Liveblog | 6 desimber 2021

Coronanijs fan 6 desimber: Foarearst komt der gjin 2G-systeem

Yn dit liveblog melde wy it lêste nijs oer it coronafirus.
Bywurke: 6 desimber 2021, 22:27
moandei 6 desimber 2021
22:25

Oant safier

Tank foar it folgjen, moarn is der wer in nij liveblog.
20:50

3500 mear deaden as oars, Omtzigt wol ûndersyk

Der binne mear minsken deagien en dat moat neier ûndersocht wurde. Dat skriuwt Twadde Keamerlid Pieter Omtzigt yn syn eigen weblog.
Yn novimber binne 3500 minsken mear deagien as oars. Dat binne fyftich bussen fol, skriuwt Omtzigt.
Dat hat grutte ynfloed op de folkssûnens en it wolwêzen fan in soad Nederlanner, bygelyks de rouwende neibesteanden. Dêrom is it fan grut belang om te witten wat de oarsaak is fan al dy fersterrens. As der in fleantúch delstoart, wurdt der ek ûndersyk dien. It RIVM registrearre yn novimber 912 deaden troch COVID.
20:28

Mei prinses Beatrix giet it 'top'

Keninginne is besmet mei corona, mar it giet 'helemaal top' mei har. Dat liet har soan Willem-Alexander moandei witte oan it telefyzjeprogramma Blauw Bloed. "Er is gelukkig helemaal niks aan de hand. Alleen, ze was een beetje verkouden, dacht dat het de airconditioning was in de tropen. Ze heeft getest en was positief", sei de kening.
Sneon waard bekend dat de prinses posityf test wie op it coronafirus neidat se weromkaam wie fan in besite oan Kurasao. Dêr liet se al witte dat se twa coronafaksins en in boosterfaksin hân hat. Prinses Beatrix sit yn thúskarantêne.
17:47

Palliative thússoarch hieltyd mear ûnder druk

De palliative thússoarch stiet hieltyd fierder ûnder druk. By dizze foarm fan thússoarch krije minsken yn de lêste libbensfaze help. Troch de coronakrisis is it dreech om de roasters klear te krijen.
De organisaasjes roppe de help yn fan mantelsoargers, mar dy moatte ek net te folle op harren boardsje krije. Fierders meitsje de organisaasjes - as it kin - gebrûk fan nije technology.
16:39

Betiid nei de film

No't hast alles om 17.00 oere ticht moat, past bioskoop Pathé yn Ljouwert ek de filmtiden oan. Takom wykein en nije wike kinne de echte leafhawwers al moarns betiid teplak. Sa begjint Ghostbusters: Afterlife al om 6.30 oere en West Side Story om 6.45 oere. Nei sânen begjint nochris in hiele trits film.
16:20

Tal coronapasjinten yn de sikehûzen stabilisearret

It tal coronapasjinten yn de Nederlânske sikehûzen is wer in bytsje tanommen. Dat meldt it Landelijk Coördinatiecentrum Patiënten Spreiding (LCPS). Der lizze no 2754 minsken yn in Nederlânsk sikehûs troch corona.
It tal skommelt al mear as in wike om de 2700 hinne. It LCPS melde snein dat stream fan coronapasjinten dat opnommen wurdt te ôfrûne wike stabilisearre is.
15:46

Mear as 200 Omikron-gefallen yn Europeeske lannen

Yn Europeeske lannen dy't oansletten binne by de Europeeske sûnenstsjinst ECDC binne yntusken mear as 200 coronabesmettingen mei de Omikron-fariant fêststeld. Der binne oant no ta 212 gefallen bekend.
Ferline wike stie Nederlân boppeoan de list mei Omikron-besmettingen, dizze wike is dat Portugal. Dêr binne no 34 besmettingen mei de nije fariant fêststeld, yn Nederlân binne it der achttjin.
15:17

928 nije coronabesmettingen in Fryslân

Yn Fryslân binne yn de ôfrûne 24 oeren 928 nije coronabesmettingen fêststeld, dat meldt it RIVM. Lanlik binne der 21.053 besmettingen fêststeld.

