Greenpeace fiert op 'en nij aksje op Noardsee by boarplatfoarm ONE-Dyas boppe Skiermûntseach
Sa'n tweintich demonstranten fan Greenpeace demonstrearret op 'en nij tsjin gaswinning op de Noardsee by it boarplatfoarm fan ONE-Dyas boppe Skiermûntseach.
Neffens de aksjegroep hawwe de aktivisten trije driuwende platfoarms fêstlein op it plak dêr't it boarplatfoarm komme moat. Boppedat wurdt neffens de groep mei spandoeken op boaten protestearre.
Natuerorganisaasjes besochten earder om fia de rjochter foar te kommen dat ONE-Dyas op it plak yn de Noardsee nei gas boarje kin. Dat mislearre, it heger berop tsjin dat beslút rint noch.
Net it earste protest
Yn juny demonstrearre Greenpeace ek al by itselde boarplatfoarm. Fiif aksjefierders beklommen it platfoarm doe, om sa de wurksumheden fan it gaswinningsbedriuw stil te lizzen.