Coronanijs 27 april: Minder coronapasjinten yn sikehuzen; Keningsdei yn coronatiid

Yn de Fryske sikehuzen lizze yn totaal 47 coronapasjinten, dat binne der 5 minder as foar it wykein. Fan harren lizze 19 op de intensive care, itselde oantal as ôfrûne freed. It tal coronapasjinten dat net op de ic leit, is ôfnommen fan 33 nei 28.

Lanlik is it tal coronapasjinten op de ic's omleech gien nei 905, dat binne der 29 minder as snein.

It lanlike oantal coronastjergefallen is de ôfrûne 24 oeren mei 43 oprûn ta 4.518. Dat meldt it RIVM. Dat is it leechste oantal sûnt 23 maart. Doe gie it om 34 stjergefallen.

It oantal sikehûsopnames rûn it ôfrûne etmiel op mei 65 op nei 10.521. Op 16 maart wie der foar it least sa'n lyts oantal sikehûsopnames, doe wiene it 43. De pyk oant no ta kwa sikehûsopnames wie op 31 maart, mei 722 pasjinten.

It oantal fêststelde coronabesmettings rûn mei 400 op ta 38.245. It werklike oantal leit heger, om't net elkenien test wurdt. Fan alle melde pasjinten is de helte 60 jier of âlder.

Strategysk op in krúsing yn Lúnbert stiet hjoed in tinte mei tafels, muzyk en middels om it ferkear op in goede wize te organisearjen. Want it lokale kafee moat kreatyf wêze dizze dagen. Wat sy útfûn hawwe, is in 'drive-through' mei Keningsdei-spultsjes, wêrby't alle spultsjes út de auto wei te dwaan binne.

Minsken kinne út de auto wei ûnder oare bliksmite, bierpulskowe, nei eintsjes hengelje en ringsmite. Der wurdt ek op tasjoen dat eltsenien yn de auto bliuwt, der wurdt ôfstân hâlden en it persoaniel hat mûlkapkes om.

Omrin hie harren frachtweinsjauffeurs net temperatuere meien. De Autoriteit Persoonsgegevens makke freed bekend dat dat tsjin de privacyregels yngiet en dêrom ferbean is. Omrin ûndernaam fuort aksje en liet it frijwillich temperatueren fan harren meiwurkers efterwege.

"We zijn vrijdag direct met het temperaturen gestopt, toen bleek dat het juridisch gezien niet geoorloofd is", fertelt Jelmer Helmhout fan Omrin. "We waren daar een aantal weken mee bezig."

GGD Fryslân meldt dat der de ôfrûne 24 oeren gjin nije coronastjergefallen meld binne. It oantal bliuwt op 58 stean. Fan de minsken dy't harren teste litten hawwen, binne fjouwer minsken besmet mei it coronafirus. Dêrmei komt it oantal op 502 posityf teste persoanen.

Saskia van den Broek fan de GGD is tefreden mei dy sifers. "De cijfers zijn precies hetzelfde als gisteren. Het lijkt er op dat we de afvlakking zien die we zo graag willen. Dat houden we vol als we ook de maatregelen volhouden. Dat is ook het dilemma waar we in zitten."

Boargemaster Jannewietske de Vries lokwinsket de kening út namme fan alle ynwenners fan Súdwest-Fryslân. Se hat it boadskip opnaam yn in spesjale fideo fan it bordes fan it stêdhûs ôf.

De Bogerman Bigband ûnder lieding fan Anne Oosterhaven hat spesjaal foar 'Woningsdag', de thúsedysje fan Keningsdei, in liet makke.

"Hoe bijzonder is het om op afstand van elkaar toch een eenheid te vormen." Dat sei kening Willem-Alexander moandei yn in koarte taspraak op telefyzje foar Keningsdei. It wurdt neffens him in unike Keningsdei, benammen om't er hopet dat it de lêste thús-Keningsdei fan de skiednis wêze sil. Hy ropt minsken dêrom op om der it bêste fan te meitsjen. "Zodat u later zich altijd zult herinneren hoe u thuis en toch samen deze dag heeft beleefd."

Keningsdei hat dit jier in folslein oar karakter. De nasjonale fiering yn Maastricht waard skrast en de nasjonale feestdei wurdt fan thús út of fan it balkon ôf fierd.

