Coronanijs freed 23 oktober: Tsientallen Cambuursupporters negearje oardel meter by kampioensfeest

Oant safier dit liveblog fan freed 23 oktober. We sette noch ien kear it belangrykste nijs op in rychje.

Moarn is der wer in liveblog mei it lêste Fryske nijs oer it coronafirus. Dat is te folgjen op omropfryslan.nl en yn de app fan Omrop Fryslân.

Op it Cambuurplein binne tsientallen minsken by mekoar. Se fiere dat Cambuur sa goed as wis de perioadetitel pakt. Dêrby hâlde se har net oan de oardelmeterregel. Dat meldt in tsjûge. De fans raze, sjonge, en stekke fjoerwurk ôf. Plyjses binne der by, mar gripe net yn.

Helpferlieners sizze dat der in protte minsken steane te sjen by in brân yn Snits. Net elkenien hâldt him oan de oardel meter ôfstân. Dat seit in wurdfierder fan de brânwacht. Se docht in driuwend berop op de minsken dy't der binne, om nei hûs te gean.

"We merken dat er veel mensen bij de brand staan te kijken. We verzoeken iedereen dringend naar huis te gaan in verband met de veiligheid (waarmee we uiteraard ook op corona doelen)", meldt de brânwacht op twitter. "Blijf je toch, houd dan minstens 1,5 meter afstand van elkaar en geef hulpverleners de ruimte."

By de brân yn Snits binne fjouwer minsken nei it sikehûs rekke. It is net dúdlik hoe't se der krekt oan ta binne. De brân wie útbrutsen op de tredde ferdjipping fan in portykflat oan de Rijperahemstrjitte.

Iepenbiere basisskoalle De Schakel op it Amelân is tichtgien om't in learkrêft posityf testen is op corona. De bern bliuwe ek kommende moandei noch thús fan skoalle.

Moandei sil der ek in beslút naam wurde of't de bern tiisdei wer nei skoalle kinne. Yntusken wurde mear minsken test dy't mei de besmette learkrêft yn oanrekking west binne.

Foarsitter Sybrand Buma fan de Fryske feilichheidsregio fynt it noch te betiid foar in folsleine lockdown. Hy wol earst de sifers fan it kommende wykein ôfwachtsje. Dat seit er yn It Polytburo.

Buma jout ta dat it mei de besmettingssifers net goed giet yn ús lân, mar in totale lockdown bringt in protte skea mei him mei, seit er, foaral op ekonomysk mêd. Yn in lân as Sina liket sa'n lockdown wol resultaat te hawwen, mar Buma twivelet oan dy sifers. Boppedat, sa sei Buma, is Sina in diktatuer, dêr't sokke maatregels makliker naam wurde kinne.

Fan moandei ôf oan giet likernôch 50 prosint fan de planbere operaasjes fan sikehûs Tjongerskâns net troch yn ferbân mei it ôfskalen fan de reguliere soarch. Dat seit krisismanager Jacqueline Wijnveen fan it sikehûs.

Wijnveen jout oan dat de totale soarch net foar 50 prosint ôfskaald wurdt, want der binne noch wol spoedoperaasjes en datsoarte saken. De totale reguliere soarch dy't it Tjongerskâns fan moandei ôf oan leverje kin, is likernôch 60 oant 65 prosint fan wat se normaal kinne.

Troch de flugge taname fan it oantal coronabesmettingen nimt de druk op de soarch ta. Dat seit minister Tamara van Ark fan medyske soarch. Om derfoar te soargjen dat de akute soarch beskikber bliuwt, hat se mei de belutsen partijen nije maatregels ôfpraat. Ien fan de maatregels is dat de regionale gearwurking fan alle soarchoanbieders en fersekerders útwreide wurdt, ek as it giet om de reguliere soarch.

Boppedat krijt it lanlik sintrum foar pasjintesprieding in mear stjoerende rol by de ferdieling fan coronapasjinten oer it lân. Dat sintrum bepaalt fan no ôf in wike foarút hoefolle kapasiteit frijholden wurde moat foar de coronasoarch, sadat sikehûzen har dêr op tiid op tariede kinne.

Jacqueline Wijnveen is krisiskoördinator fan it sikehûs Tjongerskâns op it Hearrenfean. Se seit dat it goed is dat de minister aksje ûndernimt. "Dit betekent voor ons dat we meer moeten afschalen, om onze verantwoordelijkheid voor het geheel te nemen."

