Liveblog | 15 novimber 2021

Coronanijs 15 novimber: rekôrtal prikken set op lêste dei faksinaasjebus

Yn dit liveblog melden we al it Fryske nijs oer it coronafirus.
Bywurke: 15 novimber 2021, 22:57
moandei 15 novimber 2021
22:56

Sa mar

We slute dit liveblog ôf. Tank foar it folgjen. Moarnier starte we in nij liveblog op!
22:48

Oanjefte tsjin testoanbieder om falske faksinaasjebewizen

It ministearje fan Folkssûnens hat oanjefte dien tsjin in oanbieder fan coronatests fanwegen 'strerke vermoedens' dat dat bedriuw falske faksinaasjebewizen útjûn hat. It bedriuw hat gjin tagong mear ta it systeem fan de CoronaCheck-app en kin gjin ôfspraken mear ynplanne foar Testen voor Toegang.
"We streven ernaar om zo veel mogelijk frauduleus uitgegeven vaccinatiebewijzen te blokkeren", seit in wurdfierder fan it ministearje. Der is oanjefte dien by de plysje, dy't de saak 'heel serieus' nimt.
22:19

Omklaaikeet by swimbad Bûtenpost

Guon net-faksinearre heiten en memmen ha by swimbad De Kûpe yn Bûtenpost in boukeet pleatst, sadat se har bern dêr omklaaie litte kinne. Ofrûne wykein pleatste in heit in foto doe't er syn bern bûten omklaaie liet, skriuwt RTV NOF. By it swimbad stiet befeiliging dy't kontrolearje op it coronatagongsbewiis en in ID-kaart. Dat is neffens lanlike rjochtlinen.
22:10

NOC*NSF freget stipe lokale polityk

NOC*NSF-foarsitter Anneke van Zanen-Nieberg hat yn de algemiene gearkomste fan de sportkoepel in oprop dien oan de politike partijen dy't takom jier meidogge oan de gemeenteriedsferkiezingen. "Het is de kans voor ze om te laten zien hoe zij de sport willen steunen", sei Van Zanen. Sy joech oan hoe bot de sport te lijen hat fan de coronamaatregels. "Maar moedeloos word ik er niet van als ik zie hoe iedere keer weer de schouders eronder worden gezet."
Nieuwe maatregelen leiden steeds weer tot beperkingen, nu met name voor de binnensporten. "Ik zie hoe iedereen 24 uur per dag werkt aan het openhouden van de sport, hoe ingewikkeld de regels ook zijn. We vinden steeds weer een manier om ermee te dealen. Sport is essentieel om Nederland gezond en vitaal te houden."
21:06

Sinteklaasyntocht Bûtenpost giet troch

De yntocht en it Sinteklaasfeest yn Bûtenpost giet kommende saterdei troch. Der feroaret wol wat: de Sint komt net mei de trein oan by it stasjon. De rûte dy't de Sint ride sil, wurdt letter bekend makke. It feest begjint om 14.00 oere.
19:22

Winkeleigeners: tsientûzenen minsken nedich foar kontrôle

Winkeleigeners ha tûzenen wurknimmers nedich om kontrolearje te kinnen op it coronatagongsbewiis. Yn totaal soenen der 300 miljoen oant 500 miljoen checks de moanne dien wurde moatte, sizze brânsfertsjintwurdigers. It demisjonêre kabinet wol it coronatagongsbewiis ferplichtsje by net-essinsjele winkels en tsjinstferlieners.
INretail sei eerder al dat der net genôch personiel is om de QR-koade oan de doar te kontrolearjen. Boppedat soe de ynfiering foar diskusje soargje kinne. De sektor sels wol it tal coronabesmettingen beheine troch wer minder minsken de winkels yn te litten en troch it mûlkapke en ôfstân hâlden te ferplichtsjen. Boppedat soe it sprieden fan klanten better wêze as it beslút fan it kabinet om net-essinsjele winkels om 18.00 oere te sluten.
Dêrnjonken is it neffens winkeleigeners "onduidelijk hoe burgemeesters de regels kunnen handhaven als er 56.000 winkels als werkterrein bij komen". No is it coronatagongsbewiis al ferplicht yn de hoareka, yn kasino's en by eveneminten lykas festivals.
19:10

