't Woanskip-remix heech yn Fryske Top 100: "Kin my neat skele juh!"

"Dit is fantastysk fansels, it is wol in goed teken. Wy hawwe besocht safolle as mooglik it orizjineel yntakt en werkenber te hâlden. Mar wy hawwe der ek ús eigen draai oan jûn mei in flink stikje tempo en wat kicks," seit Sahieter.

Dochs seit de hardstyle dj dat it ek wol wat nuver fielt om heger te einigjen as Anneke Douma sels. "Ik wol fansels wol loyaal bliuwe oan Anneke, sy hat har al sa lang ynset om de minsken te fermeitsjen. It is moai om der boppe te stean, hoe heger, hoe better, mar ik bliuw bûgjen foar it orizjineel."

De sjongster sels hat dêr lykwols hielendal gjin problemen mei. "Och dy leave Pieter, jonge: lokwinske! Ik fyn it fantastysk! Fan dei ien ôf wiest entûsjast. It waard tiid dat it nûmer yn in nij jaske komt, fyn ik. Ik bin der grutsk op. It kin my neat skele juh!", seit sy.

Douma hat ek noch wol in foarstel: "Ik tink by myn eigen, as Cambuur no in goal makket en dizze wurdt dan draait... Dat hâldt de gong der dochs geweldich moai yn yn dizze tiid. Ik wol dat hiel graach."

Hoe graach oft Anneke Douma it ek wol, Kees Elzinga fan supportersferiening Kern van Cambuur komt dermei wol yn in loyaliteitskonflikt. "Het is een geweldig nieuw nummer. Het is een nummer voor lekker in 't Hertje, ons supportershome. Maar na een doelpunt, tja. We zijn zo trouw aan het origineel. Dat is zo bekend. 't Woanskip is zó'n ding, als de speaker het op zet gebeurt er wat in het stadion."

Dêrom heart it echt by de klup, seit Elzinga. "Ik weet niet of je dat een-twee-drie moet veranderen. Je moet het origineel niet zomaar overboord gooien. Maar de nieuwe versie is natuurlijk wel lekker om met een biertje op te hossen."