VVV Sjirk de Wal wint ôfdielingspartij by manlju én froulju | LWD Basket ûnderút

Alle kaarten for de 173e PC yn Frjentsjer, de grutste keatspartij fan it jier, binne ferkocht. De ferkeap begûn om 10 oere en in goed oere letter wiene alle kaarten fuort.

Op de dei sels, 29 july, binne der noch wol lânkaarten beskikber.

Kaarten koene besteld wurde fia de webside fan de PC en by it Keatsmuseum yn Frjentsjer.

Harkemase Boys is yn eigen hûs ûnderútgien tsjin Urk. De Boys ferlearen mei 2-3. Pynlik: Urk stiet ien-nei-lêste yn de tredde divyzje.

Urk kaam nei in kertier op foarsprong troch in doelpunt fan Lucas Schraal. Dyselde Schraal ferdûbele yn de 37e minút de marzje.

Harkemase Boys kaam yn de 40e minút werom yn de wedstriid nei't Johannes Schrijver de bal yn eigen goal skeat.

Mar wat Johannes Schrijver koe, koe Joris Adams ek. Hy makke ek in eigen doelpunt en bepaalde de rêststân dêrmei op 1-3.

Yn de twadde helte skoarde Adams ek noch in kearke yn it goede doel, mar tichterby as 2-3 kaam Harkemase Boys net.

Harkemase Boys stiet no op it njoggende plak mei 46 punten út 31 wedstriden.

Robin Veldman fynt dat syn team wol wat mear wurdearring krije mei. Hearrenfean stiet mominteel sânde mei sa no en dan aardich fuotbal. En de trainer fan sportklup Hearrenfean tinkt dat dat wol wat mear positive oandacht krije mei.

"Ik vind wel dat we onderbelicht worden. Op zich ook wel lekker, want we gaan lekker van wedstrijd naar wedstrijd. Maar er wordt bijvoorbeeld ook veel over Telstar gesproken, maar die staan in de onderste regionen hè. Ik vind dat de spelers wel wat meer aandacht mogen krijgen."

Maxence Rivera is der snein net by. De linksbûten foel yn de wedstriid tsjin Fortuna Sittard blessearre út. Hy hat wol minder pine oan syn hamstring, mar in scan moat útwize oft hy dit seizoen noch spylje kin.

Nikolai Hopland hat lêst fan syn ankel. Miskien kin er nije wike wer oanslute, mar dat is noch net wis. Andries Noppert is noch altyd blessearre, wêrtroch Jan Bekkema as tredde keeper meigiet.

Reedrydster Kim Talsma fan Grou komt takom winter yn aksje foar de ploech fan Jillert Anema.

Talsma wûn ôfrûne jier it einklassemint fan de Marathon Cup en hie in kontrakt foar noch in jier by har ploech Okay-Interfarms.

Dochs krige Anema it foarinoar om Talsma oer te heljen nei syn ploech. De coach út Bontebok rekke ferskate rydsters kwyt.

Ichem Ferrah is útroppen ta talint fan it jier by it Kampioensdiner fan de earste divyzje.

De tweintichjierrige hierling fan LOSC Lille wie earder ek al it bêste talint fan de earste perioade.

Ferrah wie dit seizoen ien fan de grutte mannen efter it sukses fan de promovendus. Hy makke tolve goals en wie mei seis assists wichtich.

It is net dúdlik oft Ferrah ek takom jier yn Ljouwert spilet, mar de Frânske spiler seit sels dat er graach bliuwe wol.

Wiebe van der Heide fan De Harkema hat syn hantekening set ûnder syn earste profkontrakt by SC Cambuur. It kontrakt dat de 19-jierrige middenfjilder tekenet rint oant de simmer fan 2028, mei de opsje foar in ekstra jier.

Van der Heide kaam yn 2018 oer fan Harkemase Boys en trochrûn de jeugdoplieding fan Cambuur. Op 19 desimber makke hy yn de wedstriid tsjin MVV Maastricht syn debút yn it earste alvetal.

De 19-jierrige keeper Matthijs Kalisvaart hat in kontrakt oant 2028 tekene by Cambuur. De jonge keeper waard twa jier lyn opnaam yn de jeugdoplieding fan SC Cambuur en sûnt dit seizoen makket hy diel út fan de earste seleksje.

"Met zijn enorme drive om beter te worden heeft Matthijs zich de afgelopen twee jaar sterk ontwikkeld. Dat hij nu zijn eerste professionele contract tekent, is dan ook een beloning voor zijn voortgang en harde werken", seit technysk manager Lars Lambooij.

Yn de nije oerienkomst is in opsje foar in ekstra jier opnaam.

Jur Veenje fan Garyp rydt takom jier foar Team Staan-CTS, de reedrydploech fan trainers Ian Steen en Hein Otterspeer.

De 25-jierrige reedrider siet oant it ôfrûne seizoen by it Gewest Fryslân.

Hy heart by de subtop op de 1.500 meter en helle yn it ferline meardere top tsien-plakken yn nasjonale kampioenskippen.

By syn nije ploech wol er it ferskil mei de grutte nammen op dy ôfstân lytser meitsje.

Tennisser Sander Arends fan Ljouwert hat de 16e finale ferlern op it graveltoernoai fan Madrid.

Tegearre mei syn maat David Pel gie Arends ûnderút tsjin André Goransson út Sweden en Evan King út de Feriene Steaten.

De earste set gie mei 4-6 nei de Sweed en de Amerikaan, mar yn de twadde set toanden Arends en Pel werstel (6-1).

De supertiebreak gie lykwols mei dúdlike sifers nei Goransson en King (4-10).

Wolkom yn it sportbloch fan dizze wike. Wolst in melding krije by in nij berjocht? Klik dan op it beltsje boppe-oan dit bloch.