Liveblog | 13 desimber 2021

Coronanijs 13 desimber: Ferlinging jûnslockdown | Mooglik earder krystfakânsje

Yn dit liveblog melde we it lêste nijs oer it coronafirus.
Bywurke: 13 desimber 2021, 22:28
moandei 13 desimber 2021
22:26

Oant moarn!

Oant sa fier it liveblog fan moandei 13 desimber. Tank foar it folgjen, moarn is der wer in nij liveblog.
20:22

Ferlinging jûnslockdown soarget foar omsetferlies yn hoareka

Skuldhelpferlieners krije it hieltyd drokker, no't hieltyd mear bedriuwen de rekkens net mear betelje kinne. It hat benammen te krijen mei it feit dat de stipepakketten fan de oerheid ôfboud binne en doarwaarders ek wer oan der slach binne. In soad hoarekaûndernimmers ha it ek dreech. Om't se oerdeis iepen binne krije se minder stipe. En it wurdt der net makliker op no't de jûnslockdown ferlinge wurdt.
Marco Poldertvaart fan 't Havenmantsje yn Harns ferwachte in ferlinging fan de jûnslockdown al:
19:28

Bern mooglik dochs earder mei krystfakânsje

It liket derop dat basisskoallen dochs in wike earder mei krystfakânsje sille, sizze Haachske boarnen. Sûnder maatregels soe de krystfakânsje op 24 desimber begjinne.
De eangst is dat basisskoalbern dan gau dêrnei famyljeleden besmette kinne by krystbesite. As it kabinet de fakânsje nei foaren hellet, ha skoalgeande bern in wike foar de krystdagen minder kontakt mei-inoar en is de kâns op besmetting lytser.
It demissionaire kabinet hat ek noed oer de besmetlikere omikron-fariant fan it coronafirus. It nei foaren heljen fan de krystfakânsje waard earder al ferskate kearen advisearre troch it Outbreak Management Team (OMT).
17:04

Supermerken wolle langer iepen bliuwe fanwegen de krystdagen

Supermerken freegje it demisjonêre kabinet oft se nei 20.00 oere jûns iepen bliuwe kinne no't de krystdagen foar de doar steane. "We zien er flink de noodzaak toe vanwege de spreiding van klanten", seit in wurdfierder fan koepel Centraal Bureau Levensmiddelenhandel.
© Omrop Fryslân, Aise van Beets
Troch de feestdagen is it yn desimber altiten drokker yn de supermerken. "De kerstvakantie begint pas na kerst. Veel mensen werken nog tot de vrijdag voor kerst, omdat kerst in het weekend valt", seit de wurdfierder. "Dat zorgt voor de noodzaak om winkels langer open te laten blijven. We blijven erop hameren."

Kabinet wol jûnslockdown ferlingje

Yn it wykein lekte út dat it kabinet fan plan is de jûnslockdown oan te hâlden. Dat betsjut dat net-essinsjele winkels om 17.00 oere de doarren ticht dwaan moatte en dat essinsjele winkels om 20.00 oere slute.
16:52

Gemeente Skylge stjoert ynwenners boppe de 50 in útnûging foar de boosterprik

16:25

CNV wol sa gau as mooglik in boosterprik foar ûnderwiispersoniel

Minsken dy't yn it ûnderwiis wurkje moatte sa gau as mooglik in boosterprik krije kinne, fynt fakbûn CNV. "Voor ouder personeel en voor mensen met een medische indicatie is de laatste prik inmiddels al langer dan zes maanden geleden, en neemt de bescherming af", seit it bûn.
© Omrop Fryslân, Arjen Bosselaar
Foar de feiligens fan it personiel en foar de kontinuïteit fan it ûnderwiis is de boosterprik wichtich, seit CNV. Minsken yn it ûnderwiis rinne mear risiko's op besmetting. "Ze staan in de vuurlinie zonder optimale bescherming".

