Liveblog | 5 desimber 2021

Coronanijs 5 desimber: Man wie 'deasiik' mar wol noch hieltyd gjin prik

Yn dit liveblog melden wy it lêste nijs oer it coronafirus
Bywurke: 5 desimber 2021, 22:29
snein 5 desimber 2021
18:20

Bernedokters ûniens oer faksinaasje fan bern ûnder de 12

Alle bern tusken de 5 en 11 jier soene faksinearre wurde moatte kinne tsjin it coronafirus. Dat sizze de Vereniging van Jeugdartsen (AJN) en meardere bernedokters tsjin Nieuwsuur. Se wize op de foardielen fan faksinaasje, ek by jonge sûne bern. Dêrmei wike se ôf fan it stânpunt fan de Nederlandse Vereniging voor Kindergeneeskunde (NVK).
Yn Nederlân kinne bern ûnder de 12 jier gjin faksin krije, mar meardere bernedokters wolle dat it wol mooglik wurdt.
18:03

Grinzer saakkundigen kreakje corona-oanpak: " Zo bestrijd je geen pandemie"

Saakkundigen út Grins binne kritysk op it demisjonêre kabinetsbelied dat de coronakrisis bestride moat. Dat meldt RTV Noord. "Nederland probeert altijd slimmer te zijn dan de rest van de wereld. Dat kan, maar je moet ook erkennen als dat niet lukt."
Foar heechlearaar Jochen Mierau is it dúdlik: it Nederlânske coronabelied wurket net. "Er zijn drie uitgangspunten: zicht op het virus, kwetsbaren beschermen en zorgen dat de ziekenhuizen niet overbelast raken. Dat zijn mooie doelen, maar dan moet je ook beleid voeren wat dat haalt."
It slagget net. Mierau giet se ien foar ien by del. We zitten op een breekpunt van de testcapaciteit en zijn het zicht op virus verloren. De ziekenhuizen liggen vol en daar dreigt code zwart. En de kwetsbaren beschermen? Dat lukt ook niet echt. Blijkbaar halen we die uitgangspunten niet."
17:48

GGD wegeret alle dagen tsientallen foardringers foar boosterprik

De GGD's sizze sûnt de start fan de boosterkampanje alle dagen gemiddeld 150 ôfspraken ôf foar de ekstra prik, neidat de leeftiid fan ien kontrolearre is. It giet dan om minsken dy't net yn de goeie doelgroep falle.
It ANP melde hjoed dat it mooglik is om foar de dringen by it heljen fan in prik. Ien dy't yn 1967 berne is, hie op de ôfsprakesite fan de oerheid 1937 ynfold om no al in faksinaasje te krijen, en dat slagge. De leeftiidsgrins leit op dit stuit by 1942.
16:20

Mooglik tekoart oan ûntstekkingsremmers reuma

Reumapasjinten hawwe noed oer harren ûntstekkingsremmers. Begjin 2021 waard dúdlik dat reumamedisinen ek it coronafirus ôfremje kinne. De fraach nei de ûntstekkingsremmers is dêrnei eksplodearre. No driget der in tekoart te ûntstean, seit de NOS.
© ANP
16:05

Soargen yn Denemarken: 183 omikrongefallen

Denemarken meldt dat der al 183 gefallen fan de omikron-fariant yn it lân oantroffen binne. Snein melde de Europeeske sûnenstsjinst ECDC noch 182 gefallen yn de Europeeske Uny, mar dat oantal is dus alwer efterhelle.
De Deenske autoriteiten fine it in 'soarchlike ûntwikkeling'. Ek yn it Feriene Keninkryk rint it tal ynfeksjes mei de omikron-fariant hurd op. Dêr binne 246 besmettingen registrearre.
15:47

