Coronanijs 19 desimber: Net yngripe by huldiging Hearrenfean is 'heel begrijpelijk'

Oant safier it liveblog fan snein 19 desimber. Moarn is der wer in nijenien.

Boargemaster Sybrand Buma fan Ljouwert begrypt wol dat der yn Hearrenfean net yngrepen is, doe't hûnderten fans de ploech ûnthellen nei it winnen fan de Fryske derby. Dêrby waarden de coronaregels net neilibbe.

"Als burgemeester moet je steeds weer afwegen wat de risico's zijn, en wat je wel en niet toe kan staan", seit Buma. "Ik kan me goed voorstellen dat ingrijpen meer ellende kan veroorzaken dan rustig laten uitdoven. Daar is een hele begrijpelijke keuze gemaakt."

Foarsitter Jacco Vonhof fan MKB-Nederland fynt dat ûndernimmers finansjeel mear kompensearre wurde moatte foar de ynkomsten dy't se de kommende tiid misrinne. "Als je de laatste twee weken, de beste twee weken van je jaar, dicht moet, maar je hebt de rest van het kwartaal goed gedraaid, kwalificeer je niet. Dat zou echt onbestaanbaar moeten zijn, dus dat moet gewoon naar 100 procent", sei Vonhof yn WNL Op Zondag.

Op de parsekonferinsje waard saterdei in hurde lockdown ôfkundige. Dat betsjut dat allinnich essinsjele winkels iepen bliuwe meie. Under oare net-essinsjele winkels, hoarekasaken en teäters moatte de doarren oant en mei 14 jannewaris slute.

Op de lêste dei foar it yngean fan de lockdown binne der mear as 20 miljoen pintransaksjes teld. Neffens Betaalvereniging Nederland wiene der likernôch 20 persint mear transaksjes as oars, de omset lei sa'n 35 persint heger as oars. De transaksjes wiene saterdei goed foar in omset fan sa'n 656 miljoen euro.

Njonken de driigjende lockdown spile ek mei dat it de lêste saterdei foar de Krystdagen wie.

It tal coronapasjinten yn de sikehûzen yn ús lân is op 'e nij sakke. Der lizze op it stuit 2323 coronapasjinten yn it sikehûs, dat docht bliken út de lêste sifers fan it Landelijk Coördinatiecentrum Patiënten Spreiding (LCPS). It binne der 23 minder as saterdei. Op de ic's lizze 609 pasjinten, dat binne der njoggen minder as saterdei.

Yn Fryslân binne yn de ôfrûne 24 oeren 611 nije coronabesmettingen registrearre. Dat meldt it RIVM. It binne der 6 minder as saterdei. Lanlik leit it tal nije coronabesmettingen op 13.331.

Yn Fryslân binne yn de ôfrûne 24 oeren njoggen stjergefallen fêststeld as gefolch fan it coronafirus. Der binne trije Friezen mei it coronafirus opnommen yn it sikehûs.

De GGD's sille de prikkapasiteit maksimaal útwreidzje. Op lokaal en regionaal nivo wurdt sjoen wêr't noch útwreide wurde kin. De GGD's wurkje dêrby gear mei sikehûzen, húsdokters, it Reade Krús en Definsje. De GGD's sille de kommende wiken "alles op alles" sette om elkenien fan 18 jier en âlder een boosterprik oan te bieden.

Fakbûn FNV en wurkjouwersorganisaasje VNO-NCW fine dat der in plan komme moat om op de lange termyn mei it coronafirus om te gean. Ingrid Thijssen fan VNO-NCW neamt de nije lockdown "superpijnlijk, echt heel verdrietig". De organisaasjes tinke dat ûndernimmers troch de krisis fallyt gean sille.

Ferskate fakbûnen en wurkjouwersorganisaasjes freegje al in jier om sa'n plan foar de lange termyn, seit Thijssen. Se seit noch neat heard te hawwen oer it opsetten fan sa'n plan.

It is in goeie saak dat Nederlân no yn in strange lockdown sit. Dat seit Anne-Marie van Elsacker. Se is de baas fan it medysk laboratoarium Izore, yn Ljouwert. "Het klinkt misschien gek, maar persoonlijk ben ik wel gelukkig met deze maatregelen", seit Van Elsacker. "We hebben zo vaak te laat ingegrepen, het is mooi dat we nu een keer vroeg zijn."

De omikronfariant is ferfelend, seit Van Elsacker, omdat dy hiel hurd om him hinne grypt. "We hebben niet de luxe om te wachten, we moeten vol in de rem." De boosterprik hat minder, mar wol deeglik in effekt, seit se. "Vandaar dat men daar op hamert. Het is het beste dat we hebben."