Aris wol trochspylje

Basketbalklup Aris út Ljouwert wol takom freed de thúswedstriid tsjin The Hague Royals trochgean litte.
No't der trije wiken lang gjin publyk by de wedstriden wêze mei, ha klups út de BNXT League de kommende wiken de mooglikheid om wedstriden letter te spyljen. Twa klups tsjin wa't Aris de kommende wiken spylje soe, ha dêrfoar keazen: Yoast United en Landstede Hammers. Dy wedstriden wurde dus op in letter momint spile.
Aris-spiler José Dimitri Maconda yn aksje tsjin Donar © Dijks Fotografie
De Ljouwerters ha der sels foar keazen om de iene thúswedstriid yn dy perioade net te ferpleatsen. "Hier is voor gekozen in overleg tussen bestuur en de technische staf", skriuwt de klup op de eigen webside.
"Het sportieve argument woog zwaar mee. Het is voor het team zeer onwenselijk om een lange periode achterelkaar geen wedstrijden te spelen. De club wil graag de positieve flow en het ritme behouden. Het verplaatsen en inpassen van drie wedstrijden in een bestaand schema zou het ritme verbreken, en de kans op blessures groter maken."
19:05

Evenemintebrâns wol ekstra stipe

De evenemintebrâns wol ekstra need- en stipemaatregels, no't de kommende wiken strangere coronamaatregels jilde. De Alliantie van Evenementenbouwers ferwachtet dit jier 85 prosint fan de omset mis te rinnen by publykseveneminten, stiet yn in brief oan de Twadde Keamer.
"Alles moet nu weer omgegooid. En dat op een vrij abrupte manier", seit Willem Westermann fan de Alliantie van Evenementenbouwers. "En ons perspectief is nu koffiedik kijken. Ook voor december is het onzeker, want niemand durft ervan uit te gaan dat dit binnen drie weken is opgelost."
17:35

Deirekôr

De faksinaasjebus fan GGD Fryslân hat moandei foarearst foar it lêst troch de provinsje riden. Under oare yn Dokkum wie it tige drok. Der waarden al mei al goed 200 prikken set: in deirekôr.
Sjoch nei de reportaazje fan RTV NOF:
17:24

Tsientallen besmettingen op skoalle Aldegea (S)

Tsientallen coronabesmettingen yn in skoalle fan 138 learlingen. De Diamant yn Aldegea (Smellingerlân) is dêrom dizze wike ticht. De dei foar de hjerstfakânsje (15 oktober) wie de skoalle ek al ticht. Nei de fakânsje bliuw it troch sidderjen en neffens direkteur Margriet Reatsch is it no net mear te hâlden. Nije wike moandei mei de skoalle wer iepen. Neffens de GGD is dat in reële ferwachting.
De berne-opfang, pjutten en BSO falle ûnder in oare koepel, mar sitte yn itselde gebou. De BSO is ek ticht, mar de berne-opfang (0-2 jier) is wol iepen en pjutten (2-4 jier) kinne ek nei skoalle.
Reaksjes fan âlden by de skoalle:
16:32

Fryske hoarekaûndernimmer yn Eastenryk hellet dochs mar in prik

Yn Eastenryk is der in lockdown foar minsken dy't net faksinearre binne. It regear yn Eastenryk hopet dat minsken dêrtroch dochs in prik tsjin it coronafirus helje. De Fries Harmen Ettema is hoarekaûndernimmer yn Eastenryk. Hy hellet no dochs ek mar syn prik. Ettema docht syn ferhaal by Omrop Fryslân:
Harmen Ettema oer it 2G-belied yn Eastenryk
15:59

Hugo de Jonge: "2G of vaker lockdownachtige maatregelen"

Demisjonêr minister fan Folkssûnens Hugo de Jonge warskôget dat der takom winter miskien mear 'lockdownachtige maatregelen' nedich binne as de saneamde 2G-regel net ynfierd wurdt.
De 2G-regel hâldt yn dat in negative test net mear genôch is om in coronatagongsbewiis te krijen. Allinnich faksinearre minsken en minsken dy't it coronafirus al hân hawwe, krije dan noch sa'n bewiis.
It demisjonêre kabinet wurket oan in wetsfoarstel foar dat belied, mar it is noch net wis oft dêr in politike mearderheid foar is. De Jonge warskôget dêrom: "Het is dit, of vaker dicht."
15:30

Gjin QR-koade by soarchbuorkerijen

Boere-organisaasje LTO Nederland hat in list makke mei wat de nije coronamaatregels no betsjutte foar boeren mei in ekstra ûndernimming op harren hiem. Dêrút docht ûnder mear bliken dat it op soarchbuorkerijen net nedich is om in coronatagongsbewiis te hawwen. Soarchbuorkerijen falle nammentlik ûnder soarchlokaasjes en net ûnder iepenbiere romten.
Ek bûtenaktiviteiten lykas boeregolf kinne sûnder QR-koades trochgean.
15:11

612 nije besmettingen yn Fryslân

Yn Fryslân binne yn de ôfrûne 24 oeren 612 nije coronabesmettingen fêststeld, dat meldt it RIVM. In ynwenner fan Noardeast-Fryslân is as gefolch fan it firus stoarn. Lanlik binne der 19.274 besmettingen fêststeld. Sûnt it begjin fan de pandemy wienen der net safolle besmettingen op ien dei yn Nederlân. Dit hat lykwols ek te krijen mei in steuring yn it ôfrûne wykein.
14:12

Betizing oer karantêneplicht

Neffens de NOS is der betizing oer oft húsgenoaten fan minsken dy't posityf test binne op it coronafirus yn karantêne moatte. By de parsekonferinsje fan ôfrûne freed waard sein dat húsgenoaten fan in mei corona besmet persoan altyd yn karantêne moatte. De advizen fan de GGD's hjiroer ferskille lykwols fan inoar.
GGD GHOR seit yn in reaksje tsjin de NOS dat sy noch wachtsje op de nije rjochtlinen fan it RIVM. "Maar het kan zijn dat medewerkers al vooruitlopen op de definitieve inwerkingtreding", seit in wurdfierder.
13:11

60 pasjinten mei corona yn de Fryske sikehuzen

Ernst Kuipers, de foarsitter fan it Landelijk Netwerk Acute Zorg hat moandei tsjin in kommisje fan de Twadde Keamer sein dat der tusken sneintemoarn en moandeitemoarn lanlik sa'n 19.200 besmettingen by it RIVM registrearre binne. Fan it wykein wie der in steuring wêrtroch't de sifers no heech útfalle. Hoefolle besmettingen der yn Fryslân binne, wurdt om 15.15 oere bekendmakke.
Yn Fryslân lizze der neffens it Acute Zorgnetwerk Noord-Nederland 60 pasjinten mei corona yn de sikehuzen. Dêrfan lizze der 10 op in IC. Lanlik lizze sawat 2.000 coronapasjinten yn it sikehûs. 380 dêrfan lizze op in IC.
© eigen foto
12:33

ESPN en KNVB yn petear oer útstel earedivyzjewedstriden

It is goed mooglik dat de oankommende wedstriden yn de earedivyzje útsteld wurde. Troch de coronamaatregels mei der de kommende wiken gjin publyk yn de stadions. As de wedstriden útsteld wurde, kinne der mooglik wer taskôgers by de wedstriden wêze.
ESPN, de stjoerder dy't alle wedstriden útstjoerd, en fuotbalbûn KNVB binne no yn petear mei de klups om in beslút te nimmen oer it mooglike útstel. SC Cambuur en sc Hearrenfean wolle de wedstriden fan de kommende wiken yn elts gefal ferskowe.
12:04