Gjin stjergefallen

Yn Fryslân binne yn de ôfrûne 24 oeren gjin stjergefallen fêststeld as gefolch fan it coronafirus.
14:38

Drokte by faksinaasjelokaasje yn Ljouwert

By de faksinaasjelokaasje yn it WTC yn Ljouwert is it drok. De rige fan minsken dy't wachtsje op in prik stiet somtiden oant op it parkearplak. It is fral drok troch minsken dy't de boosterprik helje.
© Kappers Media
13:52

RIVM warskôget foar falske mails

IR RIVM warskôget foar in falsk e-mailberjocht dat op fan de organisaasje liket te kommen. De lêzers wurde frege om in ôfspraak foar in coronasneltest te meitsjen. Yn de e-mail stiet dat minsken yn de omjouwing besmet rekke binne. De lêzer kin de ôfspraak meitsje troch op in link yn de e-mail te klikken. Dan wurde bankgegevens frege. "Het RIVM verzendt geen berichten over (mogelijke) besmettingen met het coronavirus bij u in de buurt en zal nooit vragen om bankgegevens."
12:42

GGD's setten ôfrûne wike 150.000 boosterprikken

De GGD's yn ús lân ha ferline wike mear as 150.000 boosterprikken set. Dêrmei naam it totale tal ekstra prikken ta fan hast 82.000 nei mear as 230.000. Foarearst krije benammen âlderen in boosterprik, om de beskerming tsjin it coronafirus te ferbetterjen.
Demisjonêr soarchminister Hugo de Jonge hie sein dat de GGD's ferline wike 200.000 boosterprikken sette soene. Dat oantal waard dus net helle.
© Omrop Fryslân
11:41

Earst gjin 2G-systeem

It demisjonêre kabinet giet earst net troch mei it 2G-systeem. By dat systeem soenen allinnich noch minsken dy't faksinearre binne of it firus hân ha tagong krije ta hoareka en eveneminten. In negative test soe dan net genôch wêze foar in QR-koade.
Minister De Jonge skriuwt oan de Twadde Keamer dat er it útstel trochskowe wol nei oar jier. "Het kabinet constateert dat met de hoogte van de infectiedruk en de aanhoudende druk op de zorg de verwachting is dat er niet op korte termijn ruimte ontstaat om (delen van) sectoren waar sprake is van een omgeving met een hoog risico, met het gebruik van coronatoegangsbewijs op basis van 2G te kunnen openen."
In QR-koade © Omrop Fryslân, Earryt Sijens
11:25

Stúdzje: Jongelju komme goed werom fan seldsume bywurking faksin

Jongerein dy't nei in coronaprik lêst krije fan myocarditis, in ûntstekking fan de hertspier, komme dêr oer it algemien wer goed fan werom. Dat docht bliken út in stúdzje fan Amerikaanske ûndersikers nei de bywurking. De ûntstekking is in hiel seldsume bywurking nei in prik.
De ûndersikers ha de data fan 139 teeners en jongfolwoeksenen ûndersocht, dy't lêst krigen fan sa'n ûntstekking. Myocarditis komt ek gewoanwei foar by benammen jongerein. Gjin ien fan de 139 persoanen is oan de bywurking ferstoarn, en by in lettere ferfolchôfspraak funksjonearre it hert by alle persoanen wer normaal, sizze de ûndersikers.
10:01

88 coronapasjinten yn de Fryske sikehûzen

Yn Fryslân lizze 88 pasjinten yn de sikehûzen, dêr't njoggentjin fan op de intensive care lizze. Freed leinen der ek 88 pasjinten yn de Fryske sikehûzen, dêr't santjin fan op ic leine.
Yn de trije noardlike provinsjes Grinslân, Drinte en Fryslân lizze byinoar 212 coronapasjinten yn it sikehûs, meldt Acute Zorgnetwerk Noord Nederland. Fan dy pasjinten lizze der 49 op in ic-bêd.
© Omrop Fryslân, Jitze de Vries
09:15

Pop-up faksinaasjelokaasje yn Gerkeskleaster

08:21

Nei fiven kuorbalje; it mei by LDODK

Mei it yngean fan de nije coronamaatregels is de amateursport foar in diel stillein, mei om't der nei fiven traine net mear traind wurde mei. Foar sportklups dy't op heger nivo spylje jildt lykwols in frijstelling. LDODK is sa'n sportklup en is dêrmei de iennige kuorbalklup yn Fryslân wêrfan't it earste en twadde noch wedstriden spylje, en nei fiven traine meie.
Foarsitter Gouke de Vries fan LDODK:
07:12

Basisskoallen krije selstesten

De basisskoallen krije fan hjoed ôf selstesten levere dy't se oan bern yn groepen 6, 7 en 8 jaan kinne. Bern moatte har twa kear yn de wike teste. Skoallen ha sa'n 1,2 miljoen testen yn de wike nedich. Se krije 2,4 miljoen foar twa wiken. In twadde levering folget foar de krystfakânsje.
Yn it middelber ûnderwiis kinne skoallen al selstesten oanfreegje.
07:07

Wolkom

Wolkom by it liveblog fan moandei 6 desimber oer de ûntwikkelingen oangeande it coronafirus yn Fryslân. Us liveblog fan juster neilêze kin hjir.