Liveblog | 8 febrewaris 2021

Winterblog moandei 8 febrewaris: boargemasters jouwe gjin fergunning foar eveneminten op iis

It is winter yn Fryslân. Folgje yn dit liveblog de situaasje yn de provinsje fan minút oant minút.
Bywurke: 9 febrewaris 2021, 07:28
moandei 8 febrewaris 2021
21:32

Tank foar it folgjen

Hjirmei slute we it liveblog fan dizze moandei ôf. Tank foar it folgjen. Moarn is der wer in liveblog oer it winterwaar yn Fryslân.
20:30

Provinsje warskôget: noch hieltyd glêd

20:09

Piet Paulusma jout anwurd op waarfragen

Kening winter hearsket yn Fryslân! Dat moatte gouden tiden wêze foar de waarman dy't altyd sein hat dat it noch winterje koe yn Nederlân: Piet Paulusma. Wy sitte fol fragen oer dizze hiele winterperioade en dêrom wie Piet yn ús radioprogramma Weistra op Wei in oere lang te gast om alle fragen te beäntwurdzjen.
19:31

Friesche IJsbond set "alles op alles"

De tastân fan it iis is op dit stuit net bêst. In soad plakken lizze noch iepen fanwege de hurde wyn. Boppedat binne der in hiel soad stikken dêr't no al snie-iis leit. Neffens iismaster Sytse Kroes fan De Friesche IJsbond is der hiel wat wurk te fersetten om it iis goed berydber te krijen as it friezen bliuwt.
19:10

Alvestêdekoarts yn Den Haag

De Alvestêdekoarts hat ek yn Den Haag taslein: ferskate lanlike politisy seinen moandei dat wat harren oanbelanget toertochten op natueriis trochgean kinne, ek by de no jildende coronamaatregels. In mooglike Alvestêdetocht soe neffens guon politisy ek trochgean moatte.
18:55

IKC Trianova wie hjoed wól iepen

In gaoatysk byld hjoed by de basisskoallen. Net allinnich om it waar, mar ek om it risiko fan corona binne in soad skoallen moandei ticht bleaun. Oaren wienen hjoed wol iepen: bern fan Integraal Kindcentrum IKC Trianova yn Ljouwert krigen foar it earst sûnt wiken wer les op skoalle.
Ferslachjouwer Ronnie Porte op it IKC Trianova yn Ljouwert
18:39

Rutte lit maratons ûndersykje

Premier Mark Rutte lit de mooglikheid foar wedstriden op natueriis foar maratonreedriders ûndersykje. Ofrûne freed sei de premier noch dat foar reedrydwedstriden gjin útsûndering makke wurdt op de coronamaatregels.
18:22

Boargemasters jouwe gjin fergunning foar eveneminten op iis

Festiviteiten op iis dy't in soad riders of taskôgers lûke soene, sille gjin fergunning krije. Dat ha de 25 boargemasters fan it Veiligheidsberaad moandei besletten. Troch de coronamaatregels is it net mooglik sokke eveneminten ta te stean.
"IJsclubs moeten nu geen ijsfeesten willen organiseren. Dat is binnen de geldende coronaregels niet te doen. Alleen al de verplichte 1,5 meter afstand tussen mensen maakt het bijna onmogelijk. Dat is ook de reden dat een heel groot evenement als de Vierdaagse maandag al moest beslissen om de wandeltocht voor juli van dit jaar af te gelasten", sa seit foarsitter fan it Beraad Hubert Bruls.
18:05

Riders ha noch net folle oan 'smots-iis'

Elkenien yn Fryslân hellet de redens al út it fet en siket in betûfte fakman om de izers te slypjen. Dat lêste is lykwols net nedich. It iis leit der nammentlik min hinne, konkludearret ek iismaster Sytse Kroes fan De Friesche IJsbond. "It is oeral smots-iis wurden."
17:55

