Coronanijs fan 18 desimber: Antonius stelt santich persint operaasjes út

22:45

Dit wie it liveblog fan freed 18 desimber. Tank foar it folgjen!

22:35

In pizzeria yn Wolvegea is it earste plak dêr't klanten in pizza ôfhelje kinne sûnder yn kontakt te kommen mei meiwurkers. Klanten kinne de pizza út in saneamde 'waarmhâldkast' pakke. Dat systeem wurket lyk as de fakjes yn in muorre dy't je by in snackbar iepen lûke kinne.

20:34

De SP fan Ljouwert hat freedtemiddei in taart oerlange oan de meiwurkers fan it MCL. De partij wol mei dizze aksje de soarchwurkers opmoedigje en mei harren yn petear gean oer de 'hege wurkdruk en de lege leanen' yn de soarch. Neffens de SP fertsjinje soarchferlieners mear as in applaus.

SP-ôfdielingsfoarsitter Aldo Schelvis: "Onze zorgverleners werken keihard voor de samenleving, maar zien daar te vaak te weinig voor terug. Het wordt nu door de coronacrisis pijnlijk duidelijk wat jaren van bezuinigingen, privatiseringen en afbraak van de zorg voor gevolgen hebben. Daarom verdienen de medewerkers alle steun en moet onze zorg weer volledig in publieke handen komen."

18:56

Nederlanners moatte in resinte negative útslach fan in coronatest sjen litte as se nei België komme wolle. Dat hawwe de Belgyske regearingen freed besletten, meldt it parseburo Belga op basis fan boarnen.

België is bang foar in grutte tastream fan Nederlanners dy't yn België winkelje wolle om't de measte winkels yn Nederlân no ticht binne. Yn hiel België is it dit wykein ek noch ris keapsnein.

18:09

Utrecht, Rotterdam en Hart voor Brabant binne de earste trije GGD-regio's dy't úteinsette mei it faksinearjen tsjin corona. Dat seit in wurdfierder fan GGD-koepel GGD GHOR. Utrecht set op 8 jannewaris útein, seit in wurdfierster fan de GGD Utrecht. Oft de oare twa regio's ek op 8 jannewaris begjinne, koe de wurdfierster net sizze.

De Fryske GGD befêstiget dat der op 8 jannewaris yn Fryslân noch net úteinset wurdt mei it faksinearjen. Op 18 jannewaris moatte alle Veiligheidsregio's wol begûn wêze. De GGD kin op dit stuit noch net melde wannear't Fryslân it krekt docht, mar de wurdfierder seit wol dat dat yn alle gefallen tusken 9 en 18 jannewaris wêze sil.

17:26

Krekt as oare sikehuzen beheint ek it Antonius Sikehûs yn Snits de reguliere soarch, fanwegen de drokte mei coronapasjinten. Mei yngong fan moandei geane fjouwer fan de seis operaasjekeamers tydlik ticht.

17:13

Faksinaasjeprogramma

16:24

Hoewol't de boargemasters fan de Waadeilannen earder dit jier noch fregen om foaral net nei de eilannen te kommen, binne minsken yn de krystfakânsje wol wolkom. Dochs bliuwt it foar in grut part rêstich, allinnich yn de fakânsjehúskes sitte minsken.

Yn de maitiid wiene de eilannen noch coronafrij. Boargemasters woene beslist net dat minsken fan it fêstelân it firus meibringe soene. "Maar we zijn inmiddels niet meer virusvrij op het eiland", seit boargemaster Leo Pieter Stoel fan de gemeente Amelân. "Bovendien zei Rutte: als mensen een huisje hebben gehuurd, dan kunnen ze daarnaartoe."

15:35

It RIVM hat it ôfrûne etmiel lanlik 12.028 nije positive coronatesten registrearre. Tongersdei wiene it der 12.823 (nei korreksje).

It tal melde stjergefallen gie fan tongersdei op freed mei 85 omheech. In dei earder wiene it der 76.

15:16

Der binne de ôfrûne 24 oeren yn Fryslân 211 nije coronabesmettingen fêststeld. Dat binne der 49 minder as tongersdei, doe wiene it der 260. It deistige trochsneed fan de ôfrûne sân dagen is 202.

De measte besmettingen binne it ôfrûne etmiel meld út Ljouwert mei 41, dêrnei folgje Súdwest-Fryslân mei 32 en Noardeast-Fryslân mei 21 nije besmettingen.

14:50

Der binne 52 nije coronapasjinten opnaam op de intensive care. Dat meldt de NOS op basis fan it Landelijk Coördinatiecentrum Patiënten Spreiding (LCPS). Dat binne 14 nije ic-opnamen mear as tongersdei.