"We bekijken wat er kan worden uitgesteld. De medisch specialisten beoordelen dat van patiënt tot patiënt. Iemand die nu op een wachtlijst staan, kan ook een spoedgeval worden. En dat wil je niet."

De minsken op de longôfdieling fan it MCL ha grutte soargen oer de tanimmende coronasifers. Dat seit Gerbrich de Vries. Se wurket op de longôfdieling fan it MCL. Der is in soad bining yn it team, dat in protte meimakke hat, seit se. "Wy steane der mei inoar en foar de pasjinten."

Se hat de yndruk dat minsken noch net genôch yn de gaten ha dat se mûlkapkes opsette moatte. "It is hiel belangryk om it sinjaal te jaan dat minsken dat dwaan moatte, We moatte ús oan de maatregels hâlde, want dy binne der net foar neat."

Der komt in ienmalige ekstra útkearing foar hoarekabedriuwen dy't fanwege de coronakrisis ticht binne. Se krije in bedrach fan 2.500 euro, sizze boarnen yn Den Haag tsjin de NOS.

It kabinet leit "alle senario's op tafel" as oan de ein fan de kommende wike de besmettingssifers net weromrinne. Dat sizze premier Mark Rutte en coronaminister Hugo de Jonge.

In jûnsklok wurdt net útsletten, seit de premier. Mar troch de maatregels dy't al troffen binne, sa as it alkoholferbod op strjitte en it sluten fan de hoareka "begjint it yn syn effekt te lykjen" op in jûnsklok. It kabinet sjocht ek yn de gegevens fan bygelyks parkearmjitters dat der jûns minder misken op strjitte binne.

Hotels meie mei yngong fan jûn gjin alkohol mear skinke. Dat ferbod giet jûn direkt yn. Dat seit in wurdfierder fan it kabinet.

Der mei ek gjin drank levere mear wurde troch de roomservice. It kabinet lûkt sa ien line mei it ferbod op de ferkeap fan alkoholyske dranken yn winkels.

It is noch net wis oft premier Mark Rutte en coronaminister Hugo de Jonge tiisdei in nije parsekonferinsje jouwe oer de oanpak fan it firus en it tal besmettingen. Moandei wurdt dêr nei alle gedachten mear oer bekend, seit De Jonge.

Fjirtjin bewenners en trije meiwurkers fan wensoarchsintrum De Hofwijck yn Ljouwert binne besmet mei it coronafirus. Op de hiele lokaasje fan de KwadrantGroep is yn alle gefallen oant nije wike fred gjin besite wolkom.

Der binne de ôfrûne 24 oeren yn Fryslân 155 nije coronabesmettingen fêststeld. Dat binne der 23 mear as juster, doe wiene it der 132. De 155 besmettingen binne krekt wat mear as it gemiddelde fan de ôfrûne sân dagen. De measte besmettingen binne it ôfrûne etmiel fêststeld yn Súdwest-Fryslân (23). Dêrnei komt Ljouwert mei 21.

Yn Fryslân is it ôfrûne etmiel ien nij stjergefal meld, dat giet om in ynwenner fan Smellingerlân.

Lanlik binne der foar it earst mear as 10.000 besmettingen fêststeld yn ien dei. It wiene der 10.007.

It tal coronabesmettingen yn Fryslân is dizze wike foar it earst sûnt begjin septimber omleech gien yn fergeliking mei in wike earder. Der kamen 1051 by, tsjin 1158 ferline wike. Neffens de GGD is dit mooglik in earste sinjaal dat de maatregels fan de ôfrûne wiken effekt ha. Minsken mei klachten dy't in test dwaan wolle, kinne binnen 24 oeren telâne op ien fan de testlokaasjes yn de provinsje.

Oan de GGD is dizze wike meld dat der 4 minsken ferstoarn binne, dy't corona hiene. Dat is sûnt april it heechste oantal yn in wike tiid. Yn totaal binnen der no offisjeel 76 coronapasjinten ferstoarn. Der binne dizze wike 14 sikehûsopnamen meld, it heechste oantal sûnt ein maart.

Dochs liket de situaasje him nei wiken fan oprinnende oantallen coronabesmettingen yn Fryslân no te stabilisearjen. En dat giet tsjin de lanlike trend yn, want lanlik rinne de sifers noch altiten bot op. Op Seelân nei hat Fryslân de leechste besmettingssifers.

Marleen Luning, dokter ynfeksjesyktebestriding fan de GGD Fryslân: "We zijn voorzichtig positief. We zijn ook benieuwd of deze daling gaat doorzetten, of dit echt een effect is van de maatregelen die genomen zijn. Dat zou heel mooi zijn."

In pasjint fan ôfdieling de Parlevinker fan Van Andel Ouderenpsychiatrie yn Harns, is besmet rekke mei it coronafirus. Dat meldt GGZ Fryslân, dêr't Van Andel ûnderdiel fan is. Der ferbliuwe op it stuit 20 pasjinten op dizze ôfdieling. Sy wurde no allegear yn isolaasje op harren eigen keamer ferplege.

Meiwurkers op de ôfdieling ferliene de soarch mei persoanlike beskermingsmiddels en krije dêrby help fan meiwurkers dy't oplaat binne om te wurkjen op de corona-ôfdieling fan GGZ Fryslân. Der wurdt op it stuit boarne- en kontaktûndersyk útfierd. De ôfdieling is foarearst ôfsletten foar besite.

It tal coronapasjinten yn de Fryske sikehûzen is weromrûn, yn ferliking mei de lêste sifers. Der lizze no 16 coronapasjinten op de intensive care yn Fryslân, dat is ien minder as woansdei. It tal coronapasjinten op de ferpleechôfdielingen is weromrûn fan 45 nei 41.

Fora it earst yn de twadde coronagolf wurde Nederlânske coronapasjinten oerpleatst nei Dútslân. Om 9:30 is in helikopter nei Münster flein mei in intensive care-pasjint. Letter op 'e moarn wurdt opnij in ic-pasjint nei Dútslân brocht. It giet foarearst net om pasjinten út Fryslân.

Personiel fan ferskate supermerkketens, wêrûnder AH, Lidl en Jumbo, hat in mienskiplike brânbrief skreaun nei harren wurkjouwers. Dat meldt it fakbûn FNV. De supermerkmeiwurkers wolle bettere arbeidsbetingsten fanwege de coronakrisis en de gefolgen dy't dy foar harren hat. Se skriuwe: "Jullie boeken miljoenen winst, maar willen onze toeslagen afpakken en ons geen fatsoenlijke loonsverhoging geven. Terwijl jullie veilig vanuit huis werken en wij elke dag in de supermarkt de kastanjes uit het vuur halen."

De brief is opsteld as reaksje op de foarstellen fan de wurkjouwers yn de supermerkbrânsj, dy't op it stuit ûnderhannelje mei de fakbûnen oer in nije cao. De foarige cao rûn ôf yn april 2020.

KWF Kankerbestrijding en de Taskforce Oncologie roppe alle minsken yn Nederlân mei klam op om harren oan de coronamaatregels te hâlden. KWF en de taskforce, dêr't tal fan organisaasjes by oansletten binne dy't harren dwaande hâlde mei de soarch foar kankerpasjinten, binne benaud dat de flinke groei fan it tal coronapasjinten gefolgen ha sil foar de onkologyske soarch.

"We zien dat het niet goed gaat, de druk op de zorg neemt alsmaar toe", seit direkteur fan KWF Johan van de Gronden. "Daarom vraag ik aan iedereen: wil je echt iets doen voor kankerpatiënten, houd je dan aan de coronamaatregelen." As it tal besmettingen omleech giet, sil úteinlik ek it tal sikehûsopnamen wer minder wurde. En dêrtroch kin de reguliere soarch op peil bliuwe.

De organisaasjes wize derop dat by de earste coronaweach it tal kankerdiagnoazen omleech gien is. De efterstân dy't doe ûntstie, is neffens harren noch net ynhelle.

De International Invitation Cup, dy't foar de kommende trije dagen op It Hearrenfean op it programma stie, giet net troch. Dat meldt it reedrydbûn KNSB. It toernoai hie de iepening wêze moatten fan it shorttrackseizoen. It is op it lêste momint skrast fanwege de coronakrisis.

Woansdei is der by alle dielnimmers oan it toernoai in coronatest ôfnaam. Dat smiet twa positive gefallen op. It giet om de Nederlânske reedrydster Xandra Velzeboer en in Poalske shorttracker.

Earder liet Sjinkie Knegt him al kritysk út oer it toernoai. Hy neamde it ûnferantwurde.

Goeiemoarn, en wolkom by dit liveblog fan freed 23 oktober 2020 oer it coronafirus yn Fryslân. It wichtichste nijs fan juster kinst hjir neilêze.