Oare folchoarder

Freed sei demisjonêr minister Hugo de Jonge fan Folkssûnens dat it kabinet der oer neitinkt om de folchoarder fan de faksinaasje te feroarjen. No wurde minsken noch útnûge foar in prik op basis fan har bertejier.
15:25

RIVM meldt 648 nije coronabesmettingen yn Fryslân

Yn Fryslân binne yn de ôfrûne 24 oeren 648 nije coronabesmettingen registrearre. Dat meldt it RIVM. It binne der 40 minder as snein. Doe waarden 688 besmettingen meld.
De coronatestlokaasje fan de GGD yn Ljouwert © Omrop Fryslân, Aise van Beets
Yn trochsneed binne yn de ôfrûne wike alle dagen 722 besmettingen meld yn Fryslân. Snein lei dat trochsneed op 762 besmettingen, in wike lyn op 826.

Lanlik

Lanlik leit it tal nije coronabesmettingen op 13.844. It is it leechste tal sûnt 14 novimber.
It trochsneed tal besmettingen fan de ôfrûne sân dagen is 17.376.
15:10

Wer wat minder coronapasjinten yn Nederlânske sikehûzen

It tal coronapasjinten yn de Nederlânske sikehûzen is yn de ôfrûne 24 oeren wer wat ôfnaam. Foar de fjirde dei op rige wiene it der minder as 2800, docht bliken út sifers fan it Landelijk Coördinatiecentrum Patiënten Spreiding.

2748 pasjinten

Op it stuit soe it gean om 2748 coronapasjinten; dat binne 14 minder as snein. Op de ic's lizze 630 coronapasjinten: 12 minder as in dei lyn.
Op de ferpleechôfdielingen lizze no 2118 pasjinten mei Covid; twa minder as snein.
© Omrop Fryslân, Willem de Vries
De ôfrûne 24 oeren binne 29 nije pasjinten mei it firus opnaam op de ic's. Op de ferpleechôfdielingen giet it om 183 nije coronapasjinten. It is de leechste ynstream fan de ôfrûne moanne. It LCPS sei ferline wike dat de ynstream fan pasjinten mei corona oer it hichtepunt hinne wie.
14:43

De Jonge: tempo boosterprikkampanje omheech

It tempo fan de boosterprikkampanje giet fierder omheech. Dat seit demisjonêr minister De Jonge fan folkssûnens. It moat de flugge fersprieding fan de omikronfariant tsjingean.
"Wat we leren uit Engeland is dat het zich snel verspreidt", seit De Jonge, dy't tiisdei mear fertelle sil. "Wat we ook leren uit Engeland is dat het versnellen van het boosteren wel helpt."
14:32

GGD iepenet testlokaasje yn Dokkum

14:14

Peter van der Voort fan UMCG: "We zijn helemaal niet over de piek heen"

IC-baas Peter van der Voort, dy't fan Boksum komt, seit tsjin RTV Noord dat ferrommingen fan de maatregels der net komme moatte. "Of het strikter moet, is een reëlere vraag."
© Omrop Fryslân
It tal pasjinten dat binnen komt op de ic wurdt minder, mar it tal pasjinten mei Covid op de ic's nimt noch hieltyd ta, seit Van der Voort. Op de intensive care yn it UMCG wurde op it stuit 17 fan de 18 coronabêden brûkt.
Van der Voort is it dan ek net iens mei LCPS-foarsitter Ernst Kuipers, dy ferline wike sei dat de ynstream fan nije pasjinten oer de pyk hinne is. "We zijn helemaal niet over de piek heen. Moet je je voorstellen hoe dit aankomt bij verpleegkundigen en artsen die zich een slag in de rondte werken en het nauwelijks voor elkaar krijgen?"
13:28