De kening spruts syn teloarstelling út dat it besite oan Maastricht net trochgean koe. "Maar wat in het vat zit, verzuurt niet", sa sei er deroer. Hy hie leaver sjoen dat der op de grêften, pleinen en strjitten kloften minsken stean soene en dat Nederlân "helemaal uit zijn dak, uitbundig feestvierend" wêze soe. "Maar dat heeft niet zo mogen zijn."

"Hou vol, ook na deze Koningsdag", spruts de kening it lân bemoedigjend ta út syn wente Huis ten Bosch wei. Om 16.00 oere slút de kening de fiering ôf troch it glês te heffen by in nasjonale toast.

NOS-presintator Winfried Baijens makket moandei in roadtrip troch it lân om yn byld te bringen hoe't der yn Nederlân hjoed dochs noch ynfolling jûn wurdt oan Keningsdei. Syn reis giet troch alve provinsjes en sette moandei ier en betiid útein yn Surhústerfean.

It resultaat is fan 'e jûn fan 19.00 oant 19.50 oere te sjen op NPO1.

Minister-presidint Mark Rutte hat kening Willem-Alexander fia Twitter lokwinske mei syn 53e jierdei. Hy die tagelyk in oprop oan elkenien omop Keningsdei thús te bliuwen.

Alle festiviteiten rûnom Keningsdei binne ôfsein yn ferbân mei de maatregels tsjin it nije coronafirus. Rutte wiist derop dat ek de kening sels syn jierdei dit jier thús fiert mei syn frou en bern. "Het mooiste cadeau dat wij hem kunnen geven, is om dat voorbeeld te volgen", seit de premier.

"No ha wy fansels mazzel mei ús plakje, dêr't om hûs hinne genôch romte is om ús in simmer lang te fermeitsjen. Mar wat no ast op fiif heech yn in flatsje wennest mei allinnich in balkon? Dan is it in hiel oar ferhaal. Gjin swimbad yn de tún, hingmat op it terras of hutte yn de beam. Mar dêr ha ik wat op betocht.

Wat no as wy dizze simmer wer âlderwetsk oan hûzeruil dogge? Dat in famylje út de Bijlmer in wike lang yn Boelensloane fakânsje fiert en wy dêr hinne gean. Foar ús in moai momint om ris flink oan sightseeing te dwaan yn de no dochs rêstige haadstêd. En foar har it momint om hearlik yn it bosk út te waaien of yn de fiver te sparteljen."

Foar it earst sûnt 2001 fiert de keninklike famylje de nasjonale feestdei thús. Troch de coronakrisis wurde alle festiviteiten online organisearre. Kening Willem-Alexander sprekt it lân om 10.00 oere koart ta.

It keningspear soe mei de bern en oare famyljeleden dit jier nei Maastricht ta. It is de twadde kear dat in keninklik besite ôfsein wurdt. Yn 2001 waard fanwege de tongblierkrisis de fiering fan Keninginnedei yn Meppel en Hoogeveen skrast. De keninklike famylje kaam in jier letter dochs noch nei Drinte.

Willem-Alexander, Máxima en dochters Amalia, Alexia en Arianefiere Keningsdei no thús op Paleis Huis ten Bosch. De keninklike famylje dielt moandei bylden, ûnder mear fia de telefyzje en sosjale media en it platfoarm koningsdagthuis.nl. Om 16.00 oere slút de kening de fiering fan Keningsdei ôf troch it glês te heffen by de nasjonale toast.

It Koninklijke Bond van Oranjeverenigingenhat in spoarboekje makke foar elkenien dy't dielnimme wol oan de online- of thúsfestiviteiten. Sa is elkenien frege om 10.00 oere it Wilhelmus te spyljen of te sjongen út doariepenings wei of fan balkons ôf en middeis is it toastmomint. Op de webside koningsdagthuis.nl wurde de hiele dei allerhande inisjativen toand.

Soarchmeiwurkers fan wensoarchsintrum De Warrenhove yn Drachten dy't yn kontakt komme mei bewenners moatte mûlkapkes drage. Dat skriuwt Zorggroep Liante op harren webside. Hjirmei wurdt neffens Liante bewust ôfwykt fan de lanlike rjochtlinen fan it RIVM.

De maatregel is bedoeld om de útbraak fan it coronafirus op it wensoarchsintrum ta in halt te roppen. Sûnt 8 april binne ferskate bewenners en meiwurkers fan De Warrenhove besmet rekke mei it coronafirus.

De Warrenhove is neffens de soarchgroep in grutte lokaasje en in spesifyk gebou. Dat soe it dreger meitsje om it firus yn te damjen. De ferplichte maatregel fan de mûlkapkes is ôfrûne freed útein set.

Fries om utens Merijn Bouma wennet Spanje en makket vlogs foar de rige 'Berjochten út it hert'. In ferskaat oan minsken lit foar dit projekt sjen hoe't sy libje yn de coronakrisis. Bouma mei bygelyks allinnich it hûs út om nei de winkel te gean, tweintich meter fierderop.

Mear vlogs fan Merijn Bouma en de oare vloggers fan de rige 'Berjochten út it hert' sjen? Dat kin fia dizze dossierside.

Miskien is it dy al opfallen, Omrop Fryslân draait moandei op de radio allinnich muzyk dy't yn Nederlân makke is. De Omrop docht dêrmei mei oan in lanlike aksje, tegearre mei in grut tal oare radiostjoerders. Mei dizze aksje wolle de stjoerders de artysten en muzikanten út eigen lân stypje dy't rekke wurde troch de coronakrisis.

Ta eare fan Keningsdei waard by sinne-opgong de flagge hyst yn de tsjerketoer fan Ternaard.

Der komt fan it simmer in stoarmrin op yndividuele fakânsjes yn eigen lân. Benammen fakânsjehûzen, B&B's en lytsere campings binne populêr, dêr't romte en hygiëne garandearre is. Dat skriuwt De Telegraaf.

Drokke fleanfakânsjes binne oant septimber út 'e graasje, wize alle peilingen út. Sadree't de reagering de coronabeheinings werom draait, giet it yn Nederlân lost, ferwachtsje saakkundigen.

Reiskes tichtby soene no al "hamstere" wurde om wis te wêzen fan in feilich plakje. In grut part fan de pear miljard oan tegoedbonnen foar skraste bûtenlânske reizen wurdt neffens harren hjiroan bestege.

"Er ontstaat snel schaarste als iedereen eropuit wil in Nederland, want de eisen van afstand blijven. De prijzen zullen daardoor omhoog schieten. Aanbieders willen gemiste inkomsten uit het verloren voorjaar inhalen", sizze eksperts Wouter de Waal en Isabel Mosk.

In earste groep ferpleechhûzen kin fan 11 maaie ôf ûnder strange betingsten wer yn beheinde mjitte besikers talitte. Dat seit minister De Jonge fan Folkssûnens tsjin it Nederlands Dagblad. "We moeten zoeken hoe we het menselijke aspect, en wat medisch noodzakelijk is, beter kunnen combineren", seit de minister.

Sûnt 20 maart jildt in strikt besiteferbod foar ferpleechhûzen. Der wurdt allinnich besite talitten by minsken dy't stjerrende binne. Yn in tredde fan de ferpleechhûzen yn Nederlân binne coronabesmettings fêststeld. It hanthavenjen fan in folslein besiteferbod is neffens De Jonge net langer akseptabel.

Hy komt dêrom no mei in foarstel dat er op 4 maaie foarleit oan it Outbreak Management Team. Op 6 maaie wol De Jonge in beslút nimme, sadat der oer twa wiken mei in proef úteinsetten wurde kin.

By in ferromming wurdt earst sjoen oft in ferpleechhûs dat oankin. Wichtige betingst is dat it oantal besmettings op een lokaasje beheind bleaun is. Dêr docht neffens de minister út bliken dat it ferpleechhûs yn steat is strikte hygiënemaatregels nei te libjen. Folgjende oandachtspunt is wa't der op besite giet. "Dat kan niet Jan en alleman zijn. Misschien moeten we dat beperken tot een mantelzorger of contactpersoon per verpleeghuisbewoner", seit De Jonge.

It besite moat op ôfspraak komme en kin plakfine yn aparte romten, sadat der gjin grutte streamen minsken troch de gong rinne. De minister wol begjinne mei in beheind oantal ferpleechhûzen. "Daarna hopen we stapsgewijs ook in andere verpleeghuizen de bezoekersregeling iets te kunnen verruimen."

Goeiemoarn en wolkom yn it liveblog fan moandei 27 april oer it coronafirus. De stân fan saken: