Mear amtners fuort yn Ljouwert

Folle mear amtners as earder tocht, reitsje har baan by de gemeente Ljouwert kwyt. Hold de gemeente twa jier lyn noch rekken mei 80 oant 100 amtners, no binne dat der wol 140 oant 150. It kolleezje fan b. en w. stelt dêrom njonken de eardere 1 miljoen euro nochris 800.000 euro beskikber om dizze amtners te begelieden nei oar wurk.

De ekstra amtners dy't har baan kwytreitsje sille, wurkje no benammen by it Wurkplein. It Ryk wol dêrop besunigje en ek Ljouwert merkt dêr de gefolgen fan. Foarearst binne twongen ûntslaggen net oan de oarder.