh.

Neffens de ynternasjonale brânsorganisaasje wurde der hieltyd mear fleantickets kocht, nettsjinsteande alle maatregels. Begjin febrewaris lei de ferkeap op likernôch 50 persint fan it âlde nivo. Yn jannewaris siet dit noch op sa'n 40 persint fan it âlde nivo.
10:44

31 coronapasjinten yn Fryske sikehûzen

Yn de Fryske sikehûzen lizze op it stuit 31 coronapasjinten; 3 pasjinten hjirfan komme net út Fryslân. Op de Fryske IC's lizze op it stuit 4 minsken mei COVID-19, sa meldt it Acute Zorgnetwerk Noord-Nederland.
Moandei leine der yn de Frykse sikehûzen 29 pasjinten mei corona.
Yn totaal lizze der yn de noardlike sikehûzen 79 coronapasjinten; dêrfan lizze der 15 op in IC-bêd. Moandei gie it om 69 coronapasjinten yn de sikehuzen fan Fryslân, Grinslân en Drinte.
10:24

Faksinprodusint Moderna hat plannen foar nij kantoar yn Nederlân

Faksinprodusint Moderna wol yn Nederlân in kantoar iepenje foar kommersjele aktiviteiten. It is noch net bekend wêr't it kantoar fan it Amerikaanse bedriuw komme moat en hoefolle banen it opsmite sil. Yn Geleen stiet op it stuit ien fan de fabriken dy't Moderna-coronafaksins meitsje.

Moderna is benammen bekend fan it coronafaksin Spikevax, in mRNA-faksin.
© ANP / Hollandse Hoogte / Robin Utrecht
09:39

Mear syktefersom; wurknimmers earder wer better

It syktefersom yn Nederlân is yn jannewaris fierder tanaam. Dat melde arbotsjinsten ArboNed en HumanCapitalCare. Foar it earst sûnt it begjin fan de pandemy waard mear as de helte fan it syktefersom feroarsake troch corona. Benammen yn de sûnenssoarch en de yndustry wiene in soad minsken siik.

De arbotsjinsten sjogge wol dat wurknimmers dy't covid hân ha, no flugger wer oan it wurk kinne dan doe't de deltafariant noch dominant wie. "Hoewel corona meer ziekmeldingen veroorzaakt, zien we sinds de komst van de omikronvariant en boostercampagne dat besmette werknemers sneller herstellen", seit Jurriaan Penders fan HumanCapitalCare. "Van deze groep is 73 procent na twee weken hersteld. In november, toen we nog te maken hadden met de deltavariant, was dat 57 procent."
08:25

Gjin positive tests yn Peking

Coronamaatregels yn Peking © ANP
De Olympyske Spelen fan Peking hat foar it earst in dei sûnder positive coronatests efter de rêch. De hast 69.000 testen dy't woansdei útfierd waarden, leveren allinnich negative útslaggen op. Yn de dagen dêrfoar teste hieltyd noch in inkeling posityf.
Op it fleanfjild fan Peking kamen woansdei sân dielnimmers oan de Spelen oan. Sy testen allegearre negatyf. Dat jilde ek foar alle dielnimmers yn de sletten 'superbubbel'. Sy moatte alle dagen in coronatest ûndergean.
08:22

SOVIDZ hâldt op

De stichting Stop Onnodige Vrijheidsbeperking In De Zorg (SOVIDZ) wurdt opheft. Dat hat Berber Bijma út Frjentsjer, dy't foarsitter fan de lanlike stichting is, bekend makke.
SOVIDZ waard yn juny 2020 oprjochte om de Nederlânske steat en de Inspectie Gezondheidszorg en Jeugd op te roppen wat te dwaan oan alle soarchynstellingen dêr't bewenners beheind waarden yn harren frijheid fanwege de coronamaatregels.
Berber Bijma © Omrop Fryslân, Timo Jepkema
"We ha al moannen lang gjin meldingen mear krigen fan minsken dy't 'achter slot en grendel' set wurde. Dus wy tinke dat ús wurk no wol dien is", seit Bijma.
08:22

Goeiemoarn

Wolkom by it liveblog fan tongersdei 17 febrewaris oer de ûntwikkelingen oangeande it coronafirus yn Fryslân. Us liveblog fan juster neilêze kin hjir.