Yn totaal lizze der no 2.034 minsken mei corona yn it sikehûs (tongersdei: 2.003), wêrfan 549 op de ic (tongersdei: 536). Der binne dus mear coronapasjinten opnaam as ûntslein of stoarn.

14:46

De gemeente Smellingerlân past de iepeningstiden oan fan de parkeargaraazjes yn Drachten. Mei yngong fan moandei geane dy om seis oere jûns ticht, útsein foar fergunninghâlders. De parkeargaraazjes wiene langer iepen om sa de drokte fan winkeljend publyk te sprieden, mei it each op it coronafirus. Mar neffens de gemeente is it troch de lockdown op it stuit hiel rêstich yn it sintrum fan Drachten. En de gemeente wol de drokte ek net stimulearje.

14:42

De krystdagen fan 2020 sille foar eltsenien oars wurde as oars. Minsken wurdt oanret allinnich mei de eigen húshâlding feest te fieren en gjin minsken thús út te nûgjen. Wy fernamen op de - útklaaide - Ljouwerter freedsmerk hoe't minsken de feestdagen krekt trochbringe sille en mei hokker gefoel.

"Sober en ûngesellich, mar ek mei minder drokte oer it iten!" Op de freedsmerk die bliken dat de measte minsken wol begryp foar de sitewaasje ha en har oanpasse sille. "Mar it wurdt stil, tryst en iensum, net folle oan dus."

14:41

Kommissaris fan de Kening Arno Brok is freedtjeûn te gast yn in ekstra lange útstjoering fan it telefyzjeprogramma It Polytburo. Presintatoaren Andries Bakker en Eric Ennema sjogge mei Brok werom op in roerich 2020, dat hast folslein yn it ramt stie fan de coronapandemy.

13:15

GGD Fryslân makket him soargen oer de feestdagen dy't foar de doar stean. De sûnenstsjinst ropt dêrom op 'it firus net troch te jaan'. Fryslân telde ôfrûne wike 1.378 nije coronabesmettings, it heechste oantal sûnt it begjin fan de coronakrisis. Foarige wike wiene der 973 positive tests. Foar de twadde wike op rige is de stiging hast 40 persint.

10:55

De Fryske sikehûzen sette dizze wike útein mei in kampanje om de coronamaatregels hinne. Mei it tema 'Het is onze zorg' freegje de sikehûzen ûnder oare fia sosjale media omtinken foar de wichtichste maatregels yn de sikehûzen. Troch dit op in positive wize te dwaan, hoopje de sikehûzen op begryp.

Erica Bakkum, lid fan de ried fan bestjoer fan Medisch Centrum Leeuwarden: "Net als iedereen hopen we erop dat we de coronacrisis snel achter ons kunnen laten. Maar het is een reëel vooruitzicht dat we de coronamaatregelen nog lang moeten volhouden. Patiënten en bezoekers helpen de zorg, en daarmee vooral zichzelf, door zich aan de maatregelen te houden. We moeten het samen doen."

08:15

Wol karbidsjitte of net karbidsjitte op âldjiersdei? Dat is de fraach dy't de karbidploegen no oan 'e holle knaget. De Fryske boargemasters seiden tongersdei nei oerlis dat de tradysje op 31 desimber trochgean kin, mar yn lytse ploechjes fan twa minsken. Mar wat betsjut dat beslút foar de karbidploegen?

De Fryske boargemasters seiden dat it miskien ferstanniger is as karbidferieningen net trochsette. De ploech fan Nijewier hat lykwols besletten dit jier gewoan te knallen. "We ha it juster yn de groep smiten en dêr is útkaam dat wy gewoan trochsette", leit Leonard van Hijum fan de ploech út.

07:45

Banken hawwe sûnt it útbrekken fan de coronakrisis yn Nederlân foar 33 miljard euro oan stipe ferliend oan konsuminten en bedriuwen. It giet dêrby om help yn de foarm fan ekstra lienings of útstel fan ôflossings. Dêr makken 172.000 bedriuwen en 37.000 partikuliere bankklanten gebrûkt fan, meldt de Nederlandse Vereniging van Banken (NVB).

Banken joegen sûnt it begjin fan de coronakrisis 42.000 nije finansierings oan bedriuwen, mei in totale wearde fan 29,9 miljard euro. Fan de finansierings waarden der sa'n 6.500 jûn mei garânsjes fan de oerheid. Mei dy garânsjeregelings is goed 1,8 miljard euro muoid. Dêrneist krigen 129 bedriuwen útstel fan betellings ta wearde fan 3,1 miljard euro.