Ljouwerter hoareka wol mear stipe; skriuwt brief oan Buma

De coronastipepakketten binne net genôch om de holle boppe wetter te hâlden. Dat skriuwt de Ljouwerter ôfdieling fan Koninklijke Horeca Nederland oan boargemaster Buma fan Ljouwert.
Yn de brief stiet dat de NOW, de Noodmaatregel Overbrugging Werkgelegenheid, net genôch is. Boppedat is de TVL, de Tegemoetkoming Vaste Lasten, basearre op oktober, doe't de omset ek al leger wie.
© ANP Foto
Op it stuit ha de hoarekasaken ek net in soad omset. Oant 17.00 komme der net in soad klanten en ek it ôfheljen en it besoargjen smyt minder op, sa skriuwt KHN.

'Hoarekameiwurkers sykje oar wurk'

Eijer is ek benaud dat in protte meiwurkers earne oars wurkje wolle. "Voor het flexibele personeel zijn er te weinig uren beschikbaar", skriuwt de KHN. "In de decembermaand extra vervelend, want zij hebben geld nodig voor de feestdagen en kiezen dus massaal voor ander werk."
13:00

99 coronapasjinten yn de Fryske sikehûzen

© ANP Foto
Der lizze no 99 pasjinten mei Covid-19 yn de Fryske sikehûzen. Dêrfan lizze der 21 op de ic's.
Fan de minsken dy't mei Covid-19 opnaam binne, komme 18 pasjinten út in oare regio. Dat binne der seis mear as ôfrûne freed. Op de ic's lizze op it stuit fiif minsken út in oare regio.
12:51

Ministearje: sawat alle basisskoallen ha selstesten krigen

It ministearje fan Underwiis lit witte dat sawat alle skoallen yn it basisûnderwiis selstesten krigen ha foar har learlingen. Bern yn groep 6, 7 en 8 moatte har twa kear yn de wike teste op Covid-19. Dat jildt ek foar it personiel.
Mei de ferdieling fan de testen oer de skoallen waard ferline wike úteinset. Tongersdei die út in rûngong fan Omrop Fryslân lykwols bliken dat in grut part fan de Fryske basisskoallen de selstesten noch net krigen hie.
No moandei wurde noch selstesten brocht nei de skoallen dy't ferline wike mist binne, seit it ministearje.
12:48

Koudumer húsdokters jouwe boosterprik yn De Klink

Tongersdei en freed kinne minsken boppe de 60 in boosterprik helje yn De Klink yn Koudum. De prik wurdt jûn oan minsken dy't in brief krigen ha fan de húsdokterspraktyk yn Koudum en Wikel. De húsdokters sille sels de prik jaan, mei assistinsje fan de GGD. Ek op 3 jannewaris kinne minsken nei De Klink komme foar in prik.

Oare ynwenners Súdwest-Fryslân

Ynwenners út Súdwest-Fryslân dy't net by de húsdokterpraktyk sitte, kinne maile nei boosterkoudum@gmail.com, om te sjen oft der noch in plakje foar se is. Mei dit e-mailadres kinne minsken har ek ôfmelde.
© ANP
"We hienen de winsk dat elkenien dy't der foar yn oanmerking komt, de boosterprik foar de krystdagen krije kin", seit húsdokter en inisjatyfnimster Lijklema fan Wikel. "We seagen dat de GGD it tige drok hat, en we tochten: we kinne ús stientsje bydrage."
Grietje Lijklema, húsdokter yn Wikel, oer de boosterprik-aksje yn Koudum
11:20

Hiel wat minder bûtenlânske toeristen nei Nederlân yn 2020

Der kamen yn 2020 hiel wat minder bûtenlânske toeristen nei Nederlân. Dat makke it CBS hjoed bekend.
Yn 2020 kamen 7,3 miljoen bûtenlânske toeristen nei ús lân: 12,9 miljoen minder as yn 2019. Dat is in delgong fan 64 persint.
© Omrop Fryslân, Jitze de Vries
Benammen út België en in Feriene Keninkryk kamen minder minsken. It tal toeristen út dizze lannen gie omleech mei 75 persint (Feriene Keninkryk) en 56 persint (België).
10:45

Bertejierren 1957, 1958 en 1959 kinne ôfspraak meitsje foar in boosterprik

09:53

CBS: tal falliseminten gie yn novimber flink omheech

It tal bedriuwen dat fallyt gie is yn de moanne novimber flink omheech gien. Neffens sifers fan it Centraal Bureau Statistiek binne der yn novimber, los fan it tal ienmanssaken, 166 falliseminten west oer bedriuwen en ynstellingen.
Foar de coronakrisis wiene der lykwols mear bedriuwen dy't fallyt giene. Troch de stipe fan de oerheid koene in protte bedriuwen it no rêde. Ek lieten rjochters sûne bedriuwen fanwegen de coronakrisis minder gau fallyt gean.

Leanstipe

Yn oktober einige de leanstipe foar ûndernimmers. Neffens it CBS is it mooglik dat dit soarget foar it hege tal falliseminten yn novimber.
Bedriuwen kinne fanwegen de coronamaatregelen wer leanstipe oanfreegje foar novimber en desimber.
07:27

Big Brother Award foar minister De Jonge

Demisjonêr minister Hugo de Jonge (Folkssûnens) hat dit jier de twiveleftige eare om winner te wêzen fan in Big Brother Award. Dy awards wurde elk jier útrikt troch burgerrjochte-organisaasje Bits of Freedom oan 'de grutste privacyskeiners fan Nederlân'.
In QR-koade © Omrop Fryslân, Earryt Sijens
De Jonge krige mei in romme mearderheid fan de stimmen de Publykspriis fanwegen de ynfiering fan it coronatagongsbewiis. Dy maatregel is neffens Bits of Freedom "onvoldoende gemotiveerd". Dat it kabinet de ynfiering fan it 2G-belied, wêrby in negative test net mear genôch is om in QR-koade te krijen, foarearst útsteld hat, jûget de organisaasje ta.
07:22

Wurkjouwers kinne oanfraach dwaan foar nijste leanstiperegeling

Wurkjouwers kinne fan moandei ôf in oanfraach dwaan by útkearingsynstânsje UWV foar de nijste leanstiperegeling. Mei de saneamde Noodmaatregel Overbrugging Werkgelegenheid (NOW) stipet it demisjonêre kabinet bedriuwen dy't rekke wurde troch de coronamaatregels.

Yn de sânde perioade fan de NOW is it nij dat bedriuwen dy't nei 1 febrewaris 2020 start binne yn oanmerking komme foar leanstipe. Wurkjouwers kinne de coronastipe foar de moannen novimber en desimber oant en mei 31 jannewaris oanfreegje.
07:15

Grapperhaus skoot oan by corona-oerlis Veiligheidsberaad

It Veiligheidsberaad komt moandeitejûn digitaal byinoar om bypraat te wurden oer de coronamaatregels dy't it kabinet fan plan is te nimmen foar de kommende tiid. Demisjonêr minister Ferd Grapperhaus (Justysje) skoot oan by it oerlis fan de 25 boargemasters dy't foarsitter binne fan harren feilichheidsregio.
07:12

Kabinet liket advys OMT oer te nimmen: jûnslockdown ferlinge

© ANP
It kabinet liket fan doel om it advys fan it OMT oer te nimmen. Dat soe betsjutte dat de jûnslockdown ferlinge wurdt. Tiisdei is der in nije parsekonferinsje fan demisjonêr premier Mark Rutte en soarchminister Hugo de Jong oer de maatregelen.
07:00

Wolkom by dit liveblog

Wolkom by it liveblog fan moandei 13 desimber oer de ûntwikkelingen oangeande it coronafirus yn Fryslân. Us liveblog fan juster neilêze kin hjir.