Festivals yn Quatrebras en Noardburgum ferpleatst

De organisaasje fan trije festivals yn desimber yn Quatrebras en Noardburgum hat besletten om de eveneminten nei maart 2022 te ferpleatsen. Neffens de organisaasje is der noch te folle ûndúdlik oer hokker maatregels der ein desimber fan krêft wêze sille. It 'Mega Vrije Piraten Festival', de 'Mega Kerst Tent' en de 'QMusic Foute Party' steane no tusken 12 en 26 maart 2022 op it programma.
10:51

Liet 2021 sûnder publyk: "It is hiel spitich"

Ofrûne snein waard dúdlik dat Liet 2021 woansdei gewoan trochgiet. Publyk is lykwols net wolkom. Dielnimmer Adri de Boer baalt dêrfan: "It is hiel spitich, mar it is net oars. Myn driuw om altyd mei te dwaan wie dy folle seal."
Adri de Boer oer Liet sûnder publyk
Omrop Fryslân stjoert de show woansdei fan 20.00 oere ôf live út.
10:29

Nije coronamaatregels hinderje rjochtsaken net

Rjochtsaken yn Nederlân kinne gewoan trochgean, sizze de rjochtbanken tsjin it ANP. Minsken moatte gewoan nei de rjochtbank komme as se dêrfoar útnûge binne. Yn de gebouwen moatte minsken yn de iepenbiere romten in mûlkapke op. Boppedat moatte se oardel meter ôfstân hâlde. It toanen fan in coronatagongsbewiis is net nedich.
09:36

Guon lokaasjes soarchorganisaasje Patyna ticht

Yn ferbân mei it coronafirus is De Schutse fan soarchorganisaasje Patyna op De Lemmer ticht foar besikers. Ek de ôfdieling 'Groen' fan Patynalokaasje De Waterman yn Snits is sletten.
09:09

Faksinaasjebus GGD yn Dokkum

De faksinaasjebus fan de GGD is moandei yn Dokkum by it swimbad op it Tolhuispark. Minsken kinne dêr sûnder ôfspraak terjochte foar in faksinaasje tsjin it coronafirus. It is foarearst de lêste wike dat de bus troch Fryslân rydt.
08:25

Rêstich op de dyk

Fan hjoed ôf jildt it advys om sa folle as mooglik út hûs wei te wurkjen. It liket moandeitemoarn yndied minder drok op de dyk: "Er is inderdaad een effect van het thuiswerkadvies te merken, al is het nog wel vroeg", seit Jolanda van der Velden fan de ANWB tsjin de NOS.
Om 7.30 oere hinne stie der sa'n 58 kilometer file yn Nederlân. "Dat is minder dan de afgelopen maandagen."
© SR Fotografie
08:02

Hoarekabaas Eijer feroardielet ûngeregeldheden Ljouwert

Foarsitter Ton Eijer fan Koninklijke Horeca Ljouwert is bliid mei it omtinken dy't de situaasje fan de hoareka dit wykein krigen hat troch harren aksje. De ûnrêst fan sneontejûn kart Eijer lykwols ôf: "Dat is net sa as wy op de kaart stean woene."
07:55

Run op faksins tsjin it coronafirus

GGD Fryslân hat sneon goed 700 prikken set tsjin it coronafirus. Yn ferliking mei de sneonen dêrfoar is dat in tanimming fan sa'n 40 persint.
Om eltsenien dy't wol, prikke te kinnen, hat de GGD de lokaasje yn Drachten dit wykein iepene. Dy fan Ljouwert en Snits koene it hast net oan, der stiene lange rijen foar in faksinaasje. Yn koarten sil ek de lokaasje yn Dokkum wer iepene wurde.
snein 14 novimber 2021
06:00

Wolkom!

Wolkom by dit liveblog fan moandei 15 novimber oer de ûntwikkelingen oangeande it coronafirus yn Fryslân. Us liveblog fan juster neilêze kin op dit plak.