Goed 37.000 konsuminten makken gebrûk fan in betelpauze fan banken, dêr't 88 miljoen euro mei muoid wie. Se koene mei de pauzes bygelyks de ôflossing fan harren hypoteek of in oare liening tydlik útstelle as se troch de coronapandemy yn finansjele noed kamen. Yn de measte gefallen gie it om útstel fan ôflossings tusken de ien en trije moannen.

07:40

Hoewol't in soad minsken freedtemiddei begûnen oan de krystfakânsje, ferwachtet de ANWB yn tsjinstelling ta oare fakânsjes net dat de diken folrinne troch de lockdown. De ANWB sjocht dat de diken sûnt tiisdeitemiddei rêstich binne, ek rûnom drokke punten by Rotterdam en Den Haag. "Het begint steeds meer te lijken op de eerste lockdown", seit Cees Quaks fan de ANWB.

Alle skoalbern sitte sûnt woansdei al thús fanwege de strange lockdown. Foar in part betsjutte dat in betide krystfakânsje, oaren krigen online les. In soad âlden begjinne no ek oan harren krystfakânsje, mar nettsjinsteande hotelboekings en ôfhierde húskes ferwachtet de ANWB gjin fakânsjedrokte.

Ek Edwin Gerritsen fan de ANWB sjocht dat it de ôfrûne dagen rêstich is. "Eerder leverde bezoek aan winkelcentra 's middags nog drukte op, maar dat is nu helemaal weg natuurlijk. Er ontstaat nu eigenlijk alleen file door een ongeluk of pechgeval."

07:37

Yn de twadde coronaweach binne de eangst- en stressgefoelens ûnder de befolking wer tanaam en is der sprake fan in fierder ôfname yn it fertrouwen yn de oerheid, it RIVM en de GGD. Dat blykt út lanlik ûndersyk fan de Erasmus Universiteit yn Rotterdam.

Yn april, wat foar no sjoen wurdt as it hichtepunt fan de corona-útbraak, bliek dat in grut part fan de Nederlânske befolking eangstich en ûnwis wie. By it opnij iepenjen fan de mienskip, begjin july, wie dy eangst en ûnwissens ôfnaam, mar dat hat him yn de twadde weach net trochset.

07:32

Foarige wike binne der yn Nederlân 3.550 minsken ferstoarn, 450 mear as gebrûklik foar dizze perioade fan it jier. Yn ferliking mei in wike earder ferstoaren der sa'n 50 minsken mear, meldt it CBS.

Yn de winter komme der altyd mear minsken te ferstjerren, mar de stjerte is de ôfrûne moannen heger as gebrûklik. It statistykburo murk earder op dat de hegere stjerte gearfalt mei de twadde coronaweach.

Sûnt de lêste wike fan septimber binne der neffens it CBS 5.300 mear minsken ferstoarn as je ferwachtsje soene yn dizze perioade. Yn de earste coronaweach (9 maart oant en mei 4 maaie) lei dizze saneamde oerstjerte foars heger, nei skatting op hast 9.000.

De measte fan alle coronadeaden krigen langduorjende soarch. Dat binne groanysk siken, kwetsbere âlderen, ferpleechhûsbewenners en minsken mei in slimme geastlike of lichaamlike beheining.

07:28

Soarchminister De Jonge hie sels ek leaver wold dat de faksinaasjes yn Nederlân rapper tatsjinne wurde koene as 8 jannewaris. Hy hat dêrop ferskate kearen yntinsyf oerlein mei de GGD en it RIVM, mar dizze ynstânsjes fine in soarchfâldige en feilige tatsjinning wichtiger as in symboalyske rappere tatsjinning fan de earste faksins. De Jonge is it dêrmei iens, sei hy tongersdei yn in spoeddebat.

In lilke Keamer begrypt net wêrom't it yn Nederlân langer duorret mei it begjin fan it faksinearjen as yn omlizzende lannen. Dy sizze krekt nei de kryst útein te setten. Neffens De Jong hat Dútslân oars as Nederlân gjin ynfrastruktuer foar grutskalich faksinearjen. Sy hawwe dat no nij opboud en dat hawwe se neffens him goed dien.

07:14

De GGD kiest foar soarchfâldigens en feiligens yn stee fan snelheid by it faksinearjen tsjin it coronafirus. Dat sei Sjaak de Gouw, direkteur fan GGD GHOR yn telefyzjeprogramma Op1. Yn in soad lannen set it faksinearjen yn desimber útein. Minister De Jonge melde tongersdei dat Nederlân op 8 jannewaris begjint.

"We hebben een lange traditie van vaccineren en dat doen we via een bepaalde procedure die we ook nu willen volgen. Op 24 december komt de bijsluiter en dan weten we welke doelgroepen we als eerste kunnen uitnodigen. We kunnen dan de systemen regelen en de callcentra op orde brengen. We kiezen hierbij liever voor zorgvuldigheid en veiligheid dan snelheid, zodat we straks niet hoeven te denken 'oeps' als er dingen mis gaan. We leren nu ook bijvoorbeeld van Engeland. Mensen zijn daar flauwgevallen. Dat is iets waar wij nu rekening mee kunnen houden."

De GGD wol de earste wike brûke om te sjen oft alles goed rint. "Er zijn verschillende manieren van prikken van de vaccins en we hebben nog nooit een situatie gehad waarin naast de minister ook de werkgevers ons vragen om de vaccinatie te organiseren. Wat we nog niet weten, dat willen we in de eerste week uitproberen", seit De Gouw.

07:10

It earste team fan de kuorballers fan LDODK hie tongersdeitejûn de earste groepstraining yn sporthal Koartsweagen op 'e Gordyk. Foarôfgeand oan dy training wie der earst in ekstra coronatest, want it mei inoar traine moat fansels wol feilich. Mar omdat eltsenien negatyf wie, koe der gewoan fanatyk traind wurde.

Om krekt yn de earste wike fan in hurde lockdown wer te begjinnen mei trainingen fielt wol wat apart, seit ek foarsitter Gouke de Vries fan LDODK. Mar der is in goede reden om wer te begjinnen, want heal jannewaris set de kuorbalkompetysje wer útein.

07:05

It tal fêststelde coronabesmettingen yn Fryslân is de ôfrûne wike mei 40 prosint groeid. It RIVM melde 1.384 positive testen, tsjinoer 947 in wike earder. De groei is lyk oan de lanlike trend. Noait waarden yn ien wike safolle besmettings fêststeld yn ús provinsje.

De 1.384 melde besmettingen noch net alle positive testen dy't de ôfrûne wike ôfnaam binne. Troch in steuring by de GGD ôfrûne tiisdei binne der doe minder besmettings meld. Dy efterstân is woansdei en tongersdei diels ynhelle, mar noch net hielendal. Yn trochsneed binne de ôfrûne wike alle dagen 198 positive testen meld.

Mei de 1.384 positive testen fan ôfrûne wike binne no 11.347 ynwenners fan Fryslân besmet rekke mei it coronafirus sûnt 10 maart. Doe waarden op De Gordyk de earste twa besmettingen fêststeld.

07:00

Dit is it liveblog fan freed 18 desimber mei it lêste nijs oer it coronafirus yn Fryslân. It coronanijs fan tongersdei 17 desimber kinst hjir neilêze.

Coronanijs fan 18 desimber: Antonius stelt santich persint operaasjes út | 211 nije besmettingen

Ein fan dit liveblog

Pizzeria yn Wolvegea hat lanlike primeur: in 'waarmhâldkast'

Lês ek:

SP Ljouwert oerlanget taart oan sikehûspersoniel

'Nederlanner moat negative test toane foar besite oan België'

Fryslân net by earste trije faksinaasjeregio's

GGD: faksinaasje yn Fryslân net op 8 jannewaris, mar wol fóar 18 jannewaris

Antonius Sikehûs yn Snits stelt santich persint fan de plande operaasjes út

Lês ek:

De GGD oer it faksinaasjeprogramma

Toeristen wolkom op de Waadeilannen, mar hotels bliuwe foar grut part leech

Lês ek:

Ek lanlik minder besmettingen

211 nije besmettingen

Lês ek:

52 nije ic-opnamen

Parkeargaraazjes Drachten jûns ticht

Freedsmerk oer de krystdagen: "Sober en ûngesellich, mar ek sûnder drokte om it iten!"

Lês ek:

Kommissaris Brok jûn te gast yn ekstra lange útstjoering fan It Polytburo

Lês ek:

GGD: 'Jou it firus net troch'

Lês ek:

Fryske sikehûzen lansearje kampanje foar omtinken coronamaatregels

Karbidsjitten is dit jier oars as oars

Lês ek:

Banken ferlienden foar 33 miljard euro coronasteun

ANWB: rêstich op de dyk, begjint te lykjen op earste lockdown

Undersyk: eangst en ûnwissens troch corona wer tanaam

Oantal ferstoarne minsken 450 heger as normaal yn in wike

Minister De Jonge iens mei GGD

GGD-direkteur: soarchfâldigens en feiligens boppe snelheid

Hoe sit it mei de topsport?

Lês ek:

Rekôrtal besmettingen yn ien wike

Yn totaal no 11.347

Lês ek:

Goeiemoarn en wolkom yn dit liveblog