Hoarekasaken bliuwe mei grutte foarrieden sitten, nei't it kabinet saterdei in hurde lockdown ôfkundige hat en de saken mei de Krystdagen net iepen kinne. De foarrieden binne foar in grut part ûnferkeapber en ek net alles kin lang bewarre wurde.

"We zitten met een enorme kostenpost", seit Gilles Harthoorn fan Hotel Restaurant Duinzicht op Skiermûntseach. "We kunnen niet alles invriezen, veel is rijp voor de container. De voorraad naar de voedselbank brengen is geen optie, dat is op een eiland wat lastiger dan aan de wal." Syn hotel en restaurant wie fol boekt foar de Krystdagen. "Ze laten ons in de stront zakken, het is een grote smeerlapperij."

De GGD's wolle takom wike 1 miljoen coronaprikken sette, dêrnei wolle se opskale nei 1,5 miljoen prikken de wike, seit GGD GHOR Nederland. Dat alles mei as doel om safolle mooglik minsken sagau mooglik in boosterprik oanbiede te kinnen.

Der wurdt by de GGD's besocht om de prikôfspraken foar 60-plussers nei foaren te heljen en dizze groep dit jier grutdiels noch te prikken.

Der feroaret eins net in soad foar teäters en skouboargen, mei de yn de parsekonferinsje ôfkundige lockdown. Dat seit de Vereniging van Schouwburg- en Concertgebouwdirecties (VSCD). "Het stelde al niet veel voor wat we als theaters konden doen met een sluitingstijd van 17.00 uur. En nu is het de sluiting geworden die het eigenlijk al voelde te zijn", seit Siebe Weide, waarnimmend direkteur fan de VSCD.

De feriening hat ek noed oer de selsstannigen dy't yn de teäters wurkje, om't stipe út de saneamde TOZO-regeling wei earder al stillein is.

It OMT advisearret yn it ramt fan de boosterkampanje te ûndersykjen oft it kertierke wachtsjen nei it krijen fan in coronafaksin ferdwine kin. As minsken nei in prik net mear in kertier sitten bliuwe hoege, soene der flugger boosterprikken útdield wurde kinne.

No moatte minsken dy't in prik helje nei de tiid noch in kertier ûnder tafersjoch sitten bliuwe, om te sjen oft minsken in reaksje krije fan de prik. Demisjonêr soarchminister Huge de Jonge sei saterdeitejûn yn de parsekonferinsje dat er noch net fan it kertier ôf woe. "Nee daar ga ik niet mee stoppen. En trouwens, juist de deskundigen zeggen: doe dat ook niet. Ook internationaal is dat niet gebruikelijk om dat te doen", sei De Jonge.

De ekstra ynlaske coronaparsekonferinsje fan it kabinet hat sneontejûn yn totaal yn trochsneed hast 6,9 miljoen sjoggers lutsen. Dat docht bliken út sifers fan Stichting KijkOnderzoek. Dat wiene der in soad mear as de 5,2 miljoen sjoggers fan de foarige parsekonferinsje fan ôfrûne tiisdei.

De registraasje op NPO 1 waard troch wat mear as 4 miljoen minsken sjoen. It wie dêrmei it bêst besjoene programma fan de dei. Op RTL 4 seagen goed 2,1 miljoen minsken hoe't premier Mark Rutte, coronaminister Hugo de Jonge en OMT-foarsitter Jaap van Dissel nije maatregels oankundigen en útleinen. Nei SBS6 seagen 656.000 mensen.

Sneontejûn waard bekend dat Nederlân oant heal jannewaris yn in hurde lockdown giet. Fan sneintemoarn 05.00 oere binne ûnder mear alle net-essinsjele winkels en tsjinsten sa as sportskoallen sletten en wurdt advisearre om thús net mear as twa persoanen te ûntfangen. Mei de krystdagen wurdt in útsûndering makke en giet it oantal nei fjouwer.

Sûnt 05.00 oere jilde nije en strangere maatregels tsjin it coronafirus. Dizze waarden sneon yn in ekstra parsekonferinsje oankundige troch demisjonêr premier Mark Rutte en demisjonêr minister fan Folkssûnens Hugo de Jonge fanwegen de rappe opmars fan de omikronfariant fan corona.

Dizze lockdown is ien fan de swierste sûnt it begjin fan de pandemy. De nije maatregels duorje yn alle gefallen oant 14 jannewaris 2022.

Wolkom by it liveblog fan snein 19 desimber oer de ûntwikkelingen oangeande it coronafirus yn Fryslân. Us liveblog fan juster neilêze kin hjir.