Liveblog | 20 novimber 2021

Coronanijs 20 novimber: 21.873 nije coronabesmettingen | Sportklups stjoere wedstriden út

Yn dit liveblog melde wy it lêste nijs oer it coronafirus.
Bywurke: 20 novimber 2021, 22:34
sneon 20 novimber 2021
22:31

Ein fan dit liveblog

We slute dit liveblog ôf. Tank foar it folgjen. Moarnier starte we in nij liveblog op.
18:11

Fries Verzetsmuseum: "Ferlikings mei Holocaust kwetsend"

De Nederlânske oarlochsmusea binne net bliid mei de ferlikings tusken de coronamaatregels en de Holocaust. Se skriuwe dat yn in iepen brief dy't ek troch it Fries Verzetsmuseum ûndertekene is.
"Wie kritiek heeft, kan zijn of haar stem laten horen. Maar laten we de discussie voeren zonder oneigenlijke vergelijkingen te gebruiken en zonder het ongekende leed van eerdere generaties te bagatelliseren", sizze se.
16:26

Kreatyf fuotbal sjen

It bloed krûpt wêr't it net gean kin, seker foar fuotbalfans. Op ferskate plakken sjogge supporters op kreative wize dochs harren klup yn aksje kommen.
16:07

Sinteklaas komt oan yn lytsere doarpen

De yntocht fan Sinteklaas; guon doarpen en stêden fûnen it wol ferantwurde, oaren net. Sa hie der hjoed in yntocht yn Lippenhuzen wêze sillen, mar troch de hege besmettingssifers yn it doarp koe dat net trochgean. Yn Haskerhorne gie it Sint Feest troch corona ek net troch, mar hjoed hat Sinteklaas dochs noch op besite west yn it doarp. Hy ried yn 'e koets by alle huzen del riden.
© Noordernieuws
15:15

992 nije coronabesmettingen yn Fryslân

Yn Fryslân binne yn de ôfrûne 24 oeren 992 nije coronabesmettingen fêststeld, dat meldt it RIVM. Lanlik binne der 21.873 besmettingen fêststeld.

Twa stjergefallen

Der is yn de ôfrûne 24 oeren yn Fryslân twa stjergefallen fêststeld as gefolch fan it coronafirus. It giet om ynwenners fan Noardeast-Fryslân en Waadhoeke.
14:57

Sportklups stjoere wedstriden live út foar publyk

No't der gjin publyk mear by de sportwedstriden wêze mei, stjoere hieltyd mear sportklups de wedstriden live út.
14:37

350 nije coronapasjinten yn it sikehûs

Yn it hiele lân lizze der op it stuit goed 2200 minsken yn it sikehûs fanwegen corona. 432 dêrfan lizze op stuit op in IC-bêd. Der binne hjoed yn it hiele lân 350 nije coronapasjinten opnommen yn it sikehûs.
© eigen foto
13:35

Leden fan ChristenUnie stimme tsjin 2G-belied

Op in partijkongres fan de partij stimde in mearderheid fan de leden tsjin de útwreiding fan de coronapas. Boppedat fynt de mearderheid fan de leden dat der gjin regels ynfierd wurde moatte dy't allinnich ûnfaksinearren treffe.
Foardat it 2G-belied ynfierd wurde kin, is in wetswiziging nedich. It is noch net dúdlik oft der yn de Twadde Keamer in mearderheid foar de wiziging stimme sil.
12:24

Dútske krystmerken dit jier skrast of bûn oan strange regels

De Dútske krystmerken, dy't populêr binne by in soad Nederlanners, geane dit jier foar part net troch. De dielsteat Beieren hat bekendmakke dat de krystmerken yn de hiele steat skrast wurde. De merken dy't wol trochgeane, lykas dy yn Nordrhein-Westfalen, binne bûn oan strange regels. Op dy krystmerken jildt de 2G-regel.
In krystmerk yn coronatiid © ANP
Dat betsjut dat besikers allinnich wolkom binne as se folslein faksinearre binne of koartlyn corona hân ha. Boppedat sjocht Dútslân ús lân wer as heechrisikogebiet. Dat hâldt yn dat minsken dy't nei Dútslân reizgje wolle, har earst online oanmelde moatte.
10:12

Protest tsjin coronamaatregels en 2G-belied út 'e hân rûn

In protest yn Rotterdam tsjin de coronamaatregels en de mooglike ynfiering fan in 2G-belied is freedtejûn út 'e hân rûn. By it protest rekken sân minsken ferwûne, de plysje hat teminsten tweintich minsken oppakt.
© ANP
It protest rûn út yn opskuor, wêrby't plysje-auto's yn 'e brân stutsen binne en der mei swier fjoerwurk smiten waard. It protest wie net oanmeld.
08:50

RIVM-direkteur Van Dissel posityf oer coronapil

Jaap van Dissel, direkteur fan it RIVM, tinkt dat der nei dizze winterperioade gjin strange maatregels wer nedich wêze sille. Dat seit er tsjin NU.nl. Hy is posityf oer de coronapil, en tinkt dat it geunstich wêze kin as it breed ynset wurdt.
Sa'n pil moat earnstige klachten foarkomme, as er gau nei de earste symptomen nommen wurdt. De pil soe foaral bedoeld wêze foar minsken dy't bot siik wurde kinne fan in coronabesmetting.
freed 19 novimber 2021
08:00

Wolkom by dit liveblog

Wolkom by dit liveblog fan sneon 20 novimber oer de ûntwikkelingen oangeande it coronafirus yn Fryslân. Us liveblog fan juster neilêze kin hjir.