Sûnder coach stiet LDODK op drompel fan histoaryske kuorbaldream: "We willen zo ontzettend graag"
LDODK fan De Gordyk kin noch altyd foar it earst yn it bestean fan de klup de kuorbalfinale helje. Nei in 20-22 winst yn de twadde heale finale yn Bennekom tsjin DVO komt der in beslissende tredde wedstriid.
"Hier doen we het hele seizoen alles voor", seit spiler Harjan Visscher nei ôfrin fan de wedstriid yn Bennekom. Om him hinne stean de feestjende fans fan De Gordyk.
De hal wie útferkocht en de sfear siet der goed yn. In hûnderttal supporters reizge LDODK efternei om de klup te stypjen.
Yntins
LDODK moast de twadde heale finale winne yn Bennekom. De earste wedstriid gie nei DVO en by ferlies yn de twadde wedstriid, wie de kampioensdream foarby.
Mar troch de winst fan LDODK folget der tiisdei in tredde, allesbeslissende wedstriid op De Gordyk.
"Je speelt in een volle hal en met al dat publiek erbij beleef je die wedstrijd zo intens. Maar de blik moet nu meteen op dinsdag, want dan gaat het pas echt om de knikkers", seit Visscher.
Opfallende ôfwêzige by LDODK wie coach Jan Niebeek. De 55-jierrige Gelderlanner is tritich dagen skorst troch kuorbalbûn KNKV nei ûngeregeldheden yn de earste wedstriid tusken DVO en LDODK.
"Hij is normaliter altijd de kapitein van het schip", seit assistint Friso Boode. Hy nimt de taken oer fan Niebeek en coacht LDODK mei drokke bewegingen by de line fan it spylfjild.
"Maar hij heeft het stuur nu niet vast en dan moet de ploeg dat doen. De reservekapitein weet hoe het schip werkt en neemt het dan over. Dat ging prima vandaag, dacht ik."
"Doe het liever samen"
Fraach is oft Niebeek by de tredde wedstriid wêze kin. De tuchtkommisje sjocht noch nei de skorsing.
"Maar ik verwacht het eerlijk gezegd niet. Al hoop ik daar uiteraard wel enorm op, want ik doe het liever samen", seit Boode.
LDODK is al jierren in topklup yn it kuorbal en docht mei om de boppeste plakken yn de kompetysje. Dit seizoen waarden De Gordyksters twadde en giene se wer de play-offs yn.
Dêryn moast de klup dus tsjin DVO, dy't tredde waard yn de Korfbal League. Nei de reguliere kompetysje folget in beslissende knock-out tusken de nûmers ien oant en mei fjouwer.
"Dit zijn de wedstrijden die je wilt spelen", seit spylster Amber Klaren. "Dus daar zijn wij volop mee bezig geweest en het is fantastisch dat het nu zo uitpakt."
De úteinlike finale fan de Kuorbal League is yn Rotterdam. Ahoy is alle jierren yn april it dekôr fan de grutte finale yn de striid om de kuorbaltitel.
LDODK besiket dy al salang't de klup bestiet te heljen, mar it slagge oant no ta noch nea. De Gordyksters waarden meardere kearen yn de heale finale útskeakele.
Nu moeten we het ook afmaken. Dit geeft enorm vertrouwen.
Sadwaande gie dit jier it roer om en kaam der profesjonalisearring fan de sport. De spilers traine middeis en ek waard de sporthal op De Gordyk ferboud ta in weardige sporthal.
"We willen zo ontzettend graag Ahoy halen", seit spiler Terrenc Griemink, dy't oan syn lêste jier dwaande is by LDODK. "Maar nu moeten we het ook afmaken. Dit geeft enorm vertrouwen."
Thúswedstriid
Tiisdei 14 april spylje de Gordyksters de tredde en beslissende wedstriid yn de eigen sporthal Koartsweagen. Dan kin de dream oer Ahoy lang om let wierheid wurde.
In dream, dy't stadichoan in obsesje wurden is.