IIsklups binne der klear foar

Op De Pein binne se der klear foar: ferskate frijwilligers sette alles op alles om de iisflier sa goed mooglik te meitsjen. Fanwegen de snie is it iis op dit stuit 'min', seit foarsitter Gerk-Jan Hylkema. "It foardiel is wol dat de bern harren redens net hoege te slypjen."
Ferslachjouwer Willem de Vries seach by de iisbaan op De Pein
© Omrop Fryslân, Willem de Vries
Dochs moat elkenien noch in bytsje geduld ha. Earder gongen bern it iis al op, wat foar wekken soarge. "Wy ha doe in oprop dien by de Omrop om net op it iis te kommen en dat hat fertuten dien", fertelt Hylkema. "Der is net ien mear op it iis west!"
Op De Gordyk steane se ek klear
17:32

Tiisdei opnij fetragings op it spoar

De NS ferwachtet tiisdei opnij fertragings op it spoar. "Ook vanavond en vannacht wordt strenge vorst verwacht. Vrieskou en vocht zorgen naar verwachting voor ijsafzetting aan bovenleidingen. Daarom rijden we morgen een aangepaste dienstregeling met voornamelijk Sprinters", sa skriuwt de ferfierder.
17:25

Moogliks dochs maratons?

Minister Tamara van Ark fan Sport sil yn petear mei de KNSB oer it wol of net tastean fan reedrydwestriden op natoeriis. Ferskate maratonploegen trúnden der by de KNSB op oan om maratons trochgean te litten.
16:38

Fan stront nei snie

Gewoanwei rydt Fokke de Vries mei in wein fol jarre oer it lân. Fanwege it winterwaar hat er de boel omboud ta snieskower. Fan stront nei snie dus, it makket Fokke neat út.
16:31

Hoe komt it mei it natueriis?

We stekke hjoed de termomjitter djip yn de situaasje fan it iis yn Fryslân. Grutte fraach is: wat bart der mei it natueriis, no't der in soad snie fallen is? Yn Fryslân Hjoed beprate we de lêste stân fan saken mei Piet Paulusma, Sytse Kroes en Jorrit Bergsma.
16:26

Yn Noard-Hollân leit ek in soad snie

In Fries yn Noard-Hollân
16:15

IIs op de Bonkefeart

16:12
Dit ha de struiers hjoed dien
15:56

Wintersk Fryslân

Fryslân leit der wintersk by. Besjoch hjir moaie en bysûndere bylden fan ûnder oare De Leyen, Drachten, De Pein, Ljouwert, de Ofslútdyk en Sleat:
15:49

Noch hieltyd glêd op de diken

It is noch hieltyd glêd op de diken yn Noard-Nederlân. Rykswettersteat ropt dêrom op om ek de rêst fan de dei rekken te hâlden mei gefaarlike omstannichheden om yn te riden.
Op in soad Fryske diken leit noch iis en snie. Rykswettersteat riedt dêrom oan om stadich te riden, ôfstân te hâlden en om rêstich te remjen.
15:18

Frachtweinsjauffeurs bliuwe thús

Ferskate transportbedriuwen binne hjoed net op paad gong fanwege de glêdens. Dat meldt brânsjorganisaasje Transport en Logistiek Nederland. Neffens TLN hienen ferfierders fier fan tefoaren al rekken hâlden mei it winterske waar. Sa waarden supermerken sneon al fan ekstra foarried foarsjoen. Frachtweinsjauffeurs dy't wol op paad gongen, moasten rekken hâlde mei flinke fertragings.
© Shutterstock.com (welcomia)
15:12

Brêge by Terherne bliuwt ticht foar farferkear

De Nije Sânsleatbrêge by Terherne wurdt op dit stuit net betsjinne. Farferkear moat rekken hâlde mei oerlêst, warskôget provinsjale wettersteat. De brêge is troch it winterske waar fêst fêrzen.
14:27

Hûn sakket troch it iis yn Ljouwert

Yn in fiver oan de Grinzerstrjitwei yn Ljouwert is in hûn troch it iis sakke.
In dûker fan de brânwacht is it wetter yngien om it dier te rêden. Dat slagge al gau. De hûn is nei de wâl brocht, wêr't hy mei tekkens wer opwaarme is.
Hûn sakket troch it iis
14:10

Snie op dak fan Thialf

It dak fan iisstadion Thialf op It Hearrenfean wurdt op it stuit mei in kraan sniefrij makke, om foar te kommen dat it dak it gewicht net mear oan kin. "Het waait alle kanten op en het hoopt zich op. Er kan best een redelijk pak op het dak liggen, maar als het naar één kant waait dan krijg je weer een hele andere belasting. Vandaar dat we uit voorzorg maatregels nemen", seit direkteur Marc Winters.
Fan tongersdei ôf wurdt yn Thialf it WK ôfstannen holden.
Direkteur Marc Winters oer de situaasje
14:03

Sneltsjinsten Doeksen skrast

Rederij Doeksen hat alle sneltsjinsten oant en mei 17 febrewaris nei Skylge en Flylân skrast. Mei de passazjiers op dizze ôffearten wurdt kontakt opnaam foar in oare ôffeart. Op woansdei fart der in ekstra feartsjinst.
13:57

Rykswettersteat ferfangt ljochtboeien op Waadsee troch iisbetonning

13:56

GGD Fryslân hâldt tagong test- en priklokaasjes sniefrij

13:43

Gemeenten slute tagong ta iis by grutte drokte

As der de kommende dagen te folle leafhawwers fan natueriis nei de Fryske marren komme, sille gemeenten de tagong nei it iis ôfslute. Dat hawwe de Fryske gemeenten en de Veiligheidsregio Fryslân mei de bestjoeren fan de natueriisklups ôfpraat.
"Voorlopig klotst het water hier nog in de gracht", sa seit in wurdfierder fan de Veiligheidsregio moandei. "Maar als het zover is dat het ijs sterk genoeg is, zullen de regio en de gemeenten alle waarschuwingen en adviezen nog eens op alle mogelijke manieren uitdragen. De handhaving op en bij het ijs zal niet anders zijn dan die in bossen en op het strand: als het te druk wordt, kan een burgemeester toegangswegen of parkeerplaatsen laten afsluiten."
13:34

Bysûndere iisskulptueren by de Ofslútdyk troch hurde wyn

© CAMJO media
12:51

Fjild fan Cambuur sniefrij makke

De kompetysjewedstriid tusken Jong Ajax en SC Cambuur is moandeitemoarn ôfsein, mar yn Ljouwert kin yn elk gefal wol wer traind wurde.
12:43

Dronebylden út Sleat wei

12:30

Maratonriders: "De KNSB moat alles út de kast helje om klassikers mooglik te meitsjen"

De KNSB moat alles út de kast helje om it riden fan de grutte maratonklassikers mooglik te meitsjen. Dat is it boadskip yn it brief dat tsien topdivyzjeploegen moandei nei reedrydbûn KNSB stjoerd hawwe. Ien fan de inisjatyfnimmers dy't syn hântekening ûnder it brief setten hat, is âld-maratonrider Peter de Vries. "It is ien foar tolven foar ús. Dizze kâns op natoeriiswedstriden móatte wy mei beide hannen gripe!"
Ald-maratonrider Peter de Vries
12:10

Situaasje op diken noch net ûnder kontrôle, Arriva-bussen ride noch net

De situaasje op de Fryske diken is op guon plakken noch hieltyd problematysk. Benammen op de A32 is der noch in soad stosnie op de dyk. It ferkear op de dyk soarget der lykwols wol foar de de situaasje hieltyd wat better wurdt, ûnder oaren om't it sâlt dan better ynriden wurdt.
Neffens Peter Snippe, glêdenskoördinator by Rykswettersteat, hawwe der noch gjin grutte ûngelokken plakhân. "We hebben vanochtend wel een aantal glijpartijen gehad, maar gelukkig niet met letsel", seit Snippe.
Arriva soe fan 12.00 oere ôf de bussetsjinstregeling wer oppakke, mar dat is oant no ta noch net slagge. De situaasje is neffens it ferfiersbedriuw noch te gefaarlik. Hoe let de bussen wol ride sille, is noch net bekend.
Rykswettersteat, de provinsje en Arriva oer de situaasje op de diken
11:25

Oant 18.00 koade oranje

Oant 18.00 oere jildt koade oranje yn Fryslân. Dat hat waarynstitút KMNI sein. Koade oranje soe earst oant 12.00 oere jilde, mar de situaasje bliuwt dus langer gefaarlik, is de ferwachting.
Ek yn Grinslân en Noard-Hollân bliuwt koade oranje fan krêft.
11:23

Soarch yn Tjongerschans giet troch

11:09

Winter op de Waadsee

Bylden fan ôf de Asterias, in wurkskip fan Rykswettersteat. It skip wurdt brûkt troch Rykswettersteat en de Waddenunit:
Winter op de Waadsee
11:01

Jong Ajax-Cambuur giet net troch

De wedstriid tusken SC Cambuur en Jong Ajax moandeitejûn giet net troch. Dat hat de KNVB bekend makke. Fanwege it winterwaar kin de wedstriid yn Amsterdam net spile wurde.
10:59

Reedride yn 'Sibearyske omstannichheden'

Neist de wille yn de snie begjint hjoed ek it reedriden wer. Yn de Ryptsjerksterpolder leit yntusken op ferskate plakken sa'n fjouwer sintimeter iis.
De snie hat der wol foar soarge dat de iiskwaliteit op in grut tal plakken min is. De reedriders sels prate oer "schaatsen in Siberische toestanden".
10:35

Waadhoeke leget GFT-konteners net

10:22

Wat binne wy moai fuort net?!

No, as it oan de KNSB leit net. It reedrydbûn ropt elkenien op om sa ticht mooglik by hûs it iis op te sykjen. Dat docht it bûn om foar te kommen dat minsken massaal yn beweging komme op syk nei natoeriis fier fan hûs. Fanwege it coronafirus is it net tûk om te reizgjen. De KNSB ropt elkenien dan ek op om yn it eigen wenplak natoeriis op te sykjen. lykas op de sleat, in fiver of de lokale iisbaan.
09:35

Maratonteams pleitsje foar reedrydbubbel

It NK op natueriis waard foar it lêst yn 2013 holden © ANP
De maratonteams út de Topdivyzje wolle dat de KNSB der alles oan docht om in natueriisbubbel mooglik te meitsjen. Dat skriuwe se yn in iepen brief oan it reedrydbûn. It soe dan in bubbel wurde moatte lykas by it langebaanreedriden, wêryn't de riders hieltyd test wurde en allinnich om te trainen en foar wedstriden út harren hotel komme.
09:34

Bussen ride om 12.00 wer

Bussen fan Arriva yn Fryslân ride fan 12.00 oere ôf wer.
09:29

Brânwacht freget elkenien om brânkranen sniefrij te meitsjen

Brânwacht Fryslân freget elkenien om de brânkranen yn de strjitte sniefrij te meitsjen. As der wat bart, dan hoecht de brânwacht net te sykjen om de brânkraan.
© Anke Terpstra, Brânwacht Fryslân
08:53

Ungelokken troch glêdens

Fannacht wie de situaasje it slimst, mar ek moandeitemoarn barre der noch ûngelokken. Op de Folgersterloane yn Drachtsterkompenije ferlear in automobilist de macht oer it stjoer en fleach tsjin in beam. De bestjoerster hoegde net nei it sikehûs.
© SRFotografie
08:47

Test- en faksinaasjelokaasjes GGD gean wer iepen

De GGD iepenet hjoed alle test- en faksinaasjelokaasjes wer. De fakinaasjelokaasje yn it WTC yn Ljouwert is om 08.00 oere iepengien en de testlokaasjes iepenje letter dizze moarn de doarren. De testlokaasjes ha in oanpaste iepeningstiid fan 10.40 oant 16.20 oere, meldt Nils van Mourik fan GGD Fryslân. Snein bleaune alle lokaasjes ticht, fanwege koade read om it winterske waar.
Nils van Mourik fan GGD Fryslân
08:31

"It koe net"

"It koe fan 'e moarn net", seit direkteur Jaring Attema fan basisskoalle de Vuurvlinder yn Snits. De basisskoallen ha in skoft ticht west, mar mochten moandei wer iepen. In soad hâlde dochs de doarren ticht, fanwege it winterwaar en de situaasje op de diken. "It gong om de bern en de kollega's. In protte kollega's moatte fan fier komme, út de úthoeken fan de provinsje wei by wize fan sprekken. We ha besletten om de skoalle ticht te hâlden. It is ferskriklik spitich, want we seagen der sa bot nei út."
Jaring Attema fan de Vuurvlinder
08:03

It waarberjocht fan Piet Paulusma fan moandei

"Wat snie, wat sinne en oerdei -2 of -3 graden. In matige oant krêftige wyn út east oant noardeast. Yn it Waadgebiet in hurde wyn mei wynstjitten oant yn krêft 8. Yn 'e jûn en nacht in matige oant krêftige wyn út east oant noardeast en matige froast mei -5 oant -7 graden. Noch hjir en dêr wat lichte snie.
De oare dagen fan dizze wike folop winterwaar mei oerdei lichte froast en yn de nachten matige froast oant bytiden -8 en -9 graden. Mooglik in inkelde nacht op plakken strange froast, mar dan moatte de waarsomstannichheden wol ideaal wêze. Yn it wykein bliuwt it winterwaar mei oerdeis in soad sinne. Yn de nacht fan sneon op snein noch -6 oant -8 graden."
07:41

Arriva-bussen ride net oant 09.00 oere

Oant 09.00 oere ride der gjin bussen fan Arriva yn Fryslân en Grinslân, meldt it ferfiersbedriuw. Om 09.00 oere hinne wurdt de waarssituaasje opnij besjoen en folgje der mooglik feroaringen.
De treinen fan Arriva yn Fryslân ride oant neiere berjochtjouwing net, útsein dy tusken Ljouwert en Grins. De stoptrein rydt ien kear yn 'e oere.
07:29

Ek de meldkeamer fan Noard-Nederlân warskôget foar glêdens

07:12

Hoe is de situaasje op de diken yn Fryslân?

Oant 12.00 oere jildt koade oranje yn hiel Nederlân fanwege de glêdens en de ekstreme waarsomstannichheden. Rykswettersteat warskôget automobilisten net de dyk op te gean as dat net needsaaklik is. De situaasje op de Fryske diken is ek noch altyd ferriederlik. Dat komt foaral ek troch de stosnie, fertelt glêdenskoördinator Peter Snippe fan Rykswettersteat. "Door die stuifsneeuw hebben we bepaalde locaties, waar we zo weer sneeuw hebben liggen." Rykswettersteat is op de A-diken op 'en paad mei snieskowers en sâltstruiers.
Op de provinsjale diken is de situaasje fergelykber, seit Sjoerd Marten Vrieswijk dy't de glêdensbestriding by de provinsje koördinearret. "De measte diken yn it noarden en rjochting it westen fan de provinsje binne wol aardich begeanber. Mar as we it oer de N381 ha, dat is ien fan de grutte diken yn de provinsje tusken Drachten en Appelskea, dêr ha we hiel bot lêst fan stosnie en dêr ha we dy dúnfoarming."
Peter Snippe, glêdenskoördinator fan Rykswettersteat oer de situaasje op de A-diken
Sjoerd Marten Vrieswijk, fan Provinsje Fryslân oer de provinsjale diken
06:22

Sneltreinen Arriva ride net, stoptreinen en NS-treinen beheind

De treinen yn Fryslân ride oant neiere berjochtjouwing net, sa hat Arriva bekend makke. Oant 08.00 oere ride der yn alle gefallen gjin bussen fan Arriva. Om 08.00 oere hinne wurdt de waarssituaasje opnij besjoen. De NS meldt dat de treinen beheind ride. Reizgers wurdt advisearre koart foar it fuortgean de reisplanner te besjen foar de meast aktuele situaasje.
06:00

Wolkom yn dit liveblog

Goeiemoarn en wolkom yn dit liveblog oer it winterwaar. Ek hjoed hâlde we jim wêr op 'e hichte oer al it lêste nijs om de waarsomstannichheden hinne. It liveblog fan juster is hjir nei te lêzen.
snein 7 febrewaris 2021
06:15

GGD-lokaasjes wer iepen

Juster wiene de test- en faksinaasjelokaasjes fan de GGD Fryslân ticht, omdat doe koade read fan krêft wie. Hjoed binne de lokaasjes wer iepen. As minsken in ôfspraak ha en it dochs net sitten sjogge, dan kinne se dy ôfspraak fersette op 0800 - 1202.
06:05

Koade oranje

Hjoed jildt yn hiel Nederlân koade oranje fanwege de snie en glêdens. Dêrnei is koade giel fan krêft, ek fanwege de snie dy't der noch leit en mooglik nije snie.
De hurde wyn fan juster is hjoed wat lizzen gong.