Strangere leeftiidskontrôle foar boosterprik

GGD GHOR seit dat der op faksinaasjelokaasjes stranger kontrolearre wurde sil oft minsken al oan bar binne foar de boosterprik. "Het is uitermate onfatsoenlijk om ten koste van anderen te denken dat je voorrang moet hebben. En fraudeert bij het invullen van de gegevens", seit in wurdfierder.
It beslút komt nei oanlieding fan in berjocht fan it ANP dat immen út 1967 al in boosterfaksin hân hat, wylst hy noch net oan bar wie. Neffens de GGD sizze se eltse dei al 150 ôfspraken mei minsken dy't noch net oan bar binne ôf.
15:31

182 besmettingen mei omikron-fariant yn Europa

Neffens de Europeeske sûnenstsjinst ECDC binne der yn de Europeeske Uny 182 besmettingen fan de omikron-fariant fêststeld. De measte gefallen komme út Portugal (34). Ek yn Noarwegen, Nederlân, Denemarken en Frankryk binne der al mear as 15 omikrongefallen.
© ANP
15:27

781 coronabesmettingen yn Fryslân, lanlik 23.153

Yn Fryslân binne yn de ôfrûne 24 oeren 781 nije coronabesmettingen registrearre. Dat meldt it RIVM. It binne der sân mear as sneon. Doe waarden 774 besmettingen meld.
Lanlik leit it tal nije coronabesmettingen op 23.153. It trochsneed tal besmettingen fan de ôfrûne sân dagen is 21.807.
14:51

Taname coronapasjinten yn sikehûzen

Der lizze snein 2692 minsken mei it coronafirus yn de Nederlânske sikehûzen. Dat binne der 22 mear as sneon. Fan harren lizze 598 op in IC, ien mear as sneon.
13:58

Van der Galiën wie 'deasiik', mar soe dochs gjin faksin nimme

Otto van der Galiën, fraksjefoarsitter fan LIJST058 en lid fan it deistich bestjoer fan Wetterskip Fryslân, hat nei eigen sizzen 'deasiik' west fan it coronafirus. Dat seit er yn it radioprogramma Buro de Vries.
Otto van der Galiën fan Lijst058 op argyfbyld © Omrop Fryslân
Otto van der Galiën oer corona
"Op in bepaald momint gie de koarts fan 36,5 nei 39,5 en wer werom. Ik wie sa min: op in bepaald momint tocht ik: dit is it wol. It makke my ek hielendal neat mear út."

'Papa is er nog wel?'

"Myn dochter wie ek posityf test", giet er fierder. "Dy kaam sa no en dan ûnder en frege: 'Papa is er nog wel?' Ik ha trije, fjouwer dagen hielendal fan de wrâld west." Van der Galiën wol net sizze dat er gelok hân hat, mar "Ik ha wol ûnderfûn dat der doe op my past is."
Nettsjinsteande it siikwêzen fan Van der Galiën soe hy mei de kunde fan no dochs gjin faksin nimme. "Wat my oanbelanget binne der fierstente folle bywurkings. Yn de EU binne der no 250.000 deaden as bywurkings fan in ynintsjen", seit Van der Galiën. It Europees Medicijnagentschap (EMA) hat it yn in rapport fan ôfrûne july lykwols oer 3.848 deaden, en by net ien dêrfan stiet fêst dat de dea feroarsake is troch it faksin.
13:47

Halsema wol 'denktank' oer hoe om te gean mei it coronafirus

Boargemaster Femke Halsema fan Amsterdam fynt dat der in 'denktank' komme moat mei minsken út ferskate dissiplines, dy't foarstellen meitsje oer hoe't we mei it coronafirus omgean moatte. Halsema die har útspraak yn it televyzjeprogramma 'Buitenhof'.
Neffens Halsema sil it firus yn ús mienskip bliuwe. Dêrom fynt se dat der neitocht wurde moat oer hoe't we mei it firus libje kinne. De klam moat dan net allinnich mar op de soarch lizze: "Maar ook op de economische en sociale gevolgen."
13:35

