Liveblog | 1 desimber 2021

Coronanijs 1 desimber: Boosterprik hie diel opnamen foarkomme kinnen

Yn dit liveblog melde wy it lêste nijs oer it coronafirus.
Bywurke: 1 desimber 2021, 22:33
woansdei 1 desimber 2021
22:30

Ein fan dit liveblog

We slute dit liveblog. Tank foar it folgjen. Moarnier is der wer in liveblog.
21:27

Aksjegroep: lit húsdokters boosters sette by âlderein

In aksjegroep fan húsdokters docht in oprop dat húsdokters âlderen dy't net sels nei de lokaasjes komme kinne, in tredde coronafaksin jaan moatte. Sy kenne de minsken en hawwe ûnderfining mei de grypspuit. Boppedat kinne se it hiel hurd regelje. It ferplichte kertier wachtsjen nei de prik soe ôfskaft wurde moatte, It makket hast neat mear út foar de feiligens en sûnder dat kertier wachtsjen giet de faksinaasje folle hurder.
19:36

Keamer twivelet oer ferbod amateursport nei fiif oere middeis

In grut part fan de Twadde Keamer liket it der net mei iens te wêzen dat amateursporte net mear mei nei 17.00 oere. Sa wolle ûnder oare D66, CDA, SP, DENK, GroenLinks en JA21 fan it demisjonêre kabinet witte wat dêr de effekten fan binne. Hoareka, bioskopen, teäters, en sportskoallen moatte om fiif oere middeis ticht fanwege de tanimmende coronabesmettingsgraad.
De SP wol dat der in útsûndering makke wurdt foar sport bûtendoar D66 tinkt dat de betide sluting wolris liede kin ta follere sportskoallen oerdeis.
17:07

GGD-ôfspraak boosterprik is te meitsjen mei falsk bertejier, systeem neffens GGD 'kwetsber'

Yn it digitale oanmeldsysteem foar it oanfreegjen fan in boosterprik sit in mooglikheid wêrtroch't minsken dy't noch net oan bar binne al wol in prikôfspraak meitsje kinne. It is foar persoanen dy't langer as seis moannen lyn in coronafaksin krigen hawwe dêrtroch dochs al in ôfspraak yn te plannen, troch simpelwei in ferkeard bertejier yn te fieren. Dat docht bliken út ûndersyk fan it ANP. "Het systeem is kwetsbaar", seit in wurdfierder fan GGD GHOR. "We hebben ervoor gekozen het systeem niet nodeloos dicht te timmeren. Het is een ingecalculeerd risico dat mensen er misbruik van kunnen maken."
16:16

Minsken berne yn of foar 1940 kinne ôfspraak meitsje foar boosterprik

15:29

590 nije coronabesmettingen yn Fryslân

Yn Fryslân binne yn de ôfrûne 24 oeren 590 nije coronabesmettingen fêststeld, dat meldt it RIVM. Lanlik binne der 18.588 besmettingen fêststeld. De besmettingssifers binne troch in steuring leger útfallen.

Twa stjergefallen

Yn Fryslân binne yn de ôfrûne 24 oeren twa stjergefallen fêststeld as gefolch fan it coronafirus. It giet om ynwenners fan de gemeente Ljouwert en de gemeente Waadhoeke.
De testlokaasje fan de GGD oan de Elzenlaan yn Ljouwert © LEO Middelsé, Lennard Geerts
15:13

Dochs gjin Omikron-fariant yn testmonster oktober

Yn tsjinstelling ta wat earder meld waard, is de Omikron-fariant net fûn yn in testmonster fan oktober. Dat seit de Nigeriaanske sûnenstsjinst. Yn it testmonster gong it om de al langer bekende Delta-fariant.
14:19

Basisûnderwiis krijt fan 6 desimber ôf earste foarried selstesten

Alle basisskoallen en skoallen foar spesjaal basisûnderwiis krije fan moandei 6 desimber ôf de earste foarried selstesten. It giet om in foarried fan 2,4 miljoen selstesten foar sa'n 6700 skoallen. Dat hat minister Slob yn in brief oan de skoallen witte litten.
De foarried soe genôch wêze moatte om te foldwaan oan it advys om twa kear de wike te testen. De selstesten binne bedoeld foar learlingen fan groep 6, 7 en 8. Foar de krystfakânsje kinne de skoallen rekkenje op in twadde levering selstesten.
14:06

Sechstjin Omikron-gefallen yn Nederlân, hast sechstich yn EU

De Europeeske sûnenstsjinst ECDC meldt woansdei dat nochris fyftjin minsken út de Europeeske Uny de Omikron-fariant ha. Yn de hiele EU binne no 59 gefallen fan de nije fariant befêstige.
Nederlân stiet boppeoan de list mei besmettingen mei de nije fariant. Yn ús lân binne no sechstjin gefallen fêststeld. Dêrnei komme Portugal (14) en Dútslân (9).
13:05

Van Dissel: 'boosters hadden deel van de opnames kunnen voorkomen'

It RIVM denkt dat minder minsken yn it sikehûs opnommen wienen as se earder in boosterprik krigen hienen. Hoefolle opnamen oft it skeeld hie of oft it better west hie om earder te begjinnen mei ekstra prikken, kin it RIVM net sizze. "Dat weten we niet", sei Jaap van Dissel fan it RIVM yn de Twadde Keamer op fragen fan Fleur Agema fan de PVV.
Ut Israelysk ûndersyk nei it Pfizer-faksin die bliken dat it risiko op in slim sykteferrin nei in booster sa 'n 90 persint leger wie as by minsken dy't mar twa prikken krigen hiene. Van Dissel sei dat ûndersyk te kennen, mar wiisde derop dat de minsken dy't meidiene oan it ûndersyk frij koart yn de gaten hâlden wiene. Hy soe dat "graag veel langer zien".
11:42

Beskerming coronafaksin wurdt by de âlderein minder

By minsken boppe de santich jier beskermet it faksin noch foar 84 persint tsjin in sikehûsopname en foar 93 persint tsjin in ic-opname. Dat hat Jaap van Dissel fan it RIVM tsjin de Twadde Keamer sein.
Twa wiken lyn wie de beskerming tsjin opname noch 87 persint, begjin novimber wie it 89 persint. By minsken ûnder de santich nimt de beskerming ek ôf, mar dy is mei 94 persint noch hieltyd heech.
© Omrop Fryslân
10:45

91 coronapasjinten yn Fryske sikehuzen

Yn Fryslân lizze 91 pasjinten yn de sikehûzen, dêr't santjin fan op de intensive care lizze. Tiisdei leinen der ek 91 pasjinten yn de Fryske sikehûzen, dêr't sechstjin fan op ic leine.
Yn de trije noardlike provinsjes Grinslân, Drinte en Fryslân lizze byinoar 202 coronapasjinten yn it sikehûs, meldt Acute Zorgnetwerk Noord Nederland. Fan dy pasjinten lizze der 46 op in ic-bêd.
Sikehûs Nij Smellinghe © Omrop Fryslân
10:35

Kuipers: tal coronapasjinten yn Nederlânske sikehûzen berikt wierskynlik 3.200

It tal coronapasjinten yn de Nederlânske sikehûzen groeit de kommende wiken wierskynlik nei mear as 3.200. Dat sei Ernst Kuipers, foarsitter fan it Landelijk Netwerk Acute Zorg (LNAZ). Der lizze no goed 2.800 coronapasjinten yn it sikehûs, wêrfan't 600 op de ic.
10:08

Roomsk-Katolike Tsjerke skrast fieringen nei 17.00 oere, ek mei de krystdagen

Fanwegen de coronasituaasje yn ús lân, hawwe de Nederlânske biskoppen fan de Roomsk-Katolike Tsjerke besletten ekstra maatregelen te nimmen. Yn de tsjerken wurde, neffens de algemien jildende coronamaatregels, nei fiven foarearst gjin fieringen mear holden. Omdat de krystdagen deroan komme, betsjut dat ek dat der dit jier gjin krystnachtmissen wêze sille.
Tsjerken hawwe yn ús lân in bysûndere posysje, om't maatregels fan de oerheid dêr net hanthavene wurde kinne. It is oan tsjerken sels om de maatregels oer te nimmen.
08:22

Fan freed ôf boosterprik foar húsdokters en ambulânsepersoniel

07:51

Rekôrtal besmettingen yn novimber

Yn de moanne novimber binne yn Fryslân 19.912 positive coronatests ôfnaam. It is mei ôfstân de moanne mei de measte fêststelde besmettingen: alle dagen yn trochsneed 664. De moanne dy't dêrnei komt, wie jannewaris fan dit jier. Doe waarden alle dagen gemiddeld 214 Friezen posityf test.

Besmettingen de moanne

Moanne Positive tests Trochsneed deis
Novimber 2021 19.912 664
Oktober 2021 4.803 155
Septimber 2021 3.237 108
Augustus 2021 2.715 88
July 2021 4.205 136
Juny 2021 747 25
Maaie 2021 4.088 132
April 2021 6.256 209
Maart 2021 6.411 207
Febrewaris 2021 4.944 177
Jannewaris 2021 6.645 214
Desimber 2020 6.089 196
Novimber 2020 2.929 98
Oktober 2020 4.171 135
Septimber 2020 773 26
Augustus 2020 172 6
July 2020 22 1
Juny 2020 25 1
Maaie 2020 81 3
April 2020 397 13
Maart 2020 129 4
06:11

Keamerdebat oer boosterkampanje en maatregels

De Twadde Keamer debattearret woansdei oer de oanskerpe coronamaatregels dy't it kabinet freed oankundige. De Keamer is ûnder oare kritysk op hoelang't it duorret mei de boosterkampanje yn Nederlân. Oant no ta binne der minder as 100.000 prikken set by âlderein, it leechste oantal yn de Europeeske Uny. Ein dizze wike soenen it der 700.000 wêze moatte, seit demisjonêr minister De Jonge.
Oer de maatregels is der ek ûnfrede. Sa fynt de PvdA dat de maatregels net fier genôch geane. Keamerlid Attje Kuiken wol dat de hoareka en winkels folslein slute, om sa net de hiele winter mei hege besmettingssifers en maatregels te sitten. GrienLinks wol witte wêrom't selstesten net fergees beskikber binne, no't Rutte fan Nederlanners freget om faker sa'n selstest te dwaan.
Demisjonêr minister Hugo de Jonge yn it kabinetsfak fan de Twadde Keamer © ANP
06:10

Goeiemoarn

Wolkom by dit liveblog fan woansdei 1 desimber oer de ûntwikkelingen oangeande it coronafirus yn Fryslân. Us liveblog fan juster neilêze kin hjir.