Boeren protestearje tsjin Waadaginda by stedhûs yn Dokkum

De Waadaginda 2050 beskriuwt hokker maatregels der de kommende jierren nedich binne om it Waadgebiet te beskermjen. Dêrby wurdt der sjoen nei de klimaatferoaring, de enerzjytransysje en de rekreaasjesektor op it Waad.

De boeren binne benaud dat de boaiem troch de plannen yn de Waadaginda sâlter wurdt. Boeren kinne harren lân dan net mear brûke. Se fine dat der earst ûndersyk dien wurde moat nei de maatregels yn it plan.

De gemeenteried fan Noardeast-Fryslân hie earder in moasje oannaam, dy't it kolleezje fan boargemaster en wethâlders oprôp de yntinsjeferklearring foar dizze Waadaginda net te ûndertekenjen. It kolleezje hat dizze moasje lykwols neist him dellein.

Ferslachjouwer Ben de Jager spruts mei wethâlder Jelle Boerema. Hy fertelt wat de wethâlder oant no ta ûndernaam hat. "Wethâlder Boerema wol fêstlizze litte dat de simmerpolders ek op langere termyn brûkt wurde kinne troch boeren. Dizze bûtendykse simmerpolders lykje no ferlern te gean as de maatregels yn it plan trochgean. Tiisdei folget in 'spoedfergadering'. Dan sil der fierder praat wurde oer de Waadaginda."

"We ha bot noed oer de Waddenagenda 2050", seit Jan Swart, foarsitter VVE en pachters Noardeast Bûtendyks. "It kolleezje wol dat ûndertekenje mar se kinne totaal net oersjen wat de gefolgen dêrfan binne. Der leit ek noch in moasje om earst noch mar net te tekenjen, om earst wissichheid boppe tafel te krijen."

As de see mear romte krijt, kin it betsjutte dat de simmerpolders ûnderstrûpe. It sâlte wetter is min foar de fûgelstân en it bioferskaat.