Wachtrige foar faksinaasjelokaaje yn Ljouwert

© Omrop Fryslân, Sybrand Grasdijk
13:09

Minsken út 1942 kinne ôfspraak meitsje foar boosterprik

12:05

Súd-Afrikaanske dokter 'foarsichtich posityf' oer omikron-fariant

De Súd-Afrikaanske dokter Hugo Tempelman sjocht dat de omikron-fariant fan it coronafirus hast net ta ekstra sikehûsopnamen liedt. Dat seit Tempelman yn 'De Ochtend' op de Belgyske Radio 1.
Neffens him rint it tal besmettingen mei de omikron-fariant hurd op, mar bliuwt it tal sikehûsopnamen en it tal stjergefallen beheind. Tempelman is dêrom 'foarsichtich posityf' oer de omikron-fariant: "Het kan zijn dat het nog wat te vroeg is, maar voorlopig ben ik opgelucht."
© ANP
11:12

Beatrix fielt har goed

Prinses Beatrix hat corona, dat makke de Rijksvoorlichtingsdienst (RVD) sneon bekend. Neffens in wurdfierder fan de RVD hat prinses Beatrix mylde ferkâldheidsklachten. Se fielt har fierder goed.
09:57

Al miljoenen boosterprikken yn it bûtenlân

Sawat 20 miljoen minsken hawwe yn it Feriene Keninkryk in boosterprik krigen. 34,4 prosint fan de befolking hat dêr dus al in booster hân. Yn Dútslân hawwe 13 miljoen minsken harren booster hân (15,4 prosint), yn Frankryk giet it om 10 miljoen minsken (14,8 prosint) en yn België hawwe 1,9 miljoen minsken in booster hân (16,4 prosint).
Nederlân hat nei ferwachting oan de ein fan de wike 700.000 boosters set. Dat is 4 prosint fan de befolking.
© Omrop Fryslân, Johanna Brinkman
09:29

Noch net oan bar, dochs in boosterprik

It is mooglik om foardat je oan bar binne in boosterprik te heljen, dat meldt it ANP. It parseburo seit dat it sjoen hat dat immen dy't yn 1967 berne is snein in prik helle hat. Op de ôfsprakewebside hie de persoan ynfold dat er yn 1937 berne wie.
GGD GHOR seit dat minsken dy't besykje in boosterprik te krijen, sûnder dat se oan bar binne, ôfbelle wurde. Dat is hjir dus net bard. De GGD ropt minsken wol op om harren geduld te bewarjen: "Als je voordringt, en fraudeert bij het invullen van de gegevens, dan neem je een plek van iemand in die deze vaccinatie misschien nog harder nodig heeft dan jij. Er is voor iedereen een vaccin beschikbaar, maar wacht op je beurt en je uitnodiging."
09:12

Dinerboksen populêr

No't de hoareka yn ferbân mei de nije maatregels tsjin it coronafirus earder slute moat, binne saneamde 'dinerboksen' tige populêr. Guon restaurants jouwe minsken de mooglikheid om iten te bestellen dat se dan sels opwaarmje kinne.
Neffens Dennis Dekkers fan Koninklijke Horeca Nederland (KHN) kinne restaurants harren meiwurkers sa oan it wurk hâlde. It omsetferlies wurdt der neffens him lykwols net mei kompensearre.
© ANP
09:03

Foarrinner omikron-fariant wie der al in skoft

Neffens ien fan de ûntdekkers fan de omikron-fariant fan it coronafirus, Wolfgang Preiser, wienen foarrinners fan de fariant nei alle gedachten al in skoft oanwêzich. Preiser seit dat it type firus evoluearje koe sûnder ûntdutsen te wurden.
09:00

Wolkom!

Wolkom by it liveblog fan snein 5 desimber oer de ûntwikkelingen oangeande it coronafirus yn Fryslân. Us liveblog fan juster neilêze kin hjir.