Robbin Ruiter ûnderweis nei kontrakt by Cambuur
Keeper Robbin Ruiter is ûnderweis nei in kontrakt by Cambuur. Hy is al inkele wiken op proef by de Ljouwerter eredivisionist, en beide partijen binne it iens wurden oer in kontrakt.
Dat kontrakt sil takom wike tekene wurde. Cambuur is op dit stuit op trainingskamp yn Epe, en Ruiter moat noch medysk keurd wurde. Dat fynt nei it trainingskamp plak, en pas dan kin it kontrakt ek tekene wurde.
It giet nei alle gedachten om in kontrakt fan ien jier. Ruiter hat yn de oefenwedstriid tsjin Magdeburg yn aksje west. Dy wedstriid ferlear Cambuur mei 4-2. Ruiter wurdt de twadde keeper, achter de Portugeeske jeugdinternational